ECLESIASTÉS 9 - Biblia Quichua Cañar 2010

1Tucui caicuna ima shina cashcata yachangapacca shunguhuanmi yuyaricurcani. Cashcata ruhuaccunapish, alli yachaccunapish, paicuna imata ruhuashcacunapish Diospac maquipimi. Runaca tucui paipac ñaupapi cacpipish, cuyaimanta cashcatapish, piñaimanta cashcatapish mana yachanchu.

2Tucuimi chashnallatac tucun.

Cashcata ruhuacpish,

Diosta mana manchacpish,

allipish, millaipish,

chuya runapish, mapa runapish

Diosman animalta cushpa huañuchicpish,

mana animalta cushpa rupachicpish,

ari nicpish, ari ninata manchacpish

chashnallatacmi tucun.

3Inti achicyachicuc cai pachapi tucui ruhuanamantaca caicunami mana alli ricurin. Tucuimi chashnallatac tucun. Huañuclla runapac shunguca tucui causaipimi mana allita ruhuana yuyaillahuan, juizhu illac causacun. Chai quipaca huañushcacunahuanmi tandanacugrin.

4Tucui causaccunamanca ima shuyanaca tiyanracmi. Huañushca leonpac randica, causac allcumi ashtahuan alli.

5Causaccunaca huañuna cashcataca yachanmi. Ashtahuanpish huañushcacunaca imata mana yachanchu. Imata japinatapish mana charinchu. Paicunataca pipish mana yuyarinchu.

6Paicunapac cuyaipish piñaipish, envidianapish ñami tucurirca. Inti achicyachicuc cai pachapi tucui imata ruhuanatapish ña mana charingacunachu.

7Can imata ruhuashcacunamantaca

Diosca cushicushcami.

Cunanca cushicushpa

cambac micunata micugrilla,

cushi shunguhuan vinotapish ubiagrilla.

8Punzhanta yuranlla churanata churaringui.

Cambac umapipish

mishquilla ashnacucca ama illachun.

9Inti achicyachicuc cai pachapi causachun

Dios cushca tucui cambac yanga causaipi,

cambac cuyashca huarmihuan cushicui.

Cai pachapi trabajashcamantaca

chashnami cushicuna cangui.

10Cambac maquiman tucui shamushcata

tucui fuerzahuan ruhuailla.

Can rina Seolpica

imata ruhuanapish, imata yuyarinapish,

imata yachacunapish,

alli yachaipish mana tiyanchu.

11Inti achicyachicuc cai pachapica

caitapish ricurcanimi:

Jatun callpaipica

mana sinchi callpaccunachu mishan.

Macanacuipipish

mana sinchicunachu mishan.

Micunatapish mana yachaccunallachu micun.

Mana yuyaisapacunallachu chayucyan.

Mana allita rimaccunallachu

alli nishca can.

Ashtahuanpish tucuimanmi alli punzhapish,

mana alli punzhapish shamun.

12Ashtahuanpish runaca

ima horas ima tucunata mana yachanchu.

Ima shinami challuacuna mallapi japi tucun,

alasyuc animalcuna

linchipi japi tucun.

Chashnallatacmi runacunapish

mana alli punzhapi japi tucun.

13Shinallatac inti achicyachicuc cai pachapica ñucaca cai jatun yachaitami ricurcani:

14Ashalla gentecuna causana shuc uchilla pueblomi tiyarca. Chai pueblopi causaccunahuan macanacungapacmi alli sinchi shuc jatun mandac shamurca. Chai pueblota muyushpami jatun torrecunata shayachirca.

15Chai pueblopica alli yachac huaccha runami causarca. Chai runaca alli yachac cashpami chai pueblotaca quishpichirca. Shina cacpipish chai huaccha runataca pipish mana yuyarircachu.

16Chaimantami ñucaca: «Yallita sinchi canapac randica, alli yachac canami ashtahuan alli. Huaccha runataca alli yachac cacpipish, yangapi churashpami, pai alli yuyaita cushcataca mana uyanayachirca» nircani.

17Mana entendic jatun mandac

rimashcata uyanapac randica,

yachac runa rimashcata

upalla yuyanami ashtahuan alli.

18Alli yachaica

ima macanacunata yalli ashtahuan allimi.

Ashtahuanpish shuc pandaillami

achca allicunataca tucuchin.