1Davidca Ramá pueblopi cac Naiot pambamanta miticushpa Jonatanpacman shamushpaca:
—Cambac taita ñucata huañuchisha nichunca, ¿ñucaca imatatac ruhuashcaniyari? ¿Ima mana allitatac ruhuashcaniyari? ¿Mana cashpaca ima juchatatac ruhuashcaniyari?— nirca.
2Shina nicpimi Jonatanca:
—¡Riqui, canca manatac huañunguichu! Ñuca taitaca jatun ruhuaita cashpa, uchilla ruhuaita cashpapish ñucaman mana huillashpaca mana ruhuangachu. ¿Ima nishpatac caitaca ñuca taitaca upalla tucunyari? Mana chashnachu canga— nirca.
3Shina nicpimi Davidca:
—Cambac taitaca canhuan ñucahuan alli apanacuctaca allimi yachan. Chaimantami: “Jonatán ama llaquirichunca mana huillasha” nishca canga. ¡Mandac Diospac shutipi, cambac shutipimi nini!: Ñuca huañuica ñuca ñaupallapimi— nirca.
4Shina nicpimi, Jonatanca Davidtaca:
—Shinashpaca ¿imatatac canmantaca ruhuachun ningui?— nirca.
5Chashna nicpimi Davidca Jonatantaca:
—Riqui, cayaca llullu quillami. Ñuca jatun mandac-huanmi micungapac tiyarina cani. Ashtahuanpish canca quimsa punzhacaman pambapi ñuca miticugrichun saquingui.
6Cambac taita ñucata tapucpica: “Paipac tucui familiacunami Belén pueblopi Diosman animalta cushpa huañuchishpa huatanta fiestata ruhuanata yachan. Chai puebloman ringapacmi ñucata saqui” nishpa mañarca ningui.
7Cambac taita: “Shina cashpaca allimi” nicpica, canta servic ñucaca cushillami casha. Ashtahuanpish pai piñaricpica, huañuchingapac cashcatami yachangui.
8Canta servic ñucata llaquingui. Canta servic ñucahuan alli apanacuc cangapacmi Mandac Diospac ñaupapi ari nircangui. Ima mana allita ñuca ruhuashca cacpica, canllatac huañuchi. ¿Imapactac cambac taitapacmanca pushacungui?— nirca.
9Shina nicpimi Jonatanca:
—¡Ama chashna yuyaichu! Ashtahuanpish ñuca taita huañuchishatac nicushcata yachashpaca ¿Manachu huillaiman?— nirca.
10Shina nicpimi, Davidca Jonatantaca:
—Cambac taita piñaricpica, ¿pitac ñucamanca huillangayari?— nirca.
11Shina nicpimi, Jonatanca Davidtaca:
—Shamui chai pambaman llucshishun— nirca.
Shina nishpami ishcai tucushpa pambaman llucshircacuna.
12Chaipimi Jonatanca Davidtaca:
—Israelcunata Mandac Dios ricucunmi. Caya cashpa, mincha cashpa cai horasllatatacmi ñuca taita imata yuyacushcata tapushpa yachasha. Canmanta allita yuyacucpica, huillachun cachashallami.
13Ashtahuanpish ñuca taita canta llaquichisha nicushcata yachashca jahua mana huillacpica, Mandac Diosllatac sinchita, ñucata llaquichichun. Mandac Diosca ñuca taitata pushashca shinallatac cantapish alli pushachun.
14Ñuca causacucpica, Mandac Dios llaquic shinallatac ñucatapish llaquingui. Ñuca huañucpica,
15ñuca familiataca tucui causaipi llaquingui. Davidta piñaccunata Mandac Dios cai pachamanta shucllancaman tucuchicpipish ñuca huasi ucupuracunata llaquinataca amatac saquinguichu— nirca.
16Jonatanca:
—¡Canta piñaccunataca Diosllatac llaquichichun!— nishpami Davidpac huasi ucupuracunahuan ari ninacurca.
17Jonatanca Davidta tucui shunguhuan cuyashcamantami paita cutin ari nichirca.
18Chai quipami Jonatanca:
—Cayaca llullu quilla cacpimi, micunata ruhuanga. Cambac tiyarina chushaclla cacpica, cantaca piñangami.
19Quimsa punzhata miticungui. Quipataca utcapi llaquihuan cashpa ima shina miticurcangui, chaillamantac utca rishpa, Ezel rumi huashapi shuyangui.
20Ñucaca allita yachacungapac shitacuc shinami quimsa flechacunata shitasha.
21Chashna shitashpami ñucata servictaca: “¡Chai flechacunata mashcagri!” nishpa cachasha. Cutin: “¡Riqui, flechaca ashtahuan caimanmi!” nicpica, canca shamunguilla. Chashna nishpaca ima llaqui mana tiyagricushcatami huillasha. ¡Mandac Diospac shutipimi nini!
22Ashtahuanpish chai servicta: “Riqui, flechaca canmanta ashtahuan chimbamanmi” nicpica, canca ringuilla. Mandac Diosmi cantaca cachacun.
23Ñucahuan canhuan cashna parlanacushcataca Mandac Diosmi tucui ñucanchic causaipi ricunga— nirca.
24Chai quipaca Davidca pambapimi miticungapac rirca. Ña llullu quilla chayacpica jatun mandac Saulca micungapacmi tiyarirca.
25Jatun mandacca pai utcapi tiyarina pushtullapitacmi pirca cuchupi cac tiyarinapi tiyarirca. Jonatán jataricpica, Abnermi Saulpac ladopica tiyarirca. Ashtahuanpish Davidpac tiyarinaca chushacllami carca.
26Chai punzhaca David illacta ricushpapish Saulca imata mana nircachu. Chaica: «Diospac ñaupapi ima mana allita ruhuashca cashpami manarac alli tucushca canga» yuyarcami.
27Llullu quilla cayandi punzhapish Davidpac tiyarina chushaclla cacpimi, Saulca paipac churi Jonatantaca:
—¿Ima nishpatac Isaipac churica cainapish, cunanpish micungapacca mana shamun?— nishpa tuparca.
28Shina tapucpimi Jonatanca Saultaca:
—Davidca Belenman ringapacmi, ñucaman yallita mañarca.
29Paica: “Ñucanchic familiacunami chai pueblopi Diosman cushpa animalta huañuchishpa fiestata ruhuacuncuna. Ñuca huauquica ñucatami shamuchun nishca. Chaimanta ñuca cambac ñaupapi alli ricurishca cacpica, ñuca huauquicunata ricungapac richun saquiyari” nirca. Chaimantami jatun mandac-huan micungapacca mana shamushca— nirca.
30Shina nicpimi, Saulca Jonatanhuan yallita piñarishpa:
—¡Mana cazushpa millaita ruhuac huarmipac huahua! Canllatac pingaichishca tucushpa, cambac mamatapish pingaichingapac Isaipac churihuan apanacuc cashcataca ¿Manachu ñucaca yachani?
31Isaipac churi cai pachapi causacucpica cambac causaipish, can mandanapish manchaillami causanguichic. Cunanca pushamuchun cachai. Paica huañuchishcatacmi canga— nirca.
32Shina nicpimi, Jonatanca paipac taita Saultaca:
—¿Ima nishpatac huañungayari? ¿Paica imatatac ruhuashcayari?— nirca.
33Shina nicpimi, Saulca Jonatantaca huañuchisha nishpa lanzahuan shitarca. Chashna ruhuacpimi, Jonatanca paipac taita Saúl Davidta huañuchishatac nicushcata yacharca.
34Chaimantami Jonatanca mizamanta munai piñarishpa jatarirca. Davidta paipac taita rimarishcamantami munai llaquirishpa, chai llullu quilla cayandi punzhapish mana micurca.
35Cayandi tutamantami Jonatanca utcapi Davidhuan parlanacushca shinallatac shuc uchilla huambrahuan pambaman rirca.
36Chaipimi chai huambrataca:
—¡Ñucami flechacunata cachagrini! Canca callpashpa mashcamugringui— nirca.
Chai huambra callpashpa ricpimi, paimanta ashtahuan chimbaman urmachun Jonatanca flechata shitarca.
37Flechacunata Jonatán shitashca pushtuman chai huambra chayacpica Jonatanca:
—Flechacunaca canmanta ashtahuan chimbapimi— nishpa sinchita caparirca.
38Jonatanca cutinmi chai huambrataca:
—¡Utca callpamui, ama shayacuichu!— nirca.
Shina cacpimi Jonatanta servicca flechacunata tandashpa paipac amopacman shamurca.
39Ashtahuanpish chai servicca ima ruhuacushcataca mana entendircachu. Jonatanhuan, Davidllahuanmi imamanta chashna ruhuacushcataca yacharca.
40Chai quipami Jonatanca paipac macanacunataca paita servicman cushpaca:
—Caita apashpa puebloman ñaupailla— nirca.
41Chai servic huambra rishca quipami, Davidca chai ura ladopi jatarishpa quimsa cutincaman allpaman chayacta paipac ñaupapi cumurirca. Chai quipami ñahui quingraipi muchanacushpa ishcaita huacarca. Ashtahuanpish Davidmi ashtahuan huacarca.
42Chai quipami Jonatanca Davidtaca:
«Imatapish mana manchashpa rilla. Ñucanchicca ishcaitami Mandac Diospac ñaupapi: “Mandac Dios cantapish, ñucatapish, cambac huahuacunatapish, ñucapac huahuacunatapish huiñaita ricuchun” nishpami ari nircanchic» nirca.
Shina nicpimi, Davidca jatarishpa rirca. Shinallatac Jonatanpish puebloman cutirca.
Who We AreWhat We EelieveWhat We Do
2025 by iamachristian.org,Inc All rights reserved.
