1Gaza llactapi causac filisteocunata jatun mandac Faraón manarac llaquichicpimi, Mandac Diosca filisteocunamanta pai ima nishcata huillac Jeremiasman huillarca.
2Mandac Dios huillashpaca:
«Jahua lado llactamantaca
yacu tendirishpa shamuc shina,
shamushpami cai llactatapish,
caipi ima tiyashcatapish,
llactatapish, chaipi
tucui causaccunatapish tapanga.
Shina tapacpica, tucui chaipi causac
gentecunami caparishpa huacanga.
3Caballocuna tulun nishpa
callpamucta uyashpa,
carreta ruedacuna huacashcata
uyashpami taitacunaca huahuacunata
shitashpa callpanga.
Yallita manchaihuan chucchushpami
imata mana ruhuai pudinga.
4Filisteocunatapish,
paicunata ayudac Tiro,
Sidón llactacunatapish
tucuchina punzhami chayamushca.
Mama cucha chaupipi tiyac
Caftor llactamanta chaupirishpa
shamushca filisteocunataca
Mandac Diosmi tucuchinga.
5Gaza runacunaca llaquirishpami,
uma acchata pitinga.
Ascalonpi causaccunaca tucuringami.
Pugru pambacunapi causaccuna,
¿ima horascamantac quiquin aichata
chugriringuichic?
6Mandac Diospac espadalla,
¿ima horastac samarigringui?
Espadalla, huacaichinapi
yaicushpa samariyari.
7Mandac Dios ñucallatacmi
Ascalón llactapi causaccunata,
mama cucha ladopi tiyac llactapi
causaccunata huañuchichun mandani.
Shina cacpica,
¿imamantatac samaringuiyari?» ninmi.
Who We AreWhat We EelieveWhat We Do
2025 by iamachristian.org,Inc All rights reserved.
