2 SAMUEL 17 - Biblia Quichua Cañar 2010

Husaipish, Ahitofelpish yuyaita cushcamanta

1Chai quipami Ahitofelca Absalontaca:

—Cunanca, ñucaca chunga ishcai huaranga runata acllashpami cunan tutallatac jatarishpa, Davidta catishpa rigrini.

2Paitaca shaicushca, mana micushca cacpimi, japishpa manchachisha. Shina paita manchachicpimi, paihuan cac gentecunaca miticushpa callpanga. Chashna callpacpimi, jatun mandactaca huañuchisha.

3Shina ruhuashpami, tucui gentecunata cambacman cutichimusha. Canca shuc runa huañuchunllami munangui. Paicuna cutimucpimi, gentecunaca cushilla causanga— nirca.

4Chashna nishcaca Absalonmanpish, israelcunata mandac tucui runacunamanpish allimi carca.

5Chai quipami Absalonca:

—Cunanca, arquitapuramanta Husai ima nishcata uyangapac, pai imata ruhuachun nishcata ruhuangapac cayamuichic— nirca.

6Absalonpacman Husai chayamucpica:

—Ahitofelca chashnami yuyaita cushca. ¿Pai nishcataca ruhuashunchu? Can imatapish ni— nirca.

7Shina nicpimi, Husaica Absalontaca:

—Cunan, Ahitofel yuyaita cushcaca mana allichu— nirca.

8Husaica caitapish nircami:

—Cambac taitapish, paipac runacunapish sinchi cashcataca canllatac yachanguimi. Cunancarin huahuacunata quichucpi, mama oso piñaric shinami canga. Chai jahuapi cambac taitaca macanacunata alli yachacmi. Chaimanta mana cunan tutaca gentecunahuan chaipi pacaricungachu.

9Cunanllatacmi paica mai jatun jutcupi, mana cashpaca mai shuctac ladopi miticushca canga. Macanacui callaricpi, cambac gentecuna maijancuna huañucpica, chaita maijan yachashpaca: “Absalonpac gentecunaca huañushcami” ningacunami.

10Chaita uyashpaca, león piñaric shina shunguta charic sinchi runapish yallita manchashpa, yuyai illac shinami saquiringa. Tucui israelcunami cambac taita alli sinchi cashcata, paipac runacunapish macanacunata alli yachac cashcata yachancuna.

11Ñucaca Dan pueblomanta callarishpa, Beerseba pueblopi causaccunacaman tucui israelcunata tandachishpa, mama cucha tiyu shina achcata pushashpa canllatac macanacungapac llucshichunmi yuyaita cuni.

12Chashna llucshishpami, pai maipi cacpipish, páramo urmac shina paita japishun. Shina japishpami paitapish, paipac runacunatapish tucui huañuchishpa, shucllatapish mana saquishun.

13Maijan pueblopi miticucpica, tucui israelcunami huascacunahuan rishpa, paicunata aisashpa jatun yacupi shitashun. Shina shitacpimi, shuc rumillapish mana saquiringa— nirca.

14Shina nicpimi, Absalonpish tucui israelcunapish rimashpaca: «Arquitapuramanta Husai cushca yuyaimi Ahitofelpac yuyaita atishpa, ashtahuan alli» nirca.

Mandac Diosca Absalonta llaquichingapacmi Ahitofel cushca yuyaita yangapi churachun chashnaca rimachirca.

15Chai quipami Husaica Sadoc, Abiatar curacunataca: «Ahitofelca Absalonmanpish, israelcunata pushac yuyaccunamanpish cashna chashna yuyaitami cushca. Ashtahuanpish ñucaca cashnami yuyaita curcani.

16Chaimanta Davidpacman pacalla huillaccunata cachashpaca: “Jatun mandactapish, cambac runacunatapish ama huañuchichunca ama cai shitashca pambapi pacarichu. Utcashpa Jordán yacuta pasashpa ri” nichun cachai» nirca.

17Jonatanpish, Ahimaaspish, Jerusalenman ima shina mana cutimui pudishpami Rogel yacu ladopi carca. Paicunamanca shuc servic huarmimi huillac shamuna carca. Cutin chaitami paicunaca jatun mandac Davidmanca huillagrina carca.

18Chashna huillangapac ricta shuc huambra ricushpami, Absalonman huillagrirca. Chaimantami paicunaca callpashpa Bahurim pueblopi causac shuc runapacman chayarca. Chaiman chayashpaca huasi pungupi yacuta llucchingapac allashca shuc jutcupimi miticurca.

19Chai huasipi causac runapac huarmica shuc tapata churashpami, chai jahuataca shuc pañota tendishpa, chaipac jahuapica trillashca granota tendirca. Chaipi cactaca pipish mana yacharcachu.

20Chai quipa Absalonta serviccuna chai huarmipac huasiman chayashpaca:

—¿Ahimaaspish, Jonatanpish maipitac?— nishpa tapurca.

Shina tapucpimi chai huarmica:

—Ñami yacu junduta pasarcacuna— nirca.

Shina nicpimi, paicuna mashcashpapish mana tarishpa, Jerusalenman cutirca.

21Paicuna ña rishca quipa, yacuta llucchina jutcumanta llucchishpa yallita callpashpa, rishpami jatun mandac Davidtaca: «Jatarishpa Jordán yacuta utca pasashpa ri. Ahitofelca cancunata huañuchichunmi yuyaita cushca» nirca.

22Shina huillacpimi, Davidpish, paihuan cac gentecunapish Jordán yacuta tucui mashna pasarca. Cayandi achicyangacamanca shucllapish mana saquirishpami tucui pasarca.

23Ashtahuanpish Ahitofelca pai yuyaita cushcata mana ruhuacpimi, paipac burrota parejashpa montashpa pai huacharishca pueblopi tiyac huasiman rirca. Paipac familia imata ruhuana cashcata ña allichishca quipaca sipirishpami huañurca. Pai huañucpica, paipac taita enterrashcallapitac enterrarca.

24Davidca Mahanaim pueblomanmi chayarca. Shinallatac Absalonca tucui israelcunandimi Jordán yacuta pasarca.

25Absalonca Joabpac randica Amasatami paipac soldadocunata mandac cachun churarca. Amasaca israelpura Itrapac churimi carca. Paitaca Itrami Nahaspac ushi Abigailpi charishca carca. Paica Joabpac mama Sarviapac ñañami carca.

26Absalonhuan cac israelcunaca Galaad llactapimi carpacunata shayachishpa tiyarirca.

27Mahanaim puebloman David chayashca quipami Amón llacta Rabá pueblopi causac Nahaspac churi Sobipish, Lodebar pueblopi causac Amielpac churi Maquirpish, Galaad llacta Rogelim pueblopi causac Barzilaipish tupangapac llucshircacuna.

28Paicunaca Davidmanpish, paipac gentecunamanpish camacunata, vasocunata, mangacunata shinallatac trigota, cebada camchata shinallatac harinata, habasta, lentejata,

29bunga mishquita, leche cuajadata, vaca quesota, ovejacunatapish apamurca. Paicunaca: «Gentecunaca shitashca pambapica yarcaihuan, yacunayaihuanmi canga» yuyashpami micuchun apamurca.