LUCAS 4 - Biblia Quichua Cañar 2010

Jesusta diablo pandachisha nishcamanta(Mt 4.1-11; Mr 1.12-13)

1Jesusca Jordán yacumantaca Diospac Espíritu jundami cutirca. Diospac Espiritumi shitashca pambaman pusharca.

2Chaipi chuscu chunga punzhata cacpimi, Satanasca pandachisha nirca. Chai punzhacunata mana micushca cashpami, Jesusca yarcachirca.

3Chaipimi Satanasca Jesustaca:

—Can Diospac Churi cashpaca, cai rumita tanda tucuchun niyari— nirca.

4Chashna nicpimi Jesusca:

—Dios quillcachishcapica: “Runaca mana tandallahuanchu causanga” ninmi— nirca.

5Chaimanta Satanasca jatun urcu jahuaman Jesusta pushashpami, shuc ñahui quimllaillapi cai pacha tucui llactacunata ricuchirca.

6Chashna ricuchishpaca:

—Cai tucui sumac llactacunata mandanataca ñucamanmi cushca. Chaimanta ñucaca piman cusha nishpaca cushallami.

7Can ñucata cungurishpa adoracpica, tucui caicunata canmanmi cusha— nirca.

8Chashna nicpimi Jesusca:

—Dios quillcachishcapica: “Canta Mandac Diosllata adorangui, paillata servingui” ninmi— nirca.

9Chaimantaca Satanasca Jesusta Jerusalén puebloman pushashpa, Diosta mañana huasi jahuapi churashpaca:

—Can Diospac Churi cashpaca, caimanta shitari.

10Dios quillcachishcapica:

“Ama huactarichunca,

Diosca paipac angelcunatami

jarcachun cachanga.

11Can ama chaquillatapish

rumipi chugririchunca,

paicunami maquipi chasquinga” ninmi— nirca.

12Shina nicpimi Jesusca:

—Dios quillcachishcapica: “Mandac Diosta, ama pandachisha nichun” ninmi— nirca.

13Satanasca Jesusta pandachisha nicushpapish mana pudishpaca, asha punzhacunacaman saquishpa rircami.

Jesús Galilea llactapi huillai callarishcamanta(Mt 4.12-17; Mr 1.14-15)

14Jesusca Diospac Espiritupac poderhuanmi Galilea llactaman cutirca. Paimantaca tucui llactacunapimi parlanacurca.

15Jesusca israelcuna tandanacuna huasicunapipish yachachircami. Chaimantami tucui gentecuna paitaca “alli yachachicmi” nic carca.

Nazaret pueblopi Jesusta mana crishcamanta(Mt 13.53-58; Mr 6.1-6)

16Jesusca pai huiñashca Nazaret pueblomanmi rirca. Chaipimi utcaman ric cashca shinallatac samana punzhapi israelcuna tandanacuna huasiman yaicurca. Chaipimi Dios quillcachishcata rezangapac shayarirca.

17Pai rezachunca, Dios ima nishcata huillac Isaías quillcashcatami curca. Chaita pascashpa ricushpaca:

18“Ñucaca Diospac Espirituhuanmi cani.

Diosca huacchacunaman

alli huillaita huillachunmi

ñucataca acllashca.

Shungupi llaquilla causaccunata

alliyachichunmi cacharca.

Prezucunata cacharinata huillachun,

ñahui mana ricuccunata ricucta

ruhuachun, llaquichishca

causacuccunata llaquimanta

cacharichichunmi cacharca.

19Chashnallatac Dios quishpichina

punzha chayamushcata huillachunmi,

ñucataca cacharca”

nishcatami rezarca.

20Chai quillcashcata pillushpa huacaichic runaman cushpami, chaipi tiyarirca. Chaipi caccunaca Jesusta ricuracurcami.

21Chaimantami Jesusca:

—Cunanmi, cai cancunapac ñaupapi rezashcaca pactashca— nirca.

22Shina sumacta rimashcamantami, tucui uyaccunaca mancharishpa, Jesusmanta allita rimarcacuna. Chaimantami caishuc chaishuc tapushpaca:

—¿Caica manachu Josepac churi?— ninacurca.

23Chashna nicucpimi Jesusca:

—Maijancunaca: “Jambic runa, canllatac jambiri. Capernaúm pueblopi tucui ruhuashcacunatami uyarcanchic. Cai, can huiñashca llactapipish chashnallatac ruhuaiyari” nicunguichicmi— nirca.

24Shinallatac Jesusca:

—Dios ima nishcata huillactaca, quiquin llactapi causaccunallatacmi mana uyashun nincuna. Chaica chashnatacmi can.

25Elías huillacui punzhacunapica, Israel llactapica, achca viuda huarmicunami tiyarca. Chai punzhacunapi quimsa huata, sucta quillata mana tamyacpica, tucui llactacunapimi yarcai tiyarca. Chaica, chashnatacmi carca.

26Chashna Israelpi achca viuda huarmicuna tiyacpipish, Diosca mana Eliasta ayudachun cacharcachu, ashtahuanpish Sidón pueblo cuchullapi tiyac Sarepta pueblopi causac viuda huarmipacllamanmi cacharca.

27Eliseo huillacui punzhacunapi, Israelpi achca lepra ungüihuan caccuna tiyacpipish, Eliseoca shucllatapish mana alliyachircachu, ashtahuanpish Siria llactamanta Naamanllatami alliyachirca— nirca.

28Chaita uyashpami, tucui tandanacuna huasipi caccunaca yallita piñarirca.

29Chaimantami huaica jatarishpa, Jesusta chai pueblomanta llucchishpa, ucu huaicuta shitangapac aparcacuna. Chai puebloca urcu jahuapimi carca.

30Chashna apacpipish, Jesusca paicunapac chaupillatatacmi rirca.

Jesús supai japishca runata alliyachishcamanta(Mr 1.21-28)

31Jesusca Galilea llacta Capernaúm puebloman rishpami, samana punzhacunapi yachachicurca.

32Jesús poderhuan sinchita yachachicpimi, tucui uyaccunaca mancharishpa saquirirca.

33Israelcuna tandanacuna huasipica, millai supai japishca runami tiyacurca. Chai runa

34caparishpaca:

—Nazaret pueblomanta Jesús, ¿canca imatatac ñucanchictaca nic shamungui? ¿Llaquichingapacchu shamungui? ¡Ñucanchictaca saquilla! Ñucaca canta ricsinimi. Canca Dios cachashca Jucha Illacmi cangui— nirca.

35Chashna nicpimi Jesusca:

—¡Upallai, cai runamanta llucshi!— nirca.

Shina nicpimi, supaica chai runata tucuipac ñaupapi pambaman shitashpa, mana ashtahuan imata ruhuashpa, llucshishpa rircalla.

36Chashna ruhuacpi, chaipi caccunaca:

—Cai runaca, ¿ima shinatac chashna rimarin? ¿Ima poderhuantac supaicunataca rimashpalla llucchishpa cachan?— nishpa tapunacurca.

37Chaimantami tucui llactacunapi Jesusmanta parlanacurca.

Pedropac suegrata Jesús alliyachishcamanta(Mt 8.14-15; Mr 1.29-31)

38Jesusca chai tandanacuna huasimanta llucshishpaca, Simonpac huasimanmi yaicurca. Chaipimi Simonpac suedra fiebrehuan ancha ungushca carca. Chaimantami Jesusta alliyachichun mañarca.

39Jesusca chai ungushcapacman cuchuyashpami, chai ungüita rimarca. Chai ungüi anchuricpimi, alliyashpa, paicunaman micunata cararca.

Jesús achca ungushcacunata alliyachishcamanta(Mt 8.16-17; Mr 1.32-34)

40Ña inti tigracucpimi, tucuilaya ungüicunata Jesuspacman apamurca. Jesusca tucui ungushcacunapac uma jahuapi maquita churashpami alliyachirca.

41Achca runacunamantami supaicunaca llucshirca. Chai supaicuna llucshishpaca:

—¡Canca Diospac Churimi cangui!— nishpami caparirca.

Chaimantami Jesusca:

—¡Upallaichic!— nirca.

Cristo cashcata yachashcamantami, supaicunataca mana imata rimachun saquirca.

Jesús Galilea llactapi huillashcamanta(Mr 1.35-39)

42Jesusca ña achicyamucucpimi, chaimanta llucshishpa, shitashca pambaman rirca. Chaimantami gentecuna mashcashpa, Jesús maipi cashcaman chayashpaca, ama maiman richun jarcanata munarca.

43Ashtahuanpish Jesusca:

—Ñucaca shuctac pueblocunapipish Dios mandacucmanta alli huillaitaca huillagrinami cani. Chashna huillachunmi, Diosca cacharca— nirca.

44Chashnami Jesusca Galilea llacta tandanacuna huasicunapi huillashpa purirca.