DEUTERONOMIO 13 - Biblia Quichua Cañar 2010

1Cancunapuramanta maijan shuc huillac, mana cashpaca shuc muscuc runa jatun mancharinacunata, mana ricushcacunata muscungami. Chai muscushcacuna pai nishca shina pactacpica:

2“Shuctac dioscunata catishunchic. Cancuna mana ricsishca dioscunata servishunchic” ningami.

3Shina nicpipish, ama chai huillac nishcata, chai muscuc muscushcata uyanguichicchu. Ashtahuanpish Mandac Diosmi paita tucui shunguhuan, tucui almahuan cuyac cashcata ricungapac chaita ruhuachinga.

4Mandac Diosllata catinguichic. Paita manchanguichic. Pai ima nishcata uyashpa, pai mandashcacunata pactachinguichic. Paillata servishpa catinguichic.

5Ashtahuanpish chai huillac, mana cashpaca muscuc runaca cancuna Egiptopi huatashca shina causacucpi, llucchic Mandac Diospac contra huillashcamantaca huañuchishcami canga. Chai huillacca cancunata Mandac Dios ima shina causachun yachachishcamanta anchuchishpami pandachisha ninga. Chashna huañuchishpami cancunapac chaupimanta millaita anchuchinguichic.

6Cancunapac huauqui, cancunapac churi, cancunapac ushi, cancunapac cuyashca huarmi, mana cashpaca, cancunapac mai ricsishca: “Canpish, cambac taitacunapish mana ricsishca shuctac dioscunata,

7cai cuchullapi, carupi, cai llacta muyundipi, ashtahuan caru muyundipi causaccunapac dioscunata jacu servishun” ningami.

8Paicunataca mana uyanachu canguichic, mana ricunachu canguichic. Ama llaquinguichicchu, paicunamantaca amatac shungupi nanaringuichicchu. Shinallatac paicunata ricushpa, ama upalla saquiringuichicchu.

9Ashtahuancarin huañuchinatacmi cangui. Huañuchingapac japishpaca canracmi rumihuan shitana cangui. Quipataca tucui gentecunami rumihuan shitashpa huañuchina can.

10Chai runaca cancuna Egipto llactapi huatashca shina causacucpi, llucchic Mandac Diosmanta caruyachishcamantaca huañuchishcami canga.

11Caita tucui israelcuna uyashpaca, manchashpami cancunapac chaupipi chashna mana allitaca ña mana ruhuangacuna.

12Mandac Dios cushca llactacunamanta

13Diosta mana manchac maijan runacunami cancunapac chaupimanta llucchishpa, cancunapac llactapi causaccunataca: “Cancuna mana ricsishca shuctac dioscunata jacuchic servishun” nicun nishcami uyaringa.

14Chashna uyaricpica, allita yachangacaman tapushpa puringuichic. Paicuna chashna millana mana allita cancunapac chaupipi ruhuashca cacpica,

15tucui chai llactapi causaccunata espadahuan huañuchinguichic. Shinallatac chai llactapi ima tiyashcatapish chingachishpami, animalcunatapish espadahuan huañuchina canguichic.

16Tucui chaipi japishcacunataca plazapi tandachishpa, chai japishcacunandi, Mandac Diosman cuc shina rupachinguichic. Chashnami chai llactaca huiñaita rumi montón shina tucushpa, jaicapi mana cutin shayachishca saquiringa.

17Chaipi tiyashcacunataca Mandac Dios tucuchingapac chicanyachishca cashcamanta ama japinguichu. Chashna mana japicpimi, Mandac Diosca mana nina japiric shina mana piñanga. Shinallatac cancunapac taitacunata cuyashpa cusha nishcatapish pactachinga.

18Mandac Dios rimashcata uyashpa, cunan ñuca yachachishca mandashcacunata cazunguichic. Chashnami Mandac Diospac ñaupapi cashcata ruhuanguichic.