1Mandac Diosca Jacobopac huahuacunata cutin llaquishpami, israelcunataca paipaclla cachun acllanga. Shina ruhuashpami, quiquin llactallamantac cutichimushpa samachinga. Shuc llactamanta shamushcacunapish Jacobopac huahuacunahuan tandanacungami.
2Shuctac llactapi causaccunami paicunataca Israel llactaman pushamunga. Chashna shamucpimi, israelcunaca caricunatapish, huarmicunatapish Mandac Diospac llactapi servicta ruhuanga. Chaipimi paicunata prezuccunatapish prezunga. Paicunata utcapi llaquichiccunatapish llaquichinga.
3Mandac Dios israelcunata nanaimantapish, yalli llaquimantapish, llaquita servichishpa causanamantapish samachi punzhapi,
4Babilonia llactata jatun mandacta burlashpaca:
«¡Saruc shina llaquichic runaca
imami tucushca!
¡Pitapish mana uyac cari tucushca
runaca imami tucushca!
5Mandac Diosmi paita
mana manchaccunapac varatapish,
mandaccunapac taunatapish paquishca.
6Paicunaca yallita piñarishpami,
chugrichishpa llaquichic carca.
Llactacunapi causaccunatapish
yallita piñashpami sinchita mandacurca.
Ashallatapish mana llaquishpami,
catipi llaquichic carca.
7Cunanca, tucui cai pachapi
causaccunami imatapish mana manchashpa,
Mandac Diosta alli nishpa,
cushilla causan.
8Líbano urcu ciprés yuracunapish,
cedro yuracunapish yallita
cushicushpaca:
“Can huañushcamanta pacha,
pi ñucanchictaca mana pitingapac
huichai shamunchu” ninga.
9Canta ricushpaca
Seol ucupish cuyurircami.
Canhuan tupachunmi,
huañushcacunatapish ricchachirca.
Cai pachapi tucui mandaccunatapish,
jatun mandaccunatapish mandashpa
tiyarinamanta jatarichircami.
10Tucui paicuna caparishpaca:
“¿Canpish ñucanchic shinallatac
irquiyashpa, ñucanchic
shinallatac tucurcangui?” ninmi.
11Canca alli nishca cashpapish,
arpacunapi tocac cashpapish
Seolmanmi urai shamushcangui.
Caipica cambac cama shinaca curucunami.
Cutin cata shinaca cuicacunami.
12¡Tutamanta llucshic lucero shina
cashpapish, ima shinatac
jahua pachamanta urmarcanguiyari!
Canca llactacunata mandashpa
irquiyachic cashpapish,
allpaman shitashcami cangui.
13Cambac shungupica:
“Jahua pachaman rishpami,
Diospac lucerocunapac ladopi
ñuca mandashpa tiyarinataca churasha.
Dios-huan tandanacuna urcupimi,
jahua ladoman tiyarisha.
14Puyuta pasashpami
ashtahuan jahuaman risha.
Chaipi tiyarishpaca
jahua pachapi causacuc
Dios shinami casha” yuyacurcanguimi.
15Ashtahuanpish cantaca
Seol ucumanmi shitarca.
16Can chaipi cacta ricuccuna
cumurishpa chapashpa,
shungupi yuyarishpaca:
“¿Paichu cai pachapi causaccunata
chucchuchishpa, llactacunata
mandaccunata tucuchic runaca?
17¿Paichu tucui llactacunata
shitashca pambata shina saquishpa,
tucui llactacunata tucuchishpa,
carcelcunatapish mana pascac
runaca?” ninga.
18Tucui jatun mandaccunami
paicunaman chicanyachishca enterrana
jutcullapi enterrarishca.
19Ashtahuanpish canca enterrana
jutcumantapish caruman
shitashcami cangui.
Cambac cuerpotaca millashpa,
sarunacushpami espadahuan
huañuchishcapac churanata shina
shitashca cangui.
20Canca, cambac llactapi
causaccunallatatac tucuchishcamanta,
cambac gentecunallatatac
huañuchishcamantaca mana caishuc
jatun mandaccunahuan
pacta enterraringuichu.
Mana allita ruhuaccunapac
huahua huahuacunataca
manatac yuyarishcachu canga.
21Taitacuna yalli mana allita
ruhuashcamantaca
cancunapac churicunata
huañuchina pushtuta allichichic.
Pacta cutin macanacungapac jatarishpa,
llactacunata japishpa,
cai pachapi tiyac llactacunapi
jundanman» ninguichic.
22Tucuita Mandac Diosca:
«Ñuca jatarishpami
Babiloniataca chingachisha.
Maijan huahuacunapacpish,
nietocunapacpish shuti ama ashtahuan
tiyachunmi tucuchisha.
23Chai llactapica
erizo animalcuna causana,
yalli yacu allpacunatami ruhuasha.
Tucuita tucuchic pichanahuan
pichashpami tucuchisha.
Chaitaca tucuita Mandac Dios
ñucami nini» nirca.
Asiria llacta llaqui tucunamanta24Tucuita Mandac Dios ari nishpaca:
«Ñuca yuyarishcataca ruhuashatacmi.
Imata ruhuanata yuyarishcataca
pactachishatacmi.
25Asiria llacta runacunataca
ñuca llactapimi huañuchisha.
Ñuca urcucunapimi
sarushpa tucuchisha.
Shinami ñuca gentecunamanta
yugota anchuchisha.
Aparishca llashac quipitapish
anchuchishami.
26Cai pachata llaquichingapacmi
ña yuyarircani.
Tucui llactacunata llaquichingapacmi
maquita chutashca cani» nirca.
27Tucuita Mandac Diosmi
chashna ruhuanata yuyarishca.
Chaitaca, ¿pitac jarcai pudingayari?
Paipac maqui alzashcataca,
¿pitac jarcangayari?
Filistea llaqui tucunamanta28Jatun mandac Acaz huañushca huatapi Mandac Dios Isaiasta rimashpaca:
29«Tucui Filistea llactapi causaccuna
llaquichic varata paquishcamantaca
ama cushicuichicchu.
Culebrapac huahua huahuacunamantaca
shuc millai culebrami llucshinga.
Chai culebramantaca
volac culebrami llucshinga.
30Huacchacunapac punta huahuacunaca
micunata charingami.
Imata mana charic huacchacunaca
samaringami.
Ashtahuanpish cambac huahua
huahuacunataca
yarcaihuanmi huañuchisha.
Maijan saquirishcacunatapish
tucuitami tucuchisha.
31¡Llacta pungupi cuidaccuna
huacaichicyari!
¡Llactapi causaccunapish
sinchita caparichicyari!
Jahua lado llactamantaca
yana cushnimi llucshin.
Tucui Filistea llactapi causaccunami
yacuyac shina tucurigringuichic.
Chai amsamantaca shucllapish
mana puchungachu.
32Llacta huillaccuna tapucpica,
¿imatatac nishun?
Chaica: Mandac Diosmi
Sión urcutaca churarca.
Chaipimi llaquilla causac
pai acllashcacunaca miticunga
ninami canga» nirca.
Who We AreWhat We EelieveWhat We Do
2025 by iamachristian.org,Inc All rights reserved.
