2 SAMUEL 23 - Biblia Quichua Cañar 2010

Davidpac tucuri shimicunamanta

1David rimashca tucuri

shimicunaca caicunami:

Davidca Isaipac churimi,

Dios allipi churashca runami.

Jacobopac Diosmi paitaca,

paipaclla cachun,

aceitehuan cahuirca.

Israelpurapica, sumacta cantacmi.

2Paimi cashna cantarca:

Mandac Diospac Espiritumi,

ñucata rimachirca.

Pai rimashca shimicunaca,

ñuca callupimi.

3Israelcunapac Diosmi rimarca.

Israelcunapac sinchi

rumi shina Diosca:

“Cashcata ruhuashpa,

llactata mandacmi tiyanga.

Paica Diosta mañashpami

allita mandanga.

4Tutamanta puyu illacpi,

inti llucshishpa achicyachic

shinami canga.

Allpapi quihuata sumacta huiñachic,

tamya shinami canga” nirca.

5Ñuca familiacunaca Diospimi,

sinchita cancuna.

Ñucaman huiñaipac ari nishpami,

tucuita sumacta allichishpa,

sinchita ruhuarca.

Ñucataca tucuimantami quishpichin,

ñuca ima munashcatapish,

tucuitami pactachin.

6Ashtahuanpish millaita ruhuaccunaca

cashata shitashca shinami.

Chaicunataca maquihuanca,

pipish mana japinchu.

7Maijanpish japisha nishpaca,

fierrohuan mana cashpaca,

lanzahuanmi japinga.

Chaimantaca,

chaillapitac rupachishpami

tucuita chingachinga.

Davidpac quimsa yalli sinchi runacunamanta(1 Cr 11.10-47)

8Davidpac sinchi runacunapac shuticunaca caicunami: Tacmonitapuramanta Joseb-basebetmi carca. Paica quimsa ashtahuan sinchi runacunata mandacmi carca. Paimi shuc macanacuipica pusac patsac runacunata lanzahuan huañuchirca. Chaimantami paitaca Adino-eznita niccuna carca.

9Paipac quipaca ahohitapuramanta Dodopac churi Eleazarmi carca. Paimi Davidpac quimsa sinchi runacunapuramanta shucca carca. Paica filisteocuna Davidhuan macanacungapac tandaricpica Davidhuanmi carca. Chai macanacuipimi israelcunaca manchashpa callparca.

10Chaipimi paica filisteocunataca maqui shaicungacaman huañuchirca. Chashna yallita huañuchicucllapitacmi maqui huañushpa espadaca maquipi llutarishpa saquirirca. Chai punzhami Mandac Diosca jatun macanacuita mishachirca. Chashna ruhuacpimi, israelcunaca Eleazarpac huashata ima tiyashcata japingapaclla rirca.

11Paipac quipaca araritapuramanta Agepac churi Samami carca. Filisteocunaca Lehi pueblo ladopi lenteja chagra pambapimi macanacungapac tandanacurca. Cutin israelcunaca filisteocunata manchashpami callpashca carca.

12Shina callpacpipish, paica chai lenteja chagra chaupipimi macanacushpa filisteocunata atirca. Chashnami Mandac Diosca chai macanacuita mishachirca.

13Quimsa chunga mandaccunapuramanta quimsa runami Adulam machaiman Davidhuan tupangapac urai rirca. Chai punzhacunaca cosecha callari punzhacunami carca. Cutin filisteocunaca Refaim pambapimi carpacunata shayachishpa tiyacurca.

14Davidca miticuna pirca huashapimi alli miticushpa tiyacurca. Cutin filisteocunapac macanacuc shuc parte runacunaca Belén pueblopimi carca.

15Chaipi David yacunayaihuan cashpaca: «¡Belén pueblo yaicunapi tiyac jundumanta yacuta apamushpa, ñucaman ubiachishpachari alli canman!» nirca.

16Shina nicpimi, chai quimsa sinchi runacunaca filisteocunapac carpacunaman rishpa, Belén pueblo yaicunapi tiyac jundumanta yacuta llucchishpa Davidman apamurca. Shina apacpipish, Davidca mana ubiasha nishpami, Mandac Diosman cushpa:

17«Cai runacuna huañunatapish mana manchashpa apamushca yacuca paicunapac yahuar shinami. ¡Mandac Dioslla, cai yacuta ubianataca jarcayari!» nirca. Chashna nishpami, mana ubiasha nirca. Chai yacutaca chai quimsa sinchi runacunami apamurca.

Davidpac quimsa chunga sinchi runacunamanta

18Chai quimsa chunga sinchi runacunata mandacca Sarviapac churi Joabpac huauqui Abisaimi carca. Paimi quimsa patsac runacunata lanzahuan huañuchirca. Chaimantami paica chai quimsa chunga sinchi runacuna shinallatac mai alli nishca carca.

19Paimi chai quimsa chunga sinchi runacunamanta ashtahuan alli nishca carca. Shina cashpapish, mana chai quimsa sinchi runacuna shinachu carca.

20Chai quipaca Joiadapac churi Benaiasmi carca. Paica Cabseel pueblomanta jatun mancharinacunata ruhuac runapac churimi carca. Paimi Moab llactamanta Arielpac ishcai churicunata huañuchirca. Paillatacmi shuc rasu punzhapi jutcuman rishpa leoncunata huañuchirca.

21Paillatacmi egipciopuramanta shuc jatun runatapish huañuchirca. Chai Egipto runaca lanzahuanmi carca. Shina cacpipish, Benaiasca shuc caspihuan llucshishpami lanzata quichushpa, chai lanzallahuantac huañuchirca.

22Chashna ruhuashpami Joiadapac churi Benaiasca chai quimsa sinchi runacuna shinallatac mai alli nishca tucurca.

23Paica caishuc quimsa chunga runacuna shinallatacmi alli nishca carca. Shina cashpapish mana chai quimsa sinchi runacuna shinachu carca. Paitami Davidca paita cuidac soldadocunata mandachun churarca.

24Chai quimsa chungapurapica Joabpac huauqui Asaelpish, Belén pueblomanta Dodopac churi Elhananpish,

25Harod pueblomanta Samapish, shinallatac Elicapishmi carca.

26Paltitapuramanta Helespish, Tecoa pueblomanta Iquespac churi Irapish,

27Anatot pueblomanta Abiezerpish, Husa pueblomanta Mebunaipishmi carca.

28Ahohitapuramanta Salmonpish, Netofa pueblomanta Maharaipish,

29Netofa pueblollamantatac Baanapac churi Helebpish, Ribaipac churi Itaipishmi carca. Paica Benjaminpac huahua huahuacuna causana Gabaa pueblomantami carca.

30Piratón pueblomanta Benaiaspish, yacu tucyacuc Gaasmanta Hidaipish,

31Arba pueblomanta Abi-albonpish, barhumitapuramanta Azmavetpishmi carca.

32Saalbon pueblomanta Eliabapish, Jasenpac churicunapuramanta Jonatanpish,

33araritapuramanta Samapish, hararitapurallamantatac Sararpac churi Ahiampishmi carca.

34Chashnallatac Maacapac churimanta, Ahasbaipac churi Elifeletpish, gilonitapuramanta Ahitofelpac churi Eliampishmi carca.

35Carmel pueblomanta Hezraipish, arbitapuramanta Paaraipish,

36Soba pueblomanta Natanpac churi Igalpish, gatitapuramanta Banipish,

37amonitapuramanta Selecpish, Beerot pueblomanta Sarviapac cari huahua Naharaipishmi carca. Paica Joabpac escudota apacmi carca.

38Jatir pueblomanta Irapish, Garebpish,

39heteopuramanta Uriaspishmi carca. Tucuica quimsa chunga canchismi carca.