NÚMEROS 35 - Biblia Quichua Cañar 2010

Levitacunapac llactacunamanta

1Jordán yacu ladopi, Jericó chimba ladopi cac Moab pambapi israelcuna causacucpi, Mandac Diosca Moisestaca:

2«Israelcunataca: “Cancuna allpata japishpaca, levitacunamanpish llactacunata, llacta muyundi michina pambacunatapish cunguichic.

3Chashna cucpimi, paicuna causangapac llactacunatapish, pueblo muyundi pambacunatapish huagracunata, tucui shuctac animalcunata michingapac charinga.

4Chai llacta muyundi michina pambacunataca pueblo muyundi pircashcamanta chuscu patsac pichca chunga metro anchota cunguichic.

5Llacta muyundi allpataca inti llucshina ladomanca iscun patsac metro, ura ladomanca iscun patsac metro, inti yaicunamanca iscun patsac metrota, jahua ladomanca iscun patsac metrota cunguichic. Chashna cucpimi, llactacunaca michina allpa chaupipi saquiringa.

6Levitacunaman cushca llactacunamanta sucta pueblocunaca maijanpish huañuchishpa miticuna llactami canga. Caicunapac jahuapi chuscu chunga ishcai llactacunata cunguichic.

7Chaica chuscu chunga pusac llactacuna, michina pambacunandimi levitacunapac canga.

8Israelcuna japishca shinallatacmi levitacunapish japina can. Jatun ailluca achcatami japinga, uchilla ailluca ashatami japinga” ningui» nirca.

Miticuna llactacunamanta(Dt 19.1-13)

9Mandac Diosca Moisestaca:

10«Israelcunataca: “Cancuna Jordán yacuta pasashpa Canaán llactaman chayashpaca,

11manapish huañuchina munaihuan cashpa, maijanta huañuchishpa miticugrina llactata acllanguichic.

12Chai llactacunapimi huañuchicca huañucpac familiacunamanta miticugringa. Chaipimi tandanacushca israelcuna tapushpa taripangacaman miticugringa.

13Levitacunaman cushca llactacunamantaca sucta pueblocunami miticuna canga.

14Miticuna llactacunataca quimsataca Jordán yacumanta inti llucshina ladopi, cutin quimsataca Canaán llactallapitac cunguichic. Caicunami miticuna pueblocunaca canga.

15Chai llactacunami israelcunapacpish, ima mana charic carumanta shamushpalla causaccunamanpish manapish huañuchina munaihuan huañuchishpa, huañucpac familiamanta miticuna canga.

16Maijanpish fierrohuan chugrishpa huañuchicca huañuchic runa nishcami canga. Paipish huañuchishcami canga.

17Maijanpish rumihuan huactashpa huañuchicca huañuchic runa nishcami canga. Paipish huañuchishcami canga.

18Maijanpish huañuchinalla caspihuan huañuchicca huañuchic runa nishcami canga. Paipish huañuchishcami canga.

19Huañucpac maijan familiami chai huañuchic runataca maipipish tupashpaca huañuchinga.

20Maijanpish piñashpa tangashpa, mana cashpaca imahuan shitashpa,

21mana cashpaca piñanacushca cashcamanta maquihuan huactashpa huañuchicca huañuchic runa nishcami canga. Paipish huañuchishcami canga. Huañucpac maijan familiami chai huañuchic runataca maipipish tupashpa huañuchinga.

22Ashtahuanpish mana piñanacushca cashpa tangashpa, mana cashpaca imahuanpish shitashpa,

23mana cashpaca paita mana ricushpa, jatun rumita singuchishpa huañuchishpapish mana piñanacushca cashcamantachu huañuchin. Chaimantami chai huañuchic runataca

24tucui israelcuna tandanacushpa, ima shina chai huañui tiyashcata ricunga. Chashna tapushpaca, huañuchishcamantaca mandashcapi nishca shinami, cashcata ruhuashpa taripanga.

25Tandanacushca israelcunami chai runataca ima shina huañuchishcata tucui taripashpa, huañucpac familiacunamanta miticuna llactaman cutichishpa cachanga. Chai huañuchic runaca aceitehuan cahuishca curacunata mandac cura huañungacamanmi chai llactapi canga.

26Huañuchic runa miticuna llactamanta llucshishpa carupi puricucpi,

27huañucpac familia llactamanta carupi puricucpi, tupashpa huañuchishpaca mana juchanchishcachu canga.

28Chaimanta chai huañuchic runaca curacunata mandac cura huañungacaman chai miticuna llactallapitac causana can. Cura ña huañucpimi, pai causana llactaman cutinga.

Testigocunamantapish, huañuchishpaimata mana cuipac cashcamanta

29Cai mandashcacunaca cancunapacpish, cancunapac huahua huahuacunapacpishmi can. Cancuna maipi cashpapish tucui chai mandashcacunatami ruhuana canguichic.

30Huañuchic runataca tauca testigocuna huillacpimi, paitapish huañuchinga. Ashtahuanpish shuclla huillac cacpica, pita cashpapish mana huañuchinachu.

31Huañuchic runa mana huañuchishca cangapac cullquita cusha nicpica, ama japinguichicchu. Paica huañunatacmi can.

32Curacunata mandac cura manarac huañucpi, chai huañuchic runa miticuna llactamanta cullquita cushpa, paipac llactaman cutisha nicpica, ama japinguichicchu.

33Cancuna causacushca llactataca ama mapayachinguichicchu. Maijanta huañuchishpa, yahuarta jichashcamantami chai llactaca mapayashca canga. Chashna mapayashcaca chai huañuchic runata huañuchicpimi, mapa illac saquiringa.

34Cancuna causacushca llactataca ama mapayachinguichicchu. Ñucapish chai llactapimi cancunahuan causacuni. Mandac Dios ñucaca israelcunapac chaupipimi causani” ninmi ningui» nirca.