1 CRÓNICAS 29 - Biblia Quichua Cañar 2010

Diosta yuyarina huasita ruhuangapac ofrendata cushcamanta

1Chai quipami Davidca tucui tandanacushcacunataca: «Ñuca churi Salomonllatami Diosca acllashca. Paica chairac huambrarac, yuyaitapish manarac alli charinchu, ashtahuanpish chai huasita shayachinaca sinchimi. Chai huasica mana runamanchu, ashtahuanpish Diosmanmi.

2Ñucaca tucui fuerzahuanmi Diospac huasita shayachingapacca curimanta imacunata ruhuachunca curita, cullquimanta imacunata ruhuachunca cullquita, broncemanta imacunata ruhuachunca bronceta, fierromanta imacunata ruhuachunca fierrota, caspimanta imacunata ruhuachunca caspita tandachircani. Shinallatac ónice nishca rumicunatapish, sumaimana rumicunatapish, yanga rumicunatapish, tucuilaya color rumicunatapish, mármol rumicunatapish achcatami tandachishcani.

3Ñuca Diospac huasita shayachinata munashcamantami tucui chaicunata tandachishca jahuapish ñuca quiquinpac huacaichishca curita, cullquita cuni.

4Ofir llactamanta quimsa huaranga talento curitapish cunimi. Diospac huasi ucu quingraicunata jahuata cullquihuan churangapacca canchis huaranga talento ashtahuan alli cullquitami cuni.

5Curimanta imacunata ruhuachunpish curita, cullquimanta imacunata ruhuachunpish cullquitami cuni. Chaicunahuanmi imatapish allita ruhuanata yachaccunaca sumacta ruhuanga. Cunanca, cancunapuramanta ¿pitac quiquin munaihuan Mandac Diosman imallatac cusha ninguichic?» nirca.

6Shina nicpi, familiacunata mandaccunapish, Israel aillucunata mandaccunapish, huaranga soldadota mandaccunapish, patsac soldadota mandaccunapish, jatun mandaccunapish, jatun mandacpac ima charishcacunata cuidaccunapish ima tiyashcata paicunapac munaihuanmi Diosman curcacuna.

7Diospac huasimanca pichca huaranga talentota, chunga huaranga dracma curita, chunga huaranga talento cullquita, chunga pusac huaranga talento bronceta shinallatac pichca huaranga talento fierrotami paicunaca curca.

8Shinallatac sumac rumicunata chariccunapish tucuimi Mandac Diospac huasita allichichun Gersonpac huahua huahuapuramanta Jehielman curca.

9Gentecunaca mana llaquirishpa tucui shunguhuan, Mandac Diosman ofrendata cushcamantami cushicurca.

Shinallatac jatun mandac Davidpish yallitami cushicurca.

David Mandac Diosta alli nishcamanta

10David tucui tandanacushcapac ñaupapi Mandac Diosta alli nishpaca: «¡Ñucanchic ñaupa taita Israelpac Mandac Dioslla, cantaca huiñaita alli nishca cachun!

11Mandac Dioslla, jatun canapish, tucuita ruhuanapi sumaimana canapish, tucui mandanapish, tucuipac alli nishca canapish cambacmi. Jahua pachapi ima tiyashcapish, cai pachapi ima tiyashcapish cambacmi. Mandac Dioslla, tucuita mandanapish cambacmi. Tucuita yallimi cangui.

12Canmi ima charinatapish, cushicuitapish cungui. Canmi tucuita mandangui. Can mandanapish, tucui imata ruhuanapish cambac maquipimi. Jatun yachanapish, sinchiyachinapish cambac maquillapitacmi.

13Chaimantami ñucanchic Dioslla, cambac sumaimana shutitaca alli ninchic.

14Ñucapish, tucui gentecunapish tucui caicunata quiquin munaihuan canman cungapacca ¿imata canchicyari? Caicunaca cambacllatacmi. Canmanta japishcallatatacmi canman cunchic.

15Ñucanchicca cambac ñaupapica tucuimi ñaupa taitacuna shinallatac shuc llactamanta shamushpa, pozashpa causacunchic. Ñucanchic causaica cai pachapica llandu chingaric shina chingarinallami.

16Ñucanchicta Mandac Dioslla, cambac jucha illac shutita alli nina huasita shayachingapacmi caicunata tandachishcanchic. Chaicunataca cambac maquimantami japircanchic. Chaimanta cambacllatacmi.

17Ñuca Dioslla, ñucanchic shungu imalaya cashcata yachashpami cashcata ruhuaccunataca alli ningui. Chaimantami tucui shunguhuan, tucui munaihuan tucui caicunataca curcani. Cunanca caipi tandanacushca can acllashcacunapish, cushicuihuan canman cuctami ricuni.

18Ñucanchic ñaupa taita Abrahampac, Isaacpac, Israelpac Mandac Dioslla, cai alli yuyaicunataca can acllashcacunapac shungupi tucui munaihuan canta servichun huiñaita charingui. Canta yuyarishpa causachun paicunapac shungupi yuyachingui.

19Shinallatac ñuca churi Salomón ima pandata ama ruhuachun alli yuyaita cungui. Shina cucpimi can mandashcacunata, ima shina causanata yachachishcacunatapish, quillcashcacunatapish pactachishpa, ña allichishca cambac huasitapish shayachinga» nirca.

20Chashna nishca quipami tucui chaipi tandanacushcacunataca: «¡Cancunata Mandac Diosta allimari cangui nichicyari!» nirca.

Shina nicpimi, tucui tandanacushcacunaca paicunapac ñaupa taitacunata Mandac Diosta alli nircacuna. Chai quipami Mandac Diospac ñaupapi, jatun mandac Davidpac ñaupapipish cungurishpa cumurircacuna.

Salomón mandai callarishcamanta

21Chai cayandi punzhaca Mandac Diosman animalcunata cushpami huañuchirca. Shinallatac animalcunata Mandac Diosman cushpami tucui rupachirca. Huaranga huagracunata, huaranga cari ovejacunata, huaranga maltón ovejacunatami vinota tallishpa, shinallatac israelcuna cushca achca animalcunatapish Diosman cushpa rupachirca.

22Chai punzhapica Mandac Diospac ñaupapi micushpa, ubiashpami yallita cushicurcacuna. Chai quipami Davidpac churi Salomontaca israelcunata jatun mandac cachun cutin aceitehuan cahuircacuna. Sadoctaca Mandac Diospac cura cachunmi aceitehuan cahuircacuna.

23Chashnami Salomonca paipac taita Davidpac randi Mandac Diospac mandashpa tiyarinapi tiyarirca. Paica tucuipimi alli llucshirca, israelcunapish tucuimi cazurcacuna.

24Tucui mandaccunapish, sinchi runacunapish, jatun mandac Davidpac caishuc churicunapish jatun mandac Salomontaca cazurcacunami.

25Mandac Diosca tucui israelcunapac ñaupapimi Salomontaca yallita jatunyachirca. Ñaupa Israel llactata jatun mandaccunamanta ashtahuan sumac mandac cachunmi Salomonta churarca.

David huañushcamanta(1 R 2.10-12)

26Isaipac churi Davidca chashnami tucui israelcunata mandarca.

27Paica Israel llactataca chuscu chunga huatatami mandarca. Canchis huatataca Hebrón pueblopimi mandarca. Quimsa chunga quimsa huatataca Jerusalenpimi mandarca.

28Paica achca huatacunata causashpa, yuyac cashpami huañurca. Paica tucui alli nishca achca charicmi carca. Pai huañucpica, paipac churi Salomonmi paipac randi mandarca.

29Jatun mandac David callarimanta tucuricaman imata ruhuashcacunaca Dios ricuchishcata huillac Samuel quillcashcapi, Dios ima nishcata huillac Natán quillcashcapi, Dios ricuchishcata huillac Gad quillcashcapimi tiyacun.

30Shinallatac pai ima shina mandashcapish, pai sinchiyashcapish, pai imacunalla tucushcapish, Israel llacta ima tucushcapish, chai cuchulla llactacuna ima tucushcapish chai quillcashcallapitacmi tiyacun.