1 CRÓNICAS 9 - Biblia Quichua Cañar 2010

Babilonia llactamanta cutimushcamanta(Neh 11.1-24)

1Tucui israelcunataca ñaupa taitacunapac huahua huahuacunata catishpami yuparca. Chai shuticunaca Israel llactata jatun mandaccunapac libropimi quillcashca tiyacun.

Judá llactapi causaccunataca Diosta mana cazushcamantami Babilonia llactaman prezu aparca.

2Paicunapac allpacunapi, pueblocunapi causangapac punta cutimuc israelcunaca curacuna, levitacuna, Diospac huasipi servishpa causaccunami carca.

3Jerusalenpica Judapac Benjaminpac, Efrainpac, Manasespac maijan huahua huahuacunami causai callarirca.

4Judapac huahua huahuapuramantaca Utaimi cutimurca. Paica Amihudpac churi, Amihudca Omripac churi, Omrica Imripac churi, Imrica Banipac churimi carca. Banica Farespac huahua huahuapuramantami carca. Faresca Judapac churimi carca.

5Silo pueblopi causaccunapuramantaca punta churi Asaiasmi paipac churicunandi cutimurca.

6Zerapac huahua huahuapuramantaca Jeuelmi paipac aillucunandi cutimurca. Paicunaca sucta patsac iscun chunga runacunami cutimurca.

7Benjaminpac huahua huahuapuramantaca Salú, Saluca Mesulampac churi, Mesulamca Hodaviaspac churi, Hodaviasca Asenuapac churimi cutimurca.

8Jerohampac churi Ibneías, Uzipac churi Elami cutimurca. Uzica Micripac churimi carca. Sefatiaspac churi Mesulampish cutimurcami. Sefatiasca Reuelpac churimi carca. Reuelca Ibniaspac churimi carca.

9Paicunapac huauquicunapac huahua huahuacunata catishpa yupashpaca iscun patsac pichca chunga sucta runacunami carca. Paicunaca ñaupa taitacunapac huasi ucupura familiacunata mandaccunami carca.

10Curacunapuramantaca Jedaías, Joiarib, Jaquín,

11Hilciaspac churi Azariasmi cutimurca. Hilquiasca Mesulampac churi, Mesulamca Sadocpac churi, Sadocca Meraiotpac churi, Meraiotca Ahitobpac churimi carca. Paimi Diospac huasipi curacunata mandac carca.

12Shinallatac Jerohampac churi Adaías, Jerohamca Pasurpac churi, Pasurca Malquiaspac churi, shinallatac Adielpac churi Masai curapish shamurcami. Adielca Jazerapac churi, Jazeraca Mesulampac churi, Mesulamca Mesilemitpac churi, Mesilemitca Imerpac churimi carca.

13Paicunapac huasi ucupuracunata mandac curacunaca shuc huaranga canchis patsac sucta chunga curacunami shamurca. Paicunaca Diospac huasipi allita servic curacunami carca.

14Levitapuramantaca Hasubpac churi Semaiasmi shamurca. Hasubca Azricampac churimi carca. Merari familiapuramanta Azricamca Hasabiaspac churimi carca.

15Bacbacar, Heres, Galal, Micaiapac churi Mataniaspishmi shamurca. Mataniasca Zicripac churi, Zicrica Asafpac churimi carca.

16Semaiaspac churi Abdiaspish shamurcami. Semaiasca Galalpac churi, Galalca Jedutunpac churimi carca. Asapac churi Beriquiaspish shamurcami. Asaca Alcanapac churimi carca. Paica netofatitacunapac muyundi uchilla llactacunapimi causarca.

17Diospac huasita cuidaccunaca Salum, Acub, Talmón, Ahimanmi paicunapac huahua huahuacunandi shamurca. Paicunataca Salummi mandacurca.

18Diospac huasiman jatun mandac yaicuna pungupi levitapuramanta cuidaccunaca cunan punzhacamanmi cuidacun. Chai punguca inti llucshina ladomanmi.

19Corepac churi Salumpish, paipac taita Corepac caishuc churicunapish ñaupa taitacunapac huasi ucupurata mandaccuna shinami Mandac Dios-huan tupana huasi pungupi cuidashpa servircacuna. Coreca Ebiasafpac churimi carca. Ebiasafca Corepac churimi carca.

20Utcapica Eleazarpac churi Fineasmi paicunataca mandacurca. Mandac Diosca paihuanmi carca.

21Meselemiaspac churi Zacariasca Dios-huan tupana huasi pungupimi cuidacurca.

22Pungupi cuidachun tucui acllashcacunaca ishcai patsac chunga ishcai runacunami carca. Paicunapac llactacunapimi paicunapac huahua huahuacunata catishpa yuparca. Paicunataca Davidhuan, Dios imata ricuchishcata huillac Samuelhuanmi cuidachun churarca.

23Chashnami paicunapish, churicunapish Mandac Dios-huan tupana huasiman yaicuna pungupica chullayanacushpa cuidarcacuna.

24Chai cuidaccunaca jahua ladomanpish, ura ladomanpish, cai ladomanpish, chai ladomanpish chuscu ladomanmi cuidarca.

25Muyundi uchilla llactacunapi causac paicunapac huauquicunaca cada canchis punzhami paicunaman cuidana tucucpica, cuidangapac shamuccuna carca.

26Pungupi cuidaccunata mandac chuscu levitacunaca Diospac huasi ucutapish, chaipi tiyac valishcacunatapishmi cuidacurca.

27Paicunaca Diospac huasita tucui tutamanta punguta pascaccuna cashcamantami Diospac huasi muyundipi causarcacuna.

28Paicunapuramanta maijancunaca Diospacta ruhuana imallacunatami cuidarcacuna. Chaimantami llucchingapacpish, huacaichingapacpish yupac carcacuna.

29Maijancunaca Diospaclla huasipi shuctac ima tiyashcacunata, vasocunata, harinata, vinota, aceiteta, inciensota, mishquilla ashnacuccunatapishmi cuidacurca.

30Maijancunaca mishquilla ashnacuc jambicunatami ruhuacurca.

31Coreitacunapuramanta Salumpac punta churi Matatías levitaca sartenpi cusacta mandacmi carca.

32Cohatpac huahua huahuapuramanta maijancunaca paicunapac huauquicunahuanmi samana punzhapi Diosman cuna tandata sumacta churac carcacuna.

33Cutin levita huasi ucupuracunata mandac cantaccunaca Diospac huasi ucucunapimi causacurca. Paicunaca tutapish, punzhapish Diosta cantac cashcamantami ashtahuan imata mana ruhuac carcacuna.

34Paicunaca levitacunapac huahua huahua familiacuna ima shina cashca shinallatac mandaccunami carca. Chai mandaccunaca Jerusalenpimi causacurca.

Saulpac ñaupa taitacunapac shuticunamanta

35Gabaón pueblopica chai pueblopi causaccunapac ñaupa taita Jehielmi causarca. Paipac huarmica Maacami carca.

36Paipac punta churica Abdonmi carca. Quipa churicunaca Zur, Cis, Baal, Ner, Nadab,

37Gedor, Ahío, Zacarías, Miclotmi carca.

38Meclotca Simeam churitami charirca. Paicunapish Jerusalenllapitac paicunapac huauquicunapac chimba ladopimi causarca.

39Nerca Cis churitami charirca. Cisca Saúl churitami charirca. Saulca Jonatán, Malquisúa, Abinadab, Es-baal churicunatami charirca.

40Jonatanpac churica Merib-baalmi carca. Merib-baalca Micaías churitami charirca.

41Micaiapac churicunaca Pitón, Melec, Tarea, Acazmi carca.

42Acazpac churica Jarami carca. Jarapac churicunaca Alemet, Azmavet, Zimrimi carca. Zimripac churica Mosami carca.

43Mosapac churica Binami carca. Binapac churica Refaiasmi carca. Refaiaspac churica Elasami carca. Elasapac churica Azelmi carca.

44Azelca sucta churitami charirca. Paicunaca Azricam, Bocru, Ismael, Searías, Obadías, Hananmi carca. Caicunami Azelpac churicuna carca.