EZEQUIEL 5 - Biblia Quichua Cañar 2010

1Huañunalla runa, canca barbasta pitina navajatapish, filosapa cuchillotapish japishpa acchatapish, barbastapish pitingui. Chai quipaca balanzata japishpa, acchata pezashpa chaupingui.

2Macangapac muyunacuna punzhacunapi, quimsapi chaupishca asha acchataca pueblo chaupiman apashpa, ninapi rupachingui. Asha parte acchataca pueblo muyundipi espadahuan pitinacungui. Caishuc asha parte acchataca huairapi chaspingui. Chaipimi paicunata espadahuan catishpa llaquichisha.

3Chai acchamanta ashata japishpa, cambac jahualla churana puntapi huatangui.

4Cutin ashataca ninapi shitashpa rupachingui. Chaimanta nina llucshishpami, tucui israelcunata rupachinga» nirca.

5Mandac Diosca: «Ñucami Jerusalentaca muyundi shuctac llactacunapac chaupipi churarcani.

6Ashtahuanpish, muyundi llactacunapi causaccunamanta, muyundipi causaccunamanta yallimi ñuca ruhuachun nishcacunataca mana cazushpa, mana manchashpa causarca» nirca.

7Chaimantami Mandac Dios ñucaca: «Cancunapac muyundi llactacunapi causaccunamanta yalli mana allita ruhuashpami, ñuca mandashcacunata mana cazurcanguichic. Ñuca ruhuachun nishcacunata mana pactachircanguichicchu. Cancunapac muyundi llactacunapi causaccunapac mandashcacunatapish mana cazurcanguichicchu.

8Chaimantami Mandac Dios ñucaca cancunahuan piñarircani. Ñucallatacmi cancunataca tucui llactacunapi causaccunapac ñaupapi llaquichisha.

9Cancuna millaita ruhuashcamantaca yallitami llaquichisha. Chashnaca jaicapi mana llaquichishcanichu. Shinallatac mana llaquichishachu.

10Chaimantami cancunapac chaupillapica taitacunaca huahuacunata, huahuacunaca taitacunata micunga. Cancunata llaquichishpa, maijanlla saquiriccunataca caita, chaita catishpami cachasha.

11Mandac Dios ñuca shutipimi nini: Cancuna yalli millaita ruhuashcamanta, ruhuashcalla dioscunata adorashpa ñucapaclla huasita yangapi churashcamantaca ñucapish llaquichishami. Manatac llaquishachu, manatac cuyashachu.

12Cancunamanta quimsapi chaupishca gentecunaca ungüihuan, yarcaihuanmi chaillapitac huañunga. Cutin shuc quimsapi chaupishca gentecunaca cancunapac muyundillapitacmi jatun macanacuipi huañunga. Cutin shuctac quimsapi chaupishca gentecunataca espadata llucchishpami caita chaita catishpa cachasha.

13Chashnami ñuca yallita piñarishcataca paicunata llaquichishpa pasachisha. Chashna llaquichishpa, shungupi cushicucpimi, Mandac Dios ñucaca ñucapaclla cachun munac cashcataca yachanga.

14Jerusalén, cantaca shitashca pambata ruhuashpami saquisha. Muyundi llactacunapi causaccunapish, chaita puriccunapish burlashpami asinga.

15Ñuca yallita piñarishpa, canta llaquichicpica, muyundi llactacunapi causaccunapac burlashpa asina, camishpa rimana, yuyarina, shinallatac yalli mancharinami tucungui. Caitaca Mandac Dios ñucami nini.

16Ñucaca huañuchic flecha shina yarcaitami cancunapacman cachasha. Yarcai punzhacunata ashtahuan mirachishpami cancunata tucuchisha. Cancunapac micuipish tucuimi tucuringa.

17Chashnami yarcaitapish, piña animalcunatapish cachashpa, cancunapac huahuacunata tucuchisha. Chaipica ungüipish, yarcaipish, jatun macanacuipishmi tiyanga nini» nirca.