1Cai yuyaita cuc rimaicunaca,
Davidpac churi israelcunata
jatun mandac Salomón quillcashcami.
2Cai rimaicunaca alli yachacungapac,
cazushpa causangapacmi.
Cai rimaicunaca jatun
yuyaicunata ashalla rimaicunahuan
yuyaita cungapac,
3shinallatac cazungapac,
yachacungapac, cashcata
ruhuangapac, allita ruhuangapac,
pacta pacta ruhuanata yachacungapac,
4mana yachaccunata alli
yachachingapac, mosocunaman
alli yuyaita cungapac, allita
yuyarishpa imatapish ruhuanata
yachachingapacmi can.
5Yachaisapa runa uyashpaca,
ashtahuanmi yachacunga.
Alli yuyaiyuc runapish,
alli yuyaita cushcataca
chasquingami.
6Yuyaita cuc, yachachishca
rimaicunaca, yachaisapacuna
rimashcatapish, yuyaita japina
rimaicunatapish pi mana yachai
tucushcatapish, yachangapacmi.
7Alli yachac cangapac callaricca
Mandac Diosta manchanami can.
Ashtahuanpish mana entendiccunaca
alli yachaitapish, yachachishcatapish
piñancunami.
Alli yachaisapa cunashcamanta8«Ñuca huahualla, alli causachun
cambac taita rimashcataca
alli uyangui.
Alli causachun cambac mama
yachachishcataca
ama cungaringuichu.
9Chai yuyaicunaca sumac coronata
cambac umapi churarishca shina,
sumac huallcata cungapi churarishca
shinami canga.
10Ñuca huahualla, millaita
ruhuaccuna inquitacpipish
ama uyanguichu.
11Canta: “Ñucanchic-huan jacu,
tucllata churashpa
mana faltayuc runata, pacalla
chapashpa huañuchingapac
12Seol shinami causacta
millpushun.
Jatun jutcupi shitac shinami
chingachishun.
13Tucuilaya charishcacunatami
japishun.
Tucui chaicunata quichushpami,
ñucanchic huasicunapi jundachishun.
14Canca yachacmi cangui.
Ñucanchic-huan jaculla.
Ñucanchicca shuc tulullapimi
tucuita tandachishun” ningacunami.
15Ñuca huahualla, paicunahuanca
ama puringuichu.
Paicuna purina
ñanmantaca anchuringui.
16Mana allita ruhuangapacca
callpashpami rincuna.
Huañuchishpa yahuarta
jichangapacca utcami rincuna.
17Zhutacuna ricucucpi, linchita
churacpica mana yaicuncunachu.
18Ashtahuanpish chai runacunaca
paicunallatac huañungapacmi
tucllata ruhuancuna.
Paicunapac llaquipacllatacmi
tucllata churancuna.
19Ima shinapish chayucyanata
munaccunataca chai
charishcallatacmi causaita quichun.
20Alli yachaica ñancunapimi
caparishpa cayacun.
Plazacunapimi paipac
rimaicunaca uyarin.
21Achca gentecuna purina ñancunapimi
caparishpa huillacun.
Pueblo yaicunapi
paipac yuyaicunata huillashpaca:
22“Mana yachaccuna,
¿ima horascamantac
chashna mana yachacushpa,
causasha ninguichic?
Burlaccuna
¿Ima horascamantac chashna
burlashpa causasha ninguichic?
Mana entendiccuna
¿ima horascamantac alli yachanata
piñanguichic?
23¡Ñuca rimashcata uyashpa
cutimuichicyari!
¡Riqui, ñuca rimashcacunata
yachacuchunmi munani!
¡Cancunapac jahuapica ñuca
Espiritutami tallic shina cachasha!
24Cancunata tauca cutin cayacpipish,
mana uyarcaguichicchu.
Maquihuan cayacpipish,
mana shamurcanguichicchu.
25Ashtahuanpish ñuca
cunashcatapish, ñuca rimashcatapish
mana munarcacunachu.
26Cancunata jatun llaqui
japicpica, ñucaca asishami.
Cancuna jatun llaquicunahuan
cacpica burlarishami.
27Cancuna manchana
jatun llaquicunaca
tucuchic shinami shamunga.
Jatun acapana huaira shina
shamushpami, cancunataca
yallita llaquichinga.
28Chai llaquicuna japicpimi,
ñucata mañangacuna.
Shina mañacpipish
ñucaca mana uyashachu.
Ñucata yallita mashcashpapish,
mana taringacunachu.
29Alli yachaita piñashpami,
Mandac Diosta mana manchasha
nircacuna.
30Ñuca cunashcata mana uyasha
nishpami, jarcashpa rimacpipish
yangalla cashcata yuyarcacuna.
31Paicuna millaita ruhuashpa
causashcataca tarpushpa
cosechac shinami japingacuna.
Chashnami huicsa pactata
micungacuna.
32Imata mana yachaccunataca
chai mana yachashcallatacmi
huañuchinga.
Mana alli yuyaiyuc gentecunataca
chai mana alli yuyaillatacmi
tucuchinga.
33Ashtahuanpish ñucata uyashpaca,
llaquicunata mana manchashpa,
imatapish mana manchashpami,
cushilla causanga”
nishpami huillacun.
Who We AreWhat We EelieveWhat We Do
2025 by iamachristian.org,Inc All rights reserved.
