1 TESALONICENSES 5 - Biblia Quichua Cañar 2010

1Cuyashca criccuna, Apunchic Jesús ima huata, ima punzha cutimuna cashcataca, mana quillcanachu cani.

2Cancunallatac Apunchic Jesús shuc shuhuac tuta shamuc shina, mana yuyashca horas cutimuna cashcataca, alli yachanguichicmi.

3Gentecunaca: «Cushillami sumacta causacunchic» nicucpica, jatun llaquica shuc huarmita sajuarina nanai japic shinami cungailla japinga. Chai llaquimantaca pipish mana quishpiringachu.

4Chaimanta Apunchic Jesús shuhuac shina shamushpaca, mana manchachingachu.

5Tucui cancunami achic punzhapac canguichic. Mana amsapacchu, mana tutapacchu canguichic.

6Chaimanta mana caishuccuna shina sueñunachu canchic. Ashtahuanpish riccharishca shina chaparanami canchic.

7Maijanpish sueñucca tutami sueñun, maijanpish machacca tutami machan.

8Ashtahuanpish ñucanchicca punzhapac cashcamantaca, alli yuyaihuanmi catina canchic. Fierro churanata churaric shinaca, Apunchic Jesusta crishpa, cuyaihuan causanami canchic. Umapi fierro cascota churaric shinaca, quishpirina yuyaihuanmi shuyana canchic.

9Dios ñucanchicta acllashpaca, mana piñarishpa llaquichingapacchu acllarca. Ashtahuanpish chaipac randica, ñucanchic Apunchic Jesusmanta quishpirichunmi acllarca.

10Causacushpapish, huañushpapish paihuan pacta cachunmi, Jesucristoca ñucanchicmanta huañurca.

11Chaimanta ima shinami cunan cancuna caticuc shinallatac, caishuc chaishuc-huan alli catina yuyaita cunacushpa, ayudanacushpa causaichic.

Criccunata Pablo cunashcamanta

12Cuyashca criccuna, cancunapurapi Apunchic Jesusta serviccunata, cunashpa yachachiccunata alli cazunguichic.

13Paicuna allita ruhuacushcamantaca, cuyashpa alli ninami canguichic. Shinallatac caishuc, chaishuc-huanmi cushilla causanguichic.

14Shinallatac cuyashca criccuna, chai quilla runacunatapish rimaichic, llaquilla caccunataca cushichichic, manarac sinchi criccunatapish yachachichic. Shinallatac tucuihuan sumacta caichic.

15Shuccuna cancunata ima mana allita ruhuacpica, cancunapish ama chashnallatac ruhuaichicchu. Chaipac randica punzhanta cancunapurapipish, tucui gentecunahuanpish allita ruhuaichic.

16Punzhanta cushilla caichic.

17Punzhanta Diosta mañaichic.

18Tucui imamantapish Diostaca pagui nicuichiclla. Jesucristota criccunataca chashna ruhuachunmi Diosca munan.

19Diospac Espiritutaca ama chiriyachichicchu.

20Dios ima nishcata huillactaca chasquinami canguichic.

21Tucuita allita ricushpa, allitaca huacaichishpa causaichic.

22Tucui mana allimanta huacaichirichic.

23Cushi causaita cuc Diosllatac cancunapac espiritutapish, almatapish, cuerpotapish Apunchic Jesús cutimuna punzhapacca jucha illac, pi mana juchanchipacta ruhuashpa huacaichichun.

24Cancunata cayac Diosca imatapish pactachic cashcamantami, tucui caicunatapish pactachinga.

Ña tucuchingapac allilla cashca cachun nishcamanta

25Cuyashca criccuna, ñucanchicmanta Diosta mañaichic.

26Tucui criccuna muchashpa caishuc chaishuc saludanacuichic.

27Apunchic Jesuspac shutipimi, cai quillcataca tucui criccunapac ñaupapi rezachun nini.

28Ñucanchic Apunchic Jesucristopac cuyai tucui cancunahuan cachunmi ninchic.