JEREMÍAS 21 - Biblia Quichua Cañar 2010

Jerusalén llaqui tucunamanta

1Judá llactata jatun mandac Sedequiasca Malquiaspac churi Pasurta, Maasiaspac churi Sofonías curatami Jeremiaspacman cacharca. Paicunata cachashpaca:

2«Babilonia llactata jatun mandac Nabuconodosormi ñucanchic-huan macanacungapac shamushca. Chaimanta cunan, Mandac Diosta ñucanchicmanta tapuiyari. Chai jatun mandac ñucanchicmanta anchurichun, Diosca jatun poderta charishcamanta imapish mancharinacunata ruhuangapishchari» nirca.

Chashna cachacpimi, Mandac Diosca Jeremiasta rimarca.

3Chaimantami Jeremiasca paicunataca: «Jatun mandac Sedequiastaca:

4“Israelcunata Mandac Diosca: Babilonia llactata jatun mandac-huan macanacuc cancunapac soldadocunata, jatun pirca muyundipi chapacuc caldeocunataca cancunapacllamantac cutichimushpami, cai llacta chaupiman chayachimusha.

5Ñucaca nina japiric shina piñarishpami, poderyuc ñuca maquita alzashpa, cancunahuanca macanacusha.

6Cai llactapi causaccunataca yallitami llaquichigrini. Gentecunapish, animalcunapish yallita ungüihuanmi huañunga.

7Chai quipaca Judá llactata jatun mandac Sedequiastapish, paita serviccunatapish, shuctac gentecunatapish, chai ungüihuan, yarcaihuan mana huañushpa, cai llactapi saquirishcacunatapish, jatun macanacuipi mana huañushcacunatapish Babilonia llactata jatun mandac Nabucodonosorpac maquipimi churasha. Paicunata piñashpa, huañuchinata munaccunapac maquipi churacpica, mana llaquishpami espadahuan huañuchinga. Shucllatapish mana saquingachu. Shucllatapish mana llaquingachu” ninmi ninguichic.

8Mandac Diosca chai gentecunataca: “Cancunapac ñaupapica causana ñanta, shinallatac huañuna ñantami churani.

9Cai llactapi saquirishcacunaca jatun macanacuipi yarcaihuan, jatun ungüihuanmi huañunga. Ashtahuanpish caimanta llucshishpa, cancunapac muyundipi chapacuc caldeocunapacman maijanpish rishpaca causangami. Paicunapac maquipi yaicushpaca mana huañungachu.

10Ñucaca cai llactataca allita ruhuanapac randica, llaquichinatami yuyarircani. Babilonia llactata jatun mandacpac maquipimi churagrini. Paimi rupachishpa tucuchinga” ninmi.

11Judá llactata jatun mandacpac huasi ucupurataca:

“Mandac Dios rimashcata uyaichic.

12Davidpac huasi ucupurataca:

Ima llaquicunataca

tucui tutamanta allichichic.

Llaquichishca runataca

llaquichic runapac maquimanta

cacharichishpa, allita ruhuaichic.

Cancuna mana allita ruhuashcamanta

nina japiric shina,

ñuca ama piñarichunmi

chashna ruhuana canguichic.

Chai ninataca pipish

mana huañuchi pudingachu.

13Pugru pamba chaupipi tiyac

jatun rumi jahuapi causaccunalla,

ñucallatacmi cancunataca

llaquichingapac shayarini.

Cancunaca: ‘¿Pitac ñucanchic-huan

macanacungapac shamui pudinga?

Ñucanchic causacuc pushtumanca,

¿pitac yaicui pudinga?’ ninguichicmi.

14Ñucaca cancuna mana allita

ruhuashca shinallatacmi

llaquichigrini.

Ñucami paipac sachapi tiyac

yuracunataca ninata japichishpa

rupachisha.

Chai ninami paipac muyundipi

tucui tiyaccunatapish

tucuchinga” ninmi ningui» nirca.