NÚMEROS 30 - Biblia Quichua Cañar 2010

Diospacta ruhuangapac ari ninamanta

1Moisesca Israel aillucunata mandaccunataca: «Mandac Diosca:

2“Maijanpish Mandac Dios ñucapacta ruhuasha nishpa, mana cashpaca quiquin shimihuan ari nishpaca pactachinatacmi can. Pai imata ruhuangapac nishca shinallatacmi ruhuana can.

3Taitapac huasipi causac shuc soltera Mandac Dios ñucaman imata ruhuangapac ari nishca cacpi,

4chaita paipac taita yachac chayashpa, imata mana nicpica, pai imata ruhuasha nishcataca pactachinatacmi can.

5Paipac taita ima punzha yachac chayashpa, chai soltera ñucaman imata ruhuangapac ari nishcata jarcacpica, taita jarcashcamanta Mandac Dios ñucaca perdonashami.

6Ashtahuanpish cazada huarmi Diospacta ruhuangapac paipac shimihuan imata ruhuangapac ari nishca cacpi,

7ima punzha paipac cusa yachac chayashpa, mana imata nicpica, pai ñucapacta ruhuangapac ari nishcataca pactachinatacmi can.

8Ashtahuanpish paipac cusa ima punzha yachac chayashpa jarcacpica, chai huarmi ñucapacta ruhuangapac ari nishcataca mana pactachishpa saquinallami. Chaitaca ñucaca perdonashami.

9Maijan viuda huarmi, mana cashpaca cusa shitashca huarmi ñucapacta ruhuangapac ari nishcataca pactachinatacmi can.

10Cusayuc huarmi paipac cusapac huasipi ñucapacta ruhuangapac ari nishcata,

11paipac cusa yachac chayashpa, mana jarcacpica, ari nishcataca mana saquishpa pactachinatacmi can.

12Ashtahuanpish paipac cusa ima punzha yachac chayashpa jarcacpica, pai ari nishcataca mana pactachishpa saquinallami can. Chai ari nishcata pactachinata cusa jarcashcamantaca ñucaca perdonashami.

13Ñucapacta imata ruhuashatacmi nishcatapish, pai ari nishcatapish cusami ruhuachun ninga, mana cashpaca saquichun ninga.

14Ashtahuanpish ñucapacta ruhuasha nishcata paipac cusa yachac chayashpa, punzhanta mana imata nicpica, pactachinatacmi can. Ñucapacta ruhuangapac ari nishcata ima punzha yachashpapish mana imata nicpica, pactachina cashcatami nicun.

15Ashtahuanpish ari nishcata maijan punzhacuna quipa yangapi churashpaca, paimi huarmipac juchamantaca llaqui tucunga” nishpami mandarca» nirca.

16Tucui cai mandashcacunaca shuc cazada huarmi cusa nishcata uyanamanta, shuc soltera paipac taitahuan causacushparac taita uyana cashcamanta Mandac Dios Moisesman mandashcacunami can.