1Isaiasca Amozpac churimi carca. Paica jatun mandac Uzías, Acaz, Ezequías Judá llactata mandacui huatacunapimi Judá llactapish, Jerusalenpish ima tucunata muscuipi shina ricushcata huillarca.
2Jahua pachapish,
cai pachapish uyaichic.
Mandac Dios ñucaca:
«Cai huahuacunataca ñucami
huiñachishpa jatunyachircani.
Ashtahuanpish paicunaca
ñucata piñashpami, mana cazurca.
3Huagrapish paipac
dueñota ricsinmi.
Burropish dueñopac
corralta ricsinmi.
Ashtahuanpish israelcunaca
mana ricsincunachu.
Ñuca acllashcacunaca
mana yuyaita japincunachu.
4¡Aij, juchasapa gentecunalla,
juchata aparishca gentecunalla,
millaita ruhuaccunapac
huahua huahuacunalla,
juchayuc runapac churicunalla,
Mandac Diosmanta caruyashpami,
israelcunapac jucha
illac Diostaca
mana catisha nishpa,
piñachircanguichic!
5¿Ima nishpatac ashtahuan
llaquichishca canata
munanguichic?
Umapish tucui chugrishca,
shungupish tucui nanaihuanmi
canguichic.
6Chaquimanta umacamanmi
chugrishca, punguishca,
sisushca canguichic.
Cancunapac cuerpoca
tucui ungushcallami.
Pipish mana jambishca,
mana huatachishcami canguichic.
Aceiteta churashpapish
pi mana chiriyachishcachu.
7Cancunapac llactaca shitashcami.
Pueblocunapish rupachishcami.
Pambacunapi pucushcacunatapish
shuctac llacta gentecunami
cancunapac ñaupallapitac micushca.
Shuctac llacta gentecunami
shitashca pambata saquishca.
8Sión llactaca
uvas chagra chaupipi
ruhuashca chuclla shina,
melón chagra chaupipi ruhuashca
chuclla shinami saquirishca.
Chai llactaca piñaccunapac
chaupipi shinami saquirishca» nini.
9Mandac Dios ñucanchicta
ashallatapish mana saquishca
cacpica, Sodoma, Gomorra shinami,
chingarinchicman carca.
Tucui shunguhuan Diospacman cutirinamanta10Sodoma pueblota mandaccuna
Mandac Dios rimashcata
uyaichicyari.
Gomorra pueblopi causaccuna
ñucanchic Dios mandashcata
alli uyaichicyari.
11Mandac Diosca:
«Cancuna achca animalcunata
ñucaman cushpa, huañuchishcapish,
¿ñucamanca imapactac valin?
Cari ovejacunata cushpa,
tucui rupachishcatapish,
huira animalcunapac huirata
rupachishcatapish ñucaca millanimi.
Huagracunata, cari ovejacunata,
chivocunata huañuchishpa,
cushca yahuartapish
mana munanichu.
12Animalcunata ñucapac
ñaupaman apamushpa
ñuca huasi punguta saruchichunca,
¿pitac mañarcayari?
13Ama ashtahuan yanga
ofrendacunata cuichicchu.
Inciensota rupachishcatapish,
llullu quillapi, samana punzhapi
cancuna tandanacushcatapish
ñucaca millanimi.
¡Cancunapac jatun fiestacunataca
mana ricunayanchu!
14Llullu quillapi,
jatun fiestacunapi tandanacuita
cancuna ruhuashcataca
mana ricunayanchu.
Chaicunaca ñucamanca
llashac quipi shinami.
Chaicunata ricushpallami shaicuni.
15¡Cancunapac maquica
huañuchishca yahuarllami!
Chaimantami cancuna
maquita alzashpa mañacpica,
ñuca ñahuita pacasha.
Yallita mañacucpipish
manatac uyashachu.
16Jahuarichic, picharichic.
Cancuna mana allita ruhuashcataca
ñuca ñaupamanta anchuchichic.
Mana allita ruhuanata saquishpa,
17allita ruhuanata yachacuichic.
Allita mandanata munaichic.
Llaquichic runata rimaichic.
Taita mama illac huahuacunatapish,
viuda huarmitapish
ayudaichic» ninmi.
18Mandac Diosca: «Cunanca
tandanacushpa allichingapac
ñucapacman shamuichic.
Cancunapac jucha puca tela shina
cacpipish, rasu shina
yuranllatami ruhuasha.
Yana puca tela shina cacpipish,
yuranlla millma shinatami ruhuasha.
19Ñuca rimashcata
cancuna uyashpaca,
cai allpapi sumac pucushca
granocunatami micunguichic.
20Ashtahuanpish cariyashpa,
mana uyasha nishpaca
jatun macanacuipimi
tucuringuichic.
Chaitaca Mandac Dios ñucami
nini» ninmi.
Jerusalenta taripashpacutin allichishcamanta21Diosta alli cazuc llactalla,
¿ima nishpatac cullquimanta
huainayac huarmi shina,
tucurcanguiyari?
Chaipica tucuimi
cashcata ruhuaccuna,
imatapish allita
ruhuaccuna causarca.
¡Ashtahuanpish cunanca
huañuchiccunallami causan!
22Cambac cullquipish
fierro ismushca shinami tucushca.
Cambac vinopish
yacuhuan chapushcami.
23Mandaccunapish mana cazuncunachu.
Shuhuaccunahuan
apanacuccunami tucushca.
Tucui paicunami cullquita
pacalla japinallata munancuna.
Imatapish pacalla
cuchunllami munancuna.
Taita mama illac huahuacunatapish,
viuda huarmicunatapish
mana ayudanchu.
24Chaimantami israelcunata
sinchiyachic Mandac Diosca:
«¡Ña chailla! ¡Cunanca ñucata
piñaccunata llaquichishpatacmi
cushicusha!
Ñucata mana ricunayachiccunataca
paicuna mana allita ruhuashca
shinallatacmi llaquichisha.
25Ñucaca canhuan
yallita piñarishpami,
lejiahuan cambac
juchacunata jahuashpa,
tucui millaicunata anchuchisha.
26Utcapi shinallatacmi
alli juezcunata,
allita cunaccunata churasha.
Chashna ruhuacpimi:
“Cashcata ruhuac,
Diosta alli cazuc
llactami” ningacuna.
27Sión llactata quishpichishpami,
ñucapacman cutin cutichisha.
Chaipi causaccuna ñucapacman
cutirishcamantaca cashcata
ruhuashpami quishpichisha.
28Ashtahuanpish cariyashpa,
mana cazuc juchasapacunataca
tandachishpami tucuchisha.
Mandac Dios ñucata cungariccunaca
tucuimi tucuchishca canga.
29Chashna ruhuacpimi,
cancunaca encina yuracunata
cuyashcamanta pingaichishca
canguichic.
Cancuna acllashca huertacunatapish
burlashpami pingaichinga.
30Cancunaca panga chaquishpa,
urmashca encina yura shina,
yacu illac huerta shinami
tucunguichic.
31Sinchi runapish
tamo shinami tucunga.
Pai imata ruhuashcaca
uchupa shinami tucunga.
Ishcaitatacmi rupachishca canga.
Chai ninataca pi mana huañuchi
pudingachu» ninmi.
Who We AreWhat We EelieveWhat We Do
2025 by iamachristian.org,Inc All rights reserved.
