LAMENTACIONES 3 - Biblia Quichua Cañar 2010

Quimsaniqui huacaimantaAlef

1Ñucami Dios piñarishpa,

llaquichishca runaca cani.

2Ñucatami luzmanta caruyachishpa,

pura tutapi pusharca.

3Piñashpami, cutin cutin

paipac maquihuan llaquichirca.

Bet

4Ñuca aichatapish,

ñuca caratapish tucuchishpami,

ñuca tullucunatapish paquirca.

5Ñuca muyundipi baluarteta

ruhuac shinami yallita llaquichirca.

6Ñaupa huatacunapi huañushcacunata

shinami pura tutapi causachun

saquirca.

Guímel

7Ñucapac muyunditami jarcan.

Chaimantami mana llucshi pudini.

Ñucata huatashca cadenaca llashacmi.

8Ñuca yallita caparishpa

mañacpipish, ñuca mañashcata

mana uyasha ninchu.

9Ñuca purina ñancunatapish

rumicunahuan jarcashpami,

quingu ñancunata ruhuarca.

Dálet

10Mandac Diosca oso chapacuc shina,

león pacallapi chapacuc shinami carca.

11Shuctac ñanta pushashpami,

ñutuchishpa saquirca.

12Paipac arcota cacharingapacmi

ñucataca señalta ruhuarca.

He

13Paipac flechacunataca

fuerzahuan shitashpami,

ñuca shungupitac shitarca.

14Llactapi causaccunapac

burlashca, punzhanta asishpa

mana alli nishcami carcani.

15Mandac Diosca jayacta

ubiachic shinami,

yallita llaquichirca.

Vav

16Pambaman shitashpami,

ñuca quirutaca paquirca.

Ñucataca uchupapimi sarurca.

17Ñuca shunguca cushi causaita

mana charinchu.

Cushi causaitaca ñami

cungarircani.

18Ñucaca: «Causaita cuc samaica

chiriyarcami.

Mandac Diosta yuyarishpa

causanapish tucurircami»

nishpami yuyarcani.

Zayin

19Llaquita apashcatapish,

ñucata pi mana ayudashcatapish,

jayac ajencota ubiashca shina,

llaquita apashcatapish yuyarinimi.

20Chaicunata yuyarishpami,

shungupi chiriyashca shina tucuni.

21Chaicunata ashtahuan ñuca

shungupi yuyarishpami,

Diosta mañashpa shuyacushalla.

Jet

22Mandac Dios llaquic cacpimi,

mana tucurishcanchic.

Paica ñucanchicta llaquicunllami.

23Chai cuyaica cada tutamantami

mushucyan.

¡Canca tucuita pactachicmi cangui!

24Chaimantami paipi shunguta

churashpa shuyani.

Ñucamanca Mandac Diosca

tucuimantami yallimi.

Tet

25Mandac Diosca paita shuyashpa,

tucui almahuan

mashcaccunapacca allimi.

26Mandac Dios quishpichinata

upalla shuyanaca allimi.

27Huambramanta pacha

yugota apacca alli runami.

Yod

28Mandac Dios mandacpimi,

runaca upalla, pailla tiyacunga.

29Cumurishpa umata pambapi

tupachichun.

Chaipica quishpiringapishchari.

30Chugrichic runaman ñahui ladota

ricuchichunlla,

camishpa rimashcatapish

chasquichunlla.

Caf

31Mandac Diosca mana huiñaita

cungarinchu.

32Llaquichishpapish

pai yallita llaquic

cashca shinallatacmi llaquin.

33Mana pai munashcamantachu

aichayuc runacunataca

nanachishpa llaquichin.

Lámed

34Jahua pacha Mandac Diosca

tucui llactapi prezucunata

sarushpa ñutuchichunpish,

35paipac ñaupapi runa japinata

anchuchichunpish,

36manapish juchallishca runata

llaquichichunpish mana munanchu.

Mem

37Mandac Dios mana mandacpica,

¿pitac imata huillanga?

38¿Manachu allipish,

mana allipish

jahua pacha Diosmanta shamunga?

39Juchamanta llaquichishca runaca,

¿imamantatac llaquirin?

Nun

40Ñucanchic ima shina

causacushcata allita yuyarishpa,

Mandac Diospacman cutirishunchic.

41Jahua pacha Diosta

tucui shunguhuan mañashpa:

42“Ñucanchicca mana cazushpami

canta llaquichircanchic.

Chaimantami ñucanchic juchataca

mana perdonarcangui.

Sámej

43Yallita piñarishpami,

ñucanchictaca catircangui.

Mana llaquishpami huañuchircangui.

44Ñucanchic mañashcata

mana uyangapacmi puyuhuan

taparircangui.

45Llactacunapac chaupipica

ñucanchictaca mapata shinami

ruhuarcangui.

Pe

46Tucui piñaccunami ñucanchicta

mana alli nishpa riman.

47Ñucanchicca manchaihuan

cashpami umashcanchic.

Jatun llaquihuan tucuchishcami

canchic” nichicyari.

48Ñuca llactapi causaccuna

yallita llaqui tucushcamantami

ñuca ñahuimantaca yacu shina,

huiquica urmacun.

Ayin

49Pipish mana cushichic tiyacpimi,

ñucaca upalla huacacunilla.

50Mandac Dios jahua pachamanta

ricungacamanmi huacacushalla.

51Cai llactapi causaccunapac

ushicuna llaquita apacushcata

ricushpami shungu nanacta

huacacunilla.

Tsade

52Ñucata piñaccunaca

manapish juchayuc cacpimi,

zhutata shina japinata munarca.

53Manarac huañucpimi, ñucataca

jatun jutcupi shitashpa

rumihuan ñitirca.

54Yacu ñuca umata tapacpica:

«¡Cunanca huañunimi!»

nishpami yuyarcani.

Qof

55Mandac Dioslla, jatun jutcu

ucumantami cambac shutita

mañarcani.

56Ñuca mañashcataca uyarcanguimi.

Ñuca caparishpa mañashcata uyaiyari.

57Canta ñuca mañacuc punzhaca

ñucapacman cuchuyashpami:

«¡Ama manchaichu!» nircangui.

Resh

58Mandac Dioslla, ñuca

llaquiricpica, ayudashpa,

quishpichircanguimi.

59Mandac Dioslla,

ñuca llaquitaca ricushcanguimi.

Cashcata ruhuashpa ayudaiyari.

60Ñucata llaquichisha

niccuna piñarishpa

imata yuyaricuctapish

tucuitami ricurcangui.

Shin

61Mandac Dioslla, ñucata

rimacushcatapish,

ñucata llaquichinata

yuyaricuctapish uyarcanguimi.

62Ñucata camishpa rimactapish,

punzhanta llaquichinata

yuyaricuctapish uyarcanguimi.

63Paicuna tiyarictapish,

jatarictapish ricuiyari.

Ñucataca mana alli nishpami burlan.

Tav

64Mandac Dioslla, paicuna

ima mana allita ruhuashca

shinallatac llaquichiyari.

65Paicunapac shunguta rumiyachiyari.

Paicunata llaquichiyari.

66Mandac Dioslla, catishpa llaquichiyari.

¡Cai pachamanta chingachiyari!