1Judá llactata Josiaspac churi Joacim chuscu huatata mandacucpimi, Mandac Diosca Judá llactapi causaccunamanta Jeremiasman huillarca. Chai huatapimi jatun mandac Nabucodonosorca Babilonia llactata mandai callarirca.
2Dios ima nishcata huillac Jeremías Judá llactapi causaccunamanpish, Jerusalenpi causaccunamanpish huillashpaca:
3«Amonpac churi Josías Judá llactata chunga quimsa huatata mandacui punzhacunamanta cunan punzhacamanmi Mandac Diosca caita huillarca. Chashnami utcamanta pacha ishcai chunga quimsa huatata huillacurcalla. Chashna mana shaicushpa huillacucpipish, cancunaca mana uyasha nircanguichicchu.
4Mandac Dios pai ima nishcata huillaccunata tauca cutin cancunapacman cachacpipish, mana uyasha nishpami causarcanguichic.
5Chai huillaccunaca: “Mana alli causaita, millaita ruhuanata saquishpa, Mandac Diospacman cutirishpa, cancunamanpish, cancunapac ñaupa taitacunamanpish pai cushca llactapi huiñaita causaichic.
6Shuctac dioscunata ama catichicchu. Chai dioscunata servishpa, paicunapac ñaupapi ama cumuringuichicchu. Cancunapac maquihuan ruhuashca dioscunata servishpa, Mandac Diosta ama piñachichicchu. Cancuna tucui chaicunata cazucpica, mana llaquichingachu” nircami.
7Shina huillacpipish, mana uyashpami, cancunapac maquihuan ruhuashca dioscunata servishpa, ñucata yallita piñachircanguichic. Chaitaca Mandac Dios ñucami nini.
8Chaimantami tucuita Mandac Diosca: Ñuca rimashcata mana uyashcamantaca,
9cai llactatapish, caipi tucui causaccunatapish, cai muyundi llactacunatapish llaquichichunmi jahua llactapi causaccunata, Babilonia llactata jatun mandac ñucata servic Nabucodonosorta cachasha. Chashna cachashpami tucuita tucuchisha. Paicunataca huiñaita tucuipac mancharina, burlanatami ruhuasha.
10Paicunapurapica cushicushpa asinapish, cantanapish, cushicuihuan caparinapish, noviocuna, noviacuna cushicushpa cantanapish mana tiyangachu. Cutana rumi huacashcapish mana uyaringachu. Luzpish mana tiyangachu.
11Tucui cai llactami manchaipac shitashca pamba canga. Cai llactapi causaccunaca canchis chunga huatatami Babilonia llactata jatun mandacta servinga.
12Canchis chunga huata tucucpimi, Babilonia llactata jatun mandactapish, chai llactapi causaccunatapish, caldeocunatapish paicuna mana allita ruhuashcamanta llaquichishpa, huiñaita shitashca pambata shina saquisha.
13Chai llactataca ñuca huillashca shina, tucui shuctac llactacunatapish llaquichingapac cai libropi quillcashcata Jeremías huillashca shinallatacmi llaquichisha.
14Babilonia llactapi causaccunatapish shuctac llactacuna, jatun mandaccuna servichishpa llaquichingami. Paicuna mana allita ruhuashca shinallatac, paicunatapish llaquichisha» ninmi.
Shuctac llactacunata llaquichinamanta15Israelcunata Mandac Diosca: «Ñuca yallita piñarishca vino copata ñuca maquimanta japishpa, ñuca canta cachashca llactacunapi causaccunaman ubiachi.
16Chaita ubiashpaca huañuchiccunata ñuca chai llactaman cachacpimi, manchaihuan chucchushpa yuyaita chingachinga» nirca.
17Shina nicpimi, Mandac Diospac maquimanta chai copata japishpa, pai cachashca llactacunapi causaccunaman ubiachun curcani.
18Chashnami Jerusalenpipish, Judá llactacunapipish apashpa, jatun mandaccunaman, caishuc mandaccunaman ubiachun curcani. Chashna cucpimi, cunan shinallatac pipish mana cazushca, burlashca, mana alli nishca saquirirca.
19Shinallatac Egipto llactata jatun mandac Faraonmanpish, pai churashca mandaccunamanpish, paita serviccunamanpish, paipac tucui gentecunamanpish ubiachun curcanimi.
20Shinami chaipi causac shuctac llacta gentecunamanpish, Uz llactata jatun mandaccunamanpish, Filistea llactapi tiyac Ascalón, Gaza, Ecrón llactacunata jatun mandaccunamanpish, Asdod llactapi saquirishca maijan gentecunamanpish,
21Edom, Moab, Amón llactapi causaccunamanpish curcani.
22Tiro, Sidón llactacunata jatun mandaccunamanpish, mama cucha ladopi tiyac tucui llactacunata jatun mandaccunamanpish curcanimi.
23Dedán, Tema, Buz aillucunamanpish, ñahui millmata ruturic runacunamanpish curcanimi.
24Arabia llactata jatun mandaccunamanpish, shitashca pambapi causac chican chican runacunata jatun mandaccunamanpish curcanimi.
25Zimri, Elam, Media llactacunata jatun mandaccunamanpish curcanimi.
26Jahua llacta jatun mandaccunamanpish, cuchullapi causaccunamanpish, carupi causaccunamanpish, tucui cai pacha mandaccunamanpish curcanimi. Paicunapac quipaca Babilonia llactata jatun mandacmi ubianga.
27Canca: “Israelcunapac tucuita Mandac Diosca: Caita ubiashpa, macharishpa arcadashpa urmaichic. Jatun macanacuita llaquichichun ñuca cachacpimi, mana jataringuichic” ninmi ningui.
28Cambac maquimanta chai copata japishpa mana ubiasha nictaca Mandac Diosca: “Ubianatacmi canguichic.
29Chaica, ñuca shutita mañac llactataracmi llaquichi callarircani. Cancunaca chai llaquimanta, ¿quishpirishunmi yuyanguichicchu? ¡Cai llaquimantaca mana quishpiri pudinguichicchu! Tucui cai pachapi causaccunatami jatun macanacuita cachashpa llaquichigrini” ninmi. Chaitaca tucuita Mandac Dios ñucami nini.
30Can Jeremías paicunaman huillashpaca:
“Mandac Diosca jahuamantami
caparishpa shamunga.
Pai causacuc jucha illac
huasimantami sinchita rimanga.
Pai acllashcacunata piñashpami
caparishpa shamunga.
Cai llactapi causaccunataca
caparishpa uvasta saruc
runa shinami ruhuanga.
31Pai piñarishpa culun nishcaca
cai pacha tucuricamanmi uyaringa.
Mandac Diosca tucui cai pachapi
causaccunapac Juez cashpami,
tucui llactapi causaccuna
imata ruhuashca shinallatac
llaquichinga.
Paita mana manchaccunataca
huañuchiccunamanmi cusha.
Chaitaca Mandac Dios ñucami nini”
ninmi ningui» nirca.
32Tucuita Mandac Diosca:
«Llaquica llacta llactami ringa.
Cai pacha tucurimantami
acapana huaira jataringa» ninmi.
33Chai punzhapica Mandac Dios
huañuchishcacunaca tucui cai
pachapimi shuc ladomanta caishuc
ladocaman shitashca siricunga.
Chai huañushcacunamantaca
pipish mana huacangachu,
mana tandachingachu,
mana enterrangachu.
Chai huañushcacunaca
cai allpapica huanumi tucunga.
34¡Michiccuna yallita
llaquirishpa huacaichicyari!
¡Achca ovejacunata shina,
sinchita mandaccuna,
llaquirishpa ñuto allpapi
singüichicyari! Chaica,
cunan punzhami cancunapac cungata
pitinapish, caita chaita
cachanapish pactashca.
Sumac vasota paquic shinami
tucuchinga.
35Michiccunapish mana miticuna
pushtuta charingachu.
Mandaccunapish mana
quishpiri pudingachu.
36¡Michina pambacunata tucuchicpica,
michiccunapish, mandaccunapish
yallita caparishpami uyaringa!
37Mandac Dios yallita piñarishpami,
sumac michina pambacunataca
tucuchinga.
38Mandac Dios yallita piñarishpa
llaquichicpi, paicunapac llactata
llaquinayaita tucuchicpimi,
huahua león paipac jutcuta
shitashpa ric shina,
llactata shitashpa rirca.
Who We AreWhat We EelieveWhat We Do
2025 by iamachristian.org,Inc All rights reserved.
