1¡Aij, Etiopía llacta
jatun yacu chimba ladopi,
alascuna huaj nicuc llactalla!
2Paicunaca Nilo yacupimi
huillaccunataca carrizo
barcopi cachan.
Yallita callpac huillagriccunalla,
jagan nicuc manchana
jatun runapacman richicyari.
Paicunaca tucuipac manchana,
yallita llaquichishpa manchachic,
llactacunata quichuc
sinchi runacunami.
Paicunapac llacta muyunditaca
jatun yacucunami ricun.
3Tucui cai pachapi causaccuna
urcucunapi banderata
shayachishcata ricuichic.
Cornetapi tocashcata uyaichic.
4Mandac Diosca: «Ñuca mandacuc
huasimantaca tamyashca
quipa inti sumacta
achicyachic shina,
cosechana punzhacunapi
tamya puyu shinami,
casilla tiyarishpa ricusha.
5Cosecha punzhacuna
manarac chayacpi,
sisa ña urmashpaca uvasmi pucun.
Chai quipami pitina cuchillohuan
ramacunata pitishpa anchuchinga.
6Chai ramacunataca urcupi causac
volac animalcuna,
cai pachapi tiyac animalcuna
micuchunmi saquinga.
Chaipimi usyai punzhacunapica
urcupi causac volac animalcuna,
cutin tamya punzhacunapica
cai pachapi tiyac sacha animalcuna
micunga» ninmi.
7Chai punzhapi jagan nicuc
manchana jatun runacunaca
tucuita Mandac Diosman cungapacmi
ofrendata apamunga.
Paicunaca yallita llaquichishpa,
llactacunata quichuc
sinchi runacunami ricun.
Paicunapac llacta muyunditaca
jatun yacucunami.
Chai llactapi causaccunami
tucuita Mandac Dios ñucapac shutipi
mañangapac Sión urcuman shamunga.
Who We AreWhat We EelieveWhat We Do
2025 by iamachristian.org,Inc All rights reserved.