1Mandac Dioslla,
ñucata piñaccunahuan shayariyari.
Ñucahuan macanacuccunahuan
macanacuiyari.
2Jatun escudotapish,
uchilla escudotapish japishpa,
ñucata ayudangapac shamuiyari.
3Ñucata llaquichingapac
caticcunata lanzata japishpa
ñanpi tupaiyari.
Ñuca almataca:
«Ñucami canta quishpichic
cani» niyari.
4Ñucata huañuchisha niccunaca
burlashpa pingaichishca cachun.
Ñucata llaquichingapac
yuyarinacuccunaca pingaichishpa
huashaiman callpachishca cachun.
5Tamota huaira apashca shina
callpachun.
Mandac Diospac ángel
catishca cachun.
6Paicunapac ñanca amsayashca
lluchcarinalla cachun.
Mandac Diospac ángel paicunata
cati rishpa llaquichichun.
7Manapish ima millaita ruhuacpimi,
ñuca urmachun jutcutapish,
linchitapish ruhuashpa churarcacuna.
Manapish ima millaita ruhuacpimi,
ñuca urmachun tucllata ruhuarcacuna.
8Paicunata cungaimanta
llaqui japishca cachun.
Pacalla churashca tucllallapitac
paicunallatac urmashpa,
jatun llaqui tucuchun.
Jatun llaqui tucushpa
chingachishca cachun.
9Chashna cacpimi, ñucaca
Mandac Dios-huan cushicusha.
Pai quishpichishcamantami
ñucaca yallita cushicusha.
10Chaimantami ñuca tullucuna
cushicushpaca:
«Mandac Dioslla,
¿Pitac can shina tiyanyari?
Canmi llaquilla runataca paita
yalli sinchi runacunapac
maquimanta cacharichingui.
Imata mana charictapish,
huaccha runatapish
llaquichic runapac maquimantami
quishpichingui» ningacuna.
11Ñuca manapish yachashcata
tapungapacmi llullashpa
juchanchic runacuna jatarincuna.
12Allita ruhuashcamantaca
mana allitami ñucamanca ruhuancuna.
¡Ñuca almaca yallitami llaquirin!
13Paicuna ungushpa
llaquilla cacpica,
sharpa churanata churarishpami
llaquilla purircani.
Yallita llaquirishpami ayunashpa
ñuca shungupica mañacurcani.
14Ñuca ricsishcamanta shina,
ñuca huauquimanta shinami
llaquirircani.
Quiquin mama huañucpi shinami,
duelo churanata churarishpa
llaquirircani.
15Ashtahuanpish ñuca
llaquihuan cacpica,
tandanacushpami asircacuna.
Ñuca mana yachacpimi,
ñucata piñaccunaca ñucata
llaquichingapac tandanacurca.
Paicunaca mana saquishpami,
yallita llaquichicurca.
16Burlashpami yallita llaquichirca.
Ñucata piñashpami
quirucuna caniricurca.
17Jatun Dioslla,
¿Maicamantac chashna ruhuacta
ricucunguilla?
Ñucataca huañunamanta
quishpichiyari.
Ñuca causaitaca leoncunapac
shimimanta huacaichiyari.
18Can ruhuashcataca achca
tandanacushca gentecunamanmi
huillasha.
Achca gentecunapac
ñaupapimi alabasha.
19Ñucahuan yanga piñariccunaca
amatac cushicuchuncuna.
Yanga mana ricunayachiccunapish
ama ñahuita quimllachun.
20Cushi causaimantaca
mana parlanacuncunachu.
Ashtahuanpish cai llactapi
causac alli shungucunatami
llaquichingapac llullancuna.
21Ñucata yallita shimita pascashpa
rimashpaca:
«¡Aja, ñucanchic ñahuihuantacmi
ricunchic!» nincuna.
22Mandac Dioslla,
canllatacmi ricucungui.
Ama upalla saquirichu.
Jatun Dioslla, ama ñucamanta
caruyaichu.
23Ñuca Dioslla, ñucata Mandaclla,
cashcata ruhuashpa ñucata
misangapac riccharishpa shayariyari.
24Ñuca Mandac Dioslla,
can mana pandaric cashca
shinallatac cashcata ruhuashpa,
ñucata burlashpa
asichunca ama saquichu.
25Paicunapac shungupipish:
«¡Aij, ñucanchicca chashna
cachunmi munarcanchic!» nishpa:
«Paitaca tucuchishcanchictacmi»
nichunca ama saquichu.
26Ñuca llaquihuan cacpi,
cushicuccunaca pingaichishca,
muspachishca cachun.
Ñucata piñashpa jatun tucuccunaca
pinganayaipac churanata
churarishca shina musparichun.
27Ashtahuanpish manapish faltayuc
ñucata misaccunaca cushicushpa
cantachun.
Punzhanta paicunaca:
«¡Mandac Diosca jatunmari,
paita servictaca sumacta
causachunmi munan!» nichunlla.
28Ñuca shimihuanca cashcata
can ruhuashcatami huillasha.
Punzhantami canta alli nicushalla.
Who We AreWhat We EelieveWhat We Do
2025 by iamachristian.org,Inc All rights reserved.
