1Davidca quimsa punzha quipami paipac runacunandi Siclag puebloman chayarca. Chaiman chayacpica, amalecitacunami shitashca pamba Neguevta rishpa, Siclag puebloman yaicushpa ninata japichishpa tucuchishca carca.
2Paicunaca huarmicunatapish, tucui chaipi causaccunatapish, huahuacunamanta pacha callarishpami, yuyaccaman prezushpa aparca. Shina apashpapish shucllatapish mana huañuchircacunachu.
3David paipac runacunandi chai puebloman chayashpaca, tucui rupachishcata, huarmicunatapish, churicunatapish, ushicunatapish, prezu apashcatami ricurca.
4Chaita ricushpami Davidpish, paihuan puric runacunapish huacanata mana pudingacaman caparishpa huacarca.
5Shinallatac Jezreel pueblomanta Ahinoamtapish, Carmel pueblomanta Nabalpac huarmi cashca Abigailtapish, apashcami carca. Cai ishcai huarmicunaca Davidpac huarmicunami carca.
6Davidtaca tucui gentecunami paicunapac huarmicunata, churicunata, ushicunata prezu apashcamanta, paicunapac shungupi yallita piñarishpa, rumicunahuan shitashun nicurca. Davidca yallitami llaquilla carca, shina cashpapish Mandac Diospi shunguta churashpami sinchiyarca.
7Chaipimi Davidca Ahimelecpac churi Abiatar curataca:
—Efodta ñucaman apamushpa cui— nirca.
Shina nicpimi, Abiatarca Davidman efodta apamurca.
8Shina apamucpimi, Davidca Mandac Diosta tapushpaca:
—¿Chai shuhuac runacunataca macangapac catishachu? ¿Catishpaca japi pudishachu?— nirca.
Shina tapucpimi Mandac Diosca:
—Catilla, japigringuimi. Prezu apashcacunatapish quichumunguimi— nirca.
9Shina nicpimi, Davidca paihuan puric sucta patsac runacunandi Besor huaicu yacuman chayarca. Paicunamanta maijancunaca chaipimi shuyarca.
10Davidca chuscu patsac runacunahuanmi catishpa rirca. Ashtahuanpish ishcai patsac runacunaca yallita shaicushca cashcamantami Besor huaicu yacutaca mana pasai pudishpa saquirirca.
11Pambapi Egipto llactamanta shuc runata tarishpami Davidpacman pusharcacuna. Chai runamanca tandatapish micuchun yacutapish ubiachunmi curcacuna.
12Shinallatac higo chaquishcamanta ruhuashca asha tandatapish, shinallatac chaquishca ishcai caspa uvastapish cararcami. Ña chaita micushca quipami paica sinchiyarca. Paica quimsa punzha, quimsa tutatami mana micushca, yacutapish mana ubiashca carca.
13Chai quipami Davidca:
—¿Pipac servictac cangui? ¿Maimantatac cangui?— nirca.
Shina nicpimi, Egipto runaca:
—Ñucaca amalecitacunapuramanta shuc runata servicmi cani. Ñuca ungucpimi, amoca caipi shitashpa rirca. Quimsa punzhatami caipi cani.
14Ñucanchicca Neguev pambapi causacuc cereteocunatapish, Judá llactapi causaccunatapish, Neguev pambapi causacuc Calebpac huahua huahuacunatapish llaquichircanchicmi. Shinallatac Siclag pueblotaca ninata churashpami rupachircanchic— nirca.
15Shina nicpimi Davidca:
—¿Chai shuhuac runacunapacman ñucanchicta pushai pudinguichu?— nishpa tapurca.
Shina nicpimi, chai runaca:
—Can ñucata mana huañuchingapac, ñuca amopac maquipipish mana churangapac Diospac shutipi ari nicpica, chai shuhuac runacunapacman pushashallami— nirca.
16Chai runa pushashpa ricpica, chai shuhuac runacuna tucui chai pambapi caipi chaipi micushpa, ubiashpa, fiestata ruhuashpa tiyacuctami japirca. Filisteocunapac llactamanta, Judá llactamanta shuhuashpa apashcacunahuanmi yallita cushicushpami tiyacurca.
17Chaipimi Davidca manarac alli achicyacpi macai callarishpaca, cayandi punzha chishiyangacaman chugrishpa huañuchirca. Chai runacunamantaca shucllapish mana atircachu. Ashtahuanpish chuscu patsac mosocunallami camellocunapi montashpa ati rirca.
18Shinami Davidca amalecitacuna shuhuashcatapish, paipac ishcai huarmicunatapish quichurca.
19Tucui shuhuashcacunataca uchillatapish, jatuntapish, churicunatapish, ushicunatapish tucui shuhuashpa aparishcamantaca tucuitami quichumurca. Chashnami Davidca tucui pai charishcacunata cutichimurca.
20Shinallatac tucui ovejacunatapish, huagracunatapish Davidca japircami. Chaimantami chai animalcunata ñaupachishpa apariccunaca: «¡Caicunaca David quichumushcacunami!» nirca.
21Davidca yallita shaicushpa, paita mana cati pudishpa saquirishca ishcai patsac runacunapacmanmi cutirca. Paicunaca Besor yacu huaicu patapimi saquirirca. Chai runacunaca Davidtapish, paihuan shamuc runacunatapish tupangapacmi llucshirca. Paicuna chashna llucshicpimi, Davidca ¿Allillachu canguichic? nishpa cushi causaita charichic nirca.
22Ashtahuanpish Davidhuan macanacuiman rishcapuracunamanta mana allita ruhuac millai runacunaca: «Cai runacuna ñucanchic-huan macanacuiman mana rishcamantaca ñucanchic quichumushcataca mana cushunchu. Ashtahuanpish paicunapac huarmicunata, huahuacunallatami cushun. Chaita chasquishpa paicunapac huasiman richun» nirca.
23Shina nicucpimi Davidca:
—Ñuca huauquicunalla, ama chashna ruhuaichicchu. Caicunataca Mandac Diosmi ñucanchicman curca. Paillatacmi ñucanchicta cuidashpa shuhuac runacunatapish ñucanchic maquipi churarca.
24Cancunapac yuyaitaca pipish mana uyangachu. Macanacuiman riccunapish, shinallatac charishcacunata cuidangapac saquiriccunapish chashnallatacmi japinga. Tucui mashnami chashna chaupishcata pacta pacta japingacuna— nirca.
25Cai mandashcaca chai punzhamanta pacha cunan punzhacamanmi Israel llactapica shuc mandashca tucushca. Cai mandashcataca pactachishpami catincuna.
26Siclag pueblopi David chayashpaca, macanacushpa quichumushcacunataca Judá llactapi causac yuyaccunamanpish, paipac ricsishcacunaman cuchun cachashpaca: «Riqui, caicunatami canman carani. Caicunaca Mandac Diosta piñaccunamanta quichumushcacunami» nirca.
27Chai quichumushcataca Bet-el pueblopi, shitashca pamba Neguevpi cac Ramot pueblopi causaccunamanpish cacharcami. Jatir,
28Aroer, Sifmot, Estemoa,
29Racal pueblocunapi, Jerameel llactapi cac pueblocunapi, ceneocuna causac pueblocunamanpish cacharcami.
30Shinallatac Horma, Corasán, Atac,
31Hebrón pueblocunapi causaccunamanpish cacharcami. Maipimi paipac runacunahuan David purishca pueblopi causaccunamanpish cacharcami.
Who We AreWhat We EelieveWhat We Do
2025 by iamachristian.org,Inc All rights reserved.
