DEUTERONOMIO 29 - Biblia Quichua Cañar 2010

Mandac Dios Moab llactapi israelcunahuan ari nishcamanta

1Mandac Diosca Horeb urcupimi israelcunahuan ari ninacurca. Chaipi ari nishca jahuami Mandac Diosca Moab llactapipish israelcunahuan ari ninacuchun Moisesta mandarca.

2Chaimanta Moisés tucui israelcunata cayashpaca: «Egipto llactapi Faraontapish, tucui paita serviccunatapish, chaipi causaccunatapish, cancunapac ñaupapi Mandac Dios imata ruhuashcataca cancunapac ñahuihuanmi ricurcanguichic.

3Jatun ricuchinacunatapish, jatun mancharinacunatapish, pi mana ruhuaipaccunatapish, cancunapac ñahuihuanmi ricurcanguichic.

4Chashna cacpipish, Mandac Diosca cunancamanmi chaicunata entendichunca yuyaitapish, ñahuitapish, ringritapish mana cushca.

5Ñucaca chuscu chunga huatatami shitashca pambataca cancunata pushamurcani. Chai huatacunaca cancunapac churanapish mana maucayarcachu, ushutapish mana tucurircachu.

6Tandatapish mana micurcanguichicchu, llullu vinotapish, pucushca vinotapish mana ubiarcanguichicchu. Ñucaca Mandac Dios cashcata yachachunmi chashna pushamurcani.

7Chashnami cai llactaman chayamurcanchic. Hesbón llactata jatun mandac Sehonpish, Basán llactata jatun mandac Ogpish ñucanchic-huan macanacungapac llucshircami. Shina cacpipish atircanchicmi.

8Paicunata atishpaca, allpata quichushpami Rubenpac ailluman, Gadpac ailluman, Manasespac chaupi ailluman curcanchic.

9Cancuna tucui ima ruhuashcapish alli llucshichunca, Dios-huan ari nishcatami pactachishpa causana canguichic.

10Cunanca, tucui cancunami Mandac Diospac ñaupapi canguichic. Aillucunata mandaccunapish, pushac yuyaccunapish, caishuc mandaccunapish, tucui israelcunapish caipimi canguichic.

11Cancunapac huahuacunapish, huarmicunapish, cancunahuan causac caru llacta runacunapish, yantata piticcunapish, yacuta ashtaccunapish caipimi canguichic.

12Mandac Dios cancunahuan ari nishcata chasquishpa, chai ari nishcata pactachingapacmi caipi canguichic.

13Cancunapac ñaupa taita Abrahamman, Isaacman, Jacoboman ari nishca shinami cancunaca Dios acllashca cangapac, cutin Mandac Diosca cancunapac Dios cachun caipi canguichic.

14Cai ari nishcatapish, cai pactachishami nishcacunatapish mana cancunallahuanchu ruhuarca.

15Ashtahuanpish Mandac Diospac ñaupapi cunan ñucanchic-huan caccunahuanpish, mana ñucanchic-huan caccunahuanpishmi ruhuarca.

16Egipto llactapi ima shina causashcatapish, chaimanta llucshishpa shuctac llactacunata ima shina pasamushcatapish cancunallatac yachanguichicmi.

17Chai llactapi causaccuna millaita ruhuac cashcatapish, caspimanta, rumimanta, cullquimanta, curimanta ruhuashca dioscunata charictapish ricurcanguichicmi.

18Cancunapuramanta cari cashpa, huarmi cashpa, familia cashpa, aillu cashpa Mandac Diosmanta caruyashpa, chai llacta dioscunata pacta adoranguichicman. Cancunapurapica pacta jayac venenota pucuc yura shina tiyanman.

19Shina tiyashpaca, cai ari nishcata uyashpapish jatun tucushpa shungupi: “Ñucaca munashcata ruhuashpapish allimi causasha” ninguiman. Chashna yuyacpica, canmantami tucui llaqui tucunga.

20Mandac Diosca chashna mana alli ruhuactaca mana perdonangachu. Ashtahuanpish nina rupashpa cushnicuc shina piñarishpa, paipaclla cachun munashpa, cai libropi sinchita nicushca shinami llaquichinga. Chashnami cai pachamanta chai runapac shutitaca chingachinga.

21Mandac Diosca chai runataca llaquichingapacmi tucui Israel aillucunamanta chicanyachinga. Llaquichingapac ari nishcata cai mandashcacunata quillcashca libropi nishca shinami yallita llaquichinga.

22Cancunapac churicunapish, huahua huahuacunapish, caru llacta runacunapish Mandac Dios cai llactaman jatun plagacunata, jatun ungüicunata cachashcata ricushpaca:

23“Azufrehuan, cachihuan rupashca allpaca imata tarpucpipish mana pucungachu. Ima quihuapish mana huiñangachu. Sodoma, Gomorra, Adma, Zeboim, llactacuna shinami tucushca. Chai llactacunataca Mandac Diosmi nina japiric shina piñarishpa, tucui tucuchirca” ninga.

24Chaita tucui llactacunapi causaccuna tapushpaca: “¿Imamantatac Mandac Diosca cai llactataca cashna ruhuarca? ¿Imamantatac Diosca nina japiric shina piñarirca?” ningami.

25Chashna tucucpi, maijancunaca: “Ñaupa taitacunapac Mandac Dios Egipto llactamanta llucchimushpa, ari nishcata cungarishcamantami chashna tucushca.

26Paicunaca manapish adorana, manapish ricsishca dioscunata servishpa adorangapacmi rishca.

27Chaimantami Mandac Diosca chai llactapi causaccunahuan nina japiric shina piñarishpa, cai libropi sinchita nicushca shina, llaquicunahuan llaquichishca.

28Chashna yallita piñarishpa, mana ricunayachishpami paicunataca llactamanta sapindi aisac shina, Mandac Diosca shuctac llactacunaman catishpa cachashca. Chaitami cunanca ricunguichic” ninga.

29Imapish pacallacunaca ñucanchic Mandac Diospacmi. Ashtahuanpish cai ricuchishcacunaca ñucanchicpacpish, ñucanchic huahua huahuacunapacpishmi can. Cai mandashcacunapi tucui nishcacunatami huiñaita pactachina canchic.