GÁLATAS 5 - Biblia Quichua Cañar 2010

Mana cutin huatashca shina tucunamanta

1Ama huatashca shina causachunmi, Cristoca ñucanchicta cacharichirca. Shina cashcamanta ama cutinllatac huatashca shina tucunata yuyaichicchu.

2¡Uyaichic! Ñucaca cancunapac ricsishca Pablomi cashna nini: Cancuna circuncisionta ruhuashpa caticucpica, Cristo imata ruhuashcaca yangamantami canga.

3Chaimantami cutinllatac nini: Maijanpish circuncisionta ruhuaccunaca mandashcacunatami tucui pactachina can.

4Maijan cancunapurapi mandashcacunata pactachishpalla Dios-huan alli tucushun nishpaca, Cristomanta caruyashpami Dios mai cuyashcamantapish chicanyarishcacuna.

5Shina cacpipish ñucanchic crishcallamanta, shinallatac Diospac Espíritu imatapish ruhuaclla cashcamantaca, Dios-huan alli tucuna yuyaillami canchic.

6Shina cashcamanta Cristo Jesus-huan shuc shinalla cashpaca, circuncisionta ruhuashca cashpa, mana ruhuashca cashpapish mana ima canchu, ashtahuanpish Cristota criccuna cashcamanta cuyanacushpa causanami ashtahuan alli.

7Cancunaca allimi caticurcanguichic. Cashcata nic huillashcata cazushpa caticucpica, ¿pitac cancunataca saquichun nircayari?

8Cancunata cayac Diosca mana chashna cachun munanchu.

9Ashalla levadurami tucui chaputa punguillichin.

10Jesucristohuan shuc shinalla tucushcamantaca, cancuna mana pandarina cashcatami yachani. Diosca maijan pandachishpa purictaca, pita cashpapish llaquichingami.

11Cuyashca criccuna, ñuca cancunaman “circuncisionta ruhuanaca allimi” nishpa puricpica, judiocunaca mana piñanmanchu carca, shinallatac Jesucristo ñucanchicmanta cruzpi huañushcata huillashcapish ña mana paicunata piñachinmanchu.

12“Circuncisionta ruhuanaca allimi” nishpa pandachishpa puriccunataca, ¡paicunapactarac tucui pitishpachari alli canman ninimi!

13Cuyashca criccuna, cancunataca ña ama huatashca shina causachunmi cayarca. Cunanca “ña mana huatashca shinachu canchic” nishpaca, imapish mana alli munaicunataca ama ruhuanguichicchu. Chaipac randica caishuc chaishuc-huan cuyanacushpa, ayudanacushpa causaichic.

14Moisés mandashcacunata tandachishcapica: «Can ima shinami cuyaringui, shinallatac shuccunatapish cuyangui» ninmi.

15Cancunaca piñanacushpa, caishuc chaishuc llaquichinacushpaca chingaringuichicmi.

Mana alli munaicunamantapish,Diospac Espíritu yuyaita cushcamantapish

16Chaimantami cancunataca: “Diospac Espíritu munashca shina causaichic, millai munaicunataca ama ruhuaichicchu” nini.

17Millai munaicunaca Diospac Espiritupac munaitaca piñanmi. Diospac Espiritupish millai munaicunataca piñanllatacmi. Chashna ishcaimanta mana apanacuc cashcamantami, ima munashcatapish mana ruhuai pudinguichic.

18Shina cacpipish Diospac Espíritu cancunata pushacucpica, mandashcacunaca ña mana mandacunchu.

19Millai munaicunata ruhuaccunataca ricunallami. Paicunaca huainayaccunami, imapish millaita ruhuaccunami, imapish munana viciota ruhuaccunami,

20ruhuashcalla dioscunata adoraccunami, brujocunami, pitapish mana allichu nishpa piñaccunami, macanacuccunami, celaccunami, imamantapish jahualla piñariccunami, piñanacuipi churaccunami, gentecunata chicanyachiccunami, ñucanchiclla cashun niccunami,

21shuccuna ama charichun nishpa munaccunami, huañuchiccunami machaccunami, yalli micunallata munaccunami, shinallatac shuctac chashnalaya mana allita ruhuaccunami. Cancunataca utcaman nishca shinallatacmi: “Chashna ruhuaccunaca Dios mandacucpica imata mana charingachu” nishpa, cutinllatac nini.

22Ashtahuanpish Diospac Espíritu yuyaita cushca causaccunaca cuyaccunami, cushi causaccunami, sumacta causaccunami, mana utca piñariccunami, llaquiccunami, cuccunami, Diospi shunguta churaccunami,

23mana jatun tucuccunami, shinallatac mana allimanta jarcariccunami. Chashna causaccunataca mana allichu nic mandashcaca mana tiyanchu.

24Maijanpish Cristohuan caccunaca cai pacha jucha munaicunandi, imapish mana alli yuyaicunandimi chacatashca shina causacun.

25Diospac Espiritumanta causacushpaca, Diospac Espiritullatac yuyaita cushpa pushachun saquishunchic.

26Ñucanchicpurapica ama jatun tucushun, ama shuccunahuan piñanacushun, shinallatac shuccuna charishcata ama munashunchic.