LUCAS 5 - Biblia Quichua Cañar 2010

Achca challuacunata japishcamanta(Mt 4.18-22; Mr 1.16-20)

1 Jesús Genesaret cucha patapi Diosmanta huillacucpimi, achca gentecuna ñitirinacushpa paipacman shamurca.

2Shina cacpimi, Jesusca chushaclla ishcai canoacunata cucha patapi shayacucta ricurca. Challuata japiccunaca chai canoacunataca chaipi saquishpami, linchita tacshacurca.

3Jesusca chai ishcai canoamanta Simonpac canoapi tiyarishpami, Simontaca canoata yacu chaupiman purichun mandarca. Chaipi tiyarishpami, tucui chai yacu patapi cac gentecunata yachachirca.

4Yachachishca quipaca Simontaca:

—Canoapi chaupi cuchaman rishpa, challuacunata japingapac linchicunata shitaichic— nirca.

5Shina nicpimi Simonca:

—Yachachic, tucui tutapish imata mana japircanchicchu. Shina cacpipish can nishcamanta, shitashpa ricushun— nirca.

6Chashna shitacpica, achca challuacunami jundarca. Linchicunaca lliquirinallami tucurca.

7Chaimantami shuc canoapi caccunata llucchinacuchun maquihuan cayarca. Chashna cayacpi shamushpaca, ishcai canoacunapimi jundachirca. Canoacunaca ucuyanallami tucurca.

8Simón Pedro, chaita ricushpa, Jesuspac ñaupapi cungurishpaca:

—Apunchic Jesús, ñucaca juchasapami cani. Chaimanta ñucamanta anchurilla— nirca.

9Chashna achca challuata japishcamantami Simonpish, paihuan caccunapish yallita mancharishpa saquirirca.

10Zebedeopac churicuna Simonhuan puric Jacobopish, Juanpish yallitami mancharirca. Chaimantami Jesusca Simontaca:

—Ama mancharichu. Canca cunanmantaca challuacunata japic shinami, gentecunata Diospacman pushamuc cangui— nirca.

11Chaimantami canoacunata yacu pataman llucchishpa, chaipi tucuita saquishpa, Jesusta catishpa rircacuna.

Jesús lepra ungüihuan cac runata alliyachishcamanta(Mt 8.1-4; Mr 1.40-45)

12Jesús shuc puebloman chayacpimi, lepra ungüihuan ungushca runa shamurca. Chai runa pambacaman cumurishpaca:

—Can alliyachisha nishpaca, alliyachinguimanllami— nishpa mañarca.

13Shina nicpimi Jesusca:

—Ari, alliyachisha ninimi. Alliyai— nirca.

Shina nishpa, maquihuan tuparicpica, lepra ungüica anchurircallami.

14Chashna alliyachishpami Jesusca:

—Pi alliyachishcataca, ama piman huillanguichu. Cunanca, Israel curaman ricuchigri. Can alliyashcamantaca, Moisés mandashca shina, ofrendata cungui. Chashna ruhuacpimi yachangacuna— nirca.

15Ashtahuanpish Jesús alliyachishcaca, punzhantami tucui llactacunapi charishpa catirca. Chaimantami uyangapacpish, ungushcacunata jambichingapacpish achcacuna paipacman shamurca.

16Jesusca paicunamanta caruyashpami, shitashca pambapi Diosta mañangapac ric carca.

Jesús paralisis ungüi japishcarunata alliyachishcamanta(Mt 9.1-8; Mr 2.1-12)

17Shuc punzha Jesús yachachicucpimi, fariseocunapish, mandashcacunata yachachiccunapish chaipi tiyacurca. Paicunaca Galilea llactamantapish, Judea llactamantapish, Jerusalén pueblomantapishmi shamurca. Jesusca Diospac poderhuan cashcamantami ungushcacunata alliyachirca.

18Chaimantami maijancunaca paralisis ungüihuan cac runata chacanapi apamushpa, Jesuspac ñaupaman chayachinata munarca.

19Chashna cashpapish, achca gentecuna chai huasipi cashcamantami, Jesuspacmanca mana cuchuyachi pudirca. Chaimantami huasi jahuaman huichicushpa, catata pascashpa, ungushcataca huandumushcandi Jesuspac ñaupaman uricuchirca.

20Jesusca paicuna tucui shunguhuan crishcata ricushpaca:

—Riqui huahua, cambac juchacunataca ña perdonanimi— nirca.

21Chaimantami fariseocunapish, mandashcacunata yachachiccunapish: “Cai runaca, ¿pi cashpatac Diosta piñachin? Juchacunata pipish mana perdonai pudinchu, Diosllami perdonan” nishpa yuyacurca.

22Paicuna chashna yuyacucta yachashpami, Jesusca:

—¿Ima nishpatac cancunapac shungupica chashna yuyacunguichic?

23Cai runataca, ¿ima ninatac ashtahuan alli canga? Paitaca: “¿Cambac juchacunata ña perdonanimi” nina, mana cashpaca “jatari, rilla” ninachu ashtahuan jahualla canga?— nishpa tapurca.

24Runa Tucungapac shamushca ñucaca cai pachapi juchacunata perdonaclla cashcata cancuna yachachunmi, cai runataca: “Jatari, canta huandumushca chacanata apashpa, cambac huasiman rilla” nini— nirca.

25Chaimantami chai runaca jatarishcahuan, tucui gentecuna ricucucpi, paita huandumushca chacanata apashpa, Diostaca “sumacmari cangui” nishpa huasiman rirca.

26Tucui chaipi caccunami yallita mancharishpa: “Jaicapi mana ricushcatami ricunchic” nishpa, Diostaca “sumacmari cangui” nircacuna.

Jesús Leví runata jacu nishcamanta(Mt 9.9-13; Mr 2.13-17)

27Chai quipa, Jesús chaimanta llucshishpaca, Leví runa mizapi impuestota japicuctami ricurca. Paita ricushpaca:

—Ñucata cati— nirca.

28Chashna nicpimi, Levica jatarishpa tucuita saquishpa, Jesusta catishpa rircalla.

29Leví Jesus-huan rishpaca, paipac huasipimi jatun micuita ruhuarca. Chaipimi impuestota japic tauca runacunapish, yallita juchayuc nishca runacunapish micucurca.

30Fariseocunapish, mandashcacunata yachachiccunapish chaita ricushpa, Jesuspac yachacuccunataca:

—¿Ima nishpatac impuestota japiccunahuanpish, caishuc juchayuccunahuanpish micucunguichic, ubiacunguichic?— nircacuna.

31Chashna nicpimi Jesusca:

—Allicunaca mana jambicta mashcanchu, ashtahuanpish ungushcacunallami jambicta mashcan.

32Ñucaca mana cashcata ruhuaccunatachu cayac shamurcani, ashtahuanpish juchayuccunatami Diosman cuti richun cayac shamurcani— nirca.

Jesús yachachishcaca mushuc cashcamanta(Mt 9.14-17; Mr 2.18-22)

33Chaimantami chai tapuccunaca:

—Bautizac Juanpac yachacuccunapish, fariseocunapac yachacuccunapish tauca cutinmi ayunashpa, Diosta mañan. ¿Ima nishpatac cambac yachacuccunaca mana ayunashpa micunlla, ubianlla?— nircacuna.

34Chashna nicpimi Jesusca:

—Novio paicunahuan cacpica, ¿bodaman cayashcacunataca ayunachinmanchu?

35Novio illaclla cana punzhacuna chayamucunmi. Chai punzhacunami ayunanga— nirca.

36Shinallatac chimbapurashca parlohuan Jesús parlashpaca:

—Pipish mushuc churanata lliquishpa, mauca churanata mana remendanchu. Chashna ruhuacpica, mushuc remiendohuanca mana alli saquirinmanchu. Mushucca maucapica mana alli ricurinmanchu.

37Cunanlla ruhuashca vinotapish mauca capachucunapica, pi mana churanchu. Chashna churacpica, cunanlla ruhuashca vinoca mauca capachuta tucyachinmanmi. Chashna tucyachicpica, vinopish, capachupish yangamantami canman.

38Chaimantami vinopish, capachupish ama ima tucuchun, cunanlla ruhuashca vinotaca mushuc capachucunapi churana.

39Maijanpish pucushca vinota ubiacca, llullu vinotaca mana ubiasha ninmanchu. Pucushcami ashtahuan alli ninmanmi— nirca.