DEUTERONOMIO 26 - Biblia Quichua Cañar 2010

Punta pucushca granota cunamanta

1Mandac Dios cushca llactaman yaicushpa, chaipi causacushpaca,

2punta pucushca granota shuc canashtapi churashpa, Mandac Dios paipac shuti causachun acllashca pushtuman apanguichic.

3Chaita, chai punzhapi servicuc curaman cushpaca: “Cunanmi Mandac Dios ñucanchic ñaupa taitacunaman cungapac ari nishca llactapi causacunchic” ninguichic.

4Cura chai canashtata japishpa, Mandac Diospac altar ñaupapi churacpi,

5cancuna Mandac Diospac ñaupapi rimashpaca: “Ñaupa taitaca llaquita puric arameo runami carca. Paica Egipto llactaman rishpami chaipi causarca. Paica ashalla familia cashpapish mirashpa, jatun llacta tucushpami, yalli sinchicuna tucurca.

6Egipto runacunaca yallita servichishpami llaquichirca. Sinchitami trabajachirca.

7Chaipimi ñaupa taitacunata Mandac Diosta mañarcanchic. Paica ñucanchic mañashcata uyashpami sinchita trabajacushcata shinallatac ñucanchic llaquita causacushcata ricurca.

8Chaimantami Mandac Diosca paipac poderhuan, jatun milagrocunata ricuchishpa, pi mana ruhuaipaccunata ruhuashpa, Egipto llactamantaca llucchimurca.

9Chashna caiman apamushpami lechepish, mishquipish yacu shina tiyac cai sumac llactata curca.

10Mandac Dioslla, can cushca allpapi punta pucushcatami apamunchic” ninguichic.

Chai canashtata Mandac Diospac ñaupapi churashpa, cancunata Mandac Diosta alli nishpa cumuringuichic.

11Chai quipaca cancunamanpish, cancunapac familiamanpish Mandac Dios tucui allicunata cushcamantami levitacunahuanpish, cancunahuan causac shuctac llacta runacunahuanpish cushicuna canguichic.

Huacchacunaman ima illashcata cuna cashcamanta

12Cada quimsa huatami chungamanta shucta cuna huata. Chaicunata cushca quipaca levitacunaman, carumanta shamushcacunaman, taita mama illaccunaman, viudacunaman cunguichic. Chashna cucpimi, cancunapac llactapi causaccunaca huicsa pactata micunga.

13Chaimanta Mandac Diostaca: “Ñami cambaclla chicanyachishcataca ñucanchic huasimanta llucchimunchic. Can mandashca shinami levitacunamanpish, carumanta shamushcacunamampish, taita mama illaccunamanpish, viudacunamanpish curcanchic. Can mandashcacunataca mana cungarishpami tucuita pactachircanchic.

14Chaicunataca huañuimanta llaquilla cashpapish mana micushcanchicchu, mapa cashpapish imata mana ruhuashcanchicchu, huañushcacunamanpish mana carashcanchicchu. Ñucanchicta Mandac Dios nishcata ruhuashpami tucui pai mandashcacunata pactachishcanchic.

15Can tiyacuc sumaimana jahua pachamanta can acllashca israelcunatapish, ñucanchic taitacunaman cungapac ari nishca allpatapish bendiciaiyari. Chai allpaca lechepish mishquipish yacu shina callpacucmi” ningui.

16Mandac Diosca cunan mandashcacunatapish, pactachinacunatapish cazuchunmi mandan. Caicunataca tucui shunguhuan, tucui almahuan yuyarashpa cazunguichic.

17Cunanmi cancunallatac tucuipac ñaupapi: “Mandac Diosca ñucanchic Diosmi” nishcanguichic. Shinashpaca pai munashca shina causashpa, mandashcacunatapish, pactachinacunapish cazushpa, pai ima nishcata uyanguichic.

18Mandac Dios pai munashca shina, cancunata rimashpaca: “Ñucapaclla acllashcami canguichic” nishcami. Tucui pai mandashcacunata cazuchunmi chashna acllashca.

19Cancunataca tucui pai ruhuashca llactacunamanta ashtahuan yalli cachun, tucuipac ricsishca, tucuipac alli nishca llacta cachunmi Mandac Diosca pai munashca shina acllashca ninguichic» nirca.