DEUTERONOMIO 19 - Biblia Quichua Cañar 2010

Miticuna llactacunamanta(Num 35.9-28)

1Mandac Dios cugricuc llactacunapi causaccunata tucuchishpa, cancunaman cucpica, cancunaca llactacunapi, huasicunapi causanguichic.

2Mandac Dios cushca llactata cancunaman cucpica, quimsa llactacunata chicanyachinguichic.

3Mandac Dios cushca llactataca quimsapi chaupishpa, chai llactacunaman rina ñancunatapish allichinguichic. Maijan huañuchishpa, chai llactacunapi miticugrichunmi chicanyachina canguichic.

4Chai llactacunapimi maijan manapish piñashca cashpa, shuc runata huañuchishpaca miticugringa. Chaiman rishpami paipish mana huañuchishca canga.

5Chaica shuc runa paipac ricsishcahuan yantacushpa, hachahuan yurata piticucpi, hacha fierro cabomanta llucshishpa, ricsishca runata huañuchicpica, chai huañuchic runaca chai llactacunapi miticugrishpami, mana huañunga.

6Chai miticuna llacta yalli caru cacpi, huañuchishcamanta piñarishpa paitapish huañuchingapac cati rishpa, pacta huañuchinman. Paica manapish piñanacushca cashpami huañuchirca. Chaimanta paitaca mana huañuchinachu can.

7Chaimantami cancunataca quimsa llactacunata chicanyachichun mandani.

8Mandac Diosca cancunapac ñaupa taitacunaman cungapac ari nishca shinallatacmi chai llactataca ashtahuan mirachishpa, tucui allpacunata cancunaman cunga.

9Cai ñuca mandashcacunata yuyarashpa pactachinguichic. Mandac Diosta cuyashpa, punzhanta paita cazushpaca, cai quimsa llactacunamanta shuctac quimsahuanmi yapachinguichic.

10Chashna causashpami Mandac Dios cushca llactapica manapish faltayuc runapac yahuarta mana jichanguichic. Shinallatac cancunapish chai yahuarmanta mana juchanchishcachu canguichic.

11Maijanpish shuctac runata piñashpa, mana cashpaca huañuchishpa, chai chicanyachishca maijan llactaman miticungapac ricpica,

12cancunapac llactapi causac yuyaccunami chai pueblomanta llucchichun cachanga. Chashna llucchishpami paitapish huañuchichun huañucpac familiapac maquipi churanga.

13Chai runataca ama llaquinguichicchu. Chashna ruhuacpimi, israelpurapica manapish faltayucpac yahuarta jichacca mana tiyanga. Shinallatac cancunapish allita causanguichic.

14Mandac Dios cushca llactapi causacushpaca, ñaupa taitacuna churashca vecinopac linderocunata ama yaicuringuichu.

Llullac huillaccunamanta

15Ima llaquita, mana cashpaca ima juchata ruhuashcata shuc testigolla huillacpica, mana imata ruhuanachu can. Ashtahuanpish ishcai, mana cashpaca quimsa runa ricushpa huillacpimi, imatapish ruhuana can.

16Maijan shuc runata llaquichingaraicu llullashpa huillashpa juchanchicpica,

17ishcaitacmi Mandac Diospac ñaupapi, chai punzhapi cac curacunapacman, juezcunapacman rina can.

18Chaipimi juezcunaca tucui nishcata allita uyashpa, chai huillac paipac huauquita yangalla juchanchicushcata yachac chayashpa,

19pai juchanchishpa llaquichinata munashca shinallatac paitarac llaquichinga.

20Shina ruhuashcata caishuccuna uyashpaca, manchashpami cancunapac chaupipica mana ashtahuan millaita ruhuanga.

21Millaita ruhuaccunataca mana llaquishpami tucuchina canguichic. Maijan ñahuita surcucpica, paitapish ñahuita surcunguichic. Quiruta surcucpica, paitapish quiruta surcunguichic. Maquita, chaquita paquicpica, paitapish paquinguichic.