1Chai quipami Jobca pai huacharishca punzhataca mana alli nishpa rimarirca.
2Job sinchita rimarishpaca:
3«Ñuca huacharishca punzha
ama tiyashca cachun.
“Cari huahuatami charingui”
nishpa, huillashca tutapish
chingarishca cachun.
4Chai punzha amsa tucushca cachun.
Jahua pachamanta Dios cungarishpa,
achicta ama cachachun.
5Chai punzhaca purayashca
huañuna llandu cachun.
Punzha purayashca shina,
manchanayaita ruhuashpachari
alli canman.
6Chai tuta purayashpachari alli canman.
Ñuca huacharishca punzhapish,
huatapish, quillapish,
mana tiyashpachari alli canman.
7¡Chai tutaca pipish ama huacharichun,
ima cantanapish ama tiyachun!
8Chai punzhata mana alli niccuna
manchana leviatán animalta
japishpa ricchachiccuna
mana alli nichiyari.
9Tutamanta llucshic lucerocunapish,
amsayashpachari alli canman.
Punzhayangami nicucpipish,
mana punzhayashpachari alli canman.
Pacaricpi, achicta mana ricushpachari
alli canman.
10Chai punzha mana huacharishca
cashpaca, cai tucui llaquicunataca
manachari apaiman carcani.
11Ñucaca, ¿ima nishpatac
mana huicsallapitac huañurcani?
¿Ima nishpatac
mana huacharishcahuan huañurcani?
12¿Ima nishpatac, changapi
churashpa marcarcacunayari?
¿Imapactac chuchuchircayari?
13Huañushca cashpaca,
samaricuimanmi carcani.
Sumactami sueñucuiman carcani.
14Cai pachata mandaccunahuan,
paicunaman yuyaita cuccunahuanmi
samaricuiman carcani.
Paicunaca urmashca huasicunatami,
paicunapac cachun allichincuna.
15Mana cashpaca
curita charic mandaccunahuan,
cullquita huasipi jundachic
runacunahuanmi samaricuiman carcani.
16¿Ima nishpatac ñucataca
shullushca huahuata shina,
achicta manarac ricuc huahuata shina
mana pacarcacunayari?
17Huañushpami Diosta mana manchaccunaca
shuccunata pandachinataca saquincuna.
Llaquipi causaccunapish
chaipimi samarincuna.
18Prezucunapish chaipimi samarincuna.
Piña mandaccuna caparishcapish,
mana uyarinchu.
19Uchillapish, jatunpish,
chaillapitacmi can.
Servishpa causaccunapish,
amopac maquimantaca
cacharishcami cancuna.
20¿Ima nishpatac llaquihuan
causaccuna achicta ricuchunca
saquinyari?
¿Ima nishpatac shungu
nanarishcamanca causaita cunyari?
21Paicunaca huañuitami shuyan.
Huañuica mana chayanchu.
Curi pacashcata shina mashcacucpipish
huañuica mana japinchu.
22Enterrana jutcuta tarishpaca
yallitami cushicuncuna.
23Diosllatac jarcashpa charicucpi
maita rinata mana yachac runamanca,
¿imapactac causaita cunyari?
24Micunapac randica,
shunguracmi llaquirin.
Ñuca llaquirishcaca
yacu shinami callpacun.
25Ñuca imatami manchani,
chaillatacmi ñucataca japishca.
Ñuca imatami manchani,
chashnallatacmi tucushca.
26Alli, sumac causaita,
samarinata mana charishcanichu.
Ashtahuanpish yuyaita chingachic
llaquicunami shamushca» nirca.
Who We AreWhat We EelieveWhat We Do
2025 by iamachristian.org,Inc All rights reserved.
