ECLESIASTÉS 5 - Biblia Quichua Cañar 2010

Manarac alli yuyarishpa Diosmancusha nishcamanta

1Diospac huasiman rishpaca, alli cangapac ringui. Imata mana yachac, mana entendic runacuna shina, animalta Diosman cushpa huañuchinapac randica, chaipi yachachishcata uyangapacmi ashtahuan cuchuyana cangui.

2Diospac ñaupapica manarac alli yuyarishpa ama rimaichu. Manarac alli yuyarishpaca ama imatapish ruhuashami nichu. Diosca jahua pachapimi, canca allpapimi cangui. Shina cashcamanta can imata ruhuaipacllata ari ningui.

3Yallita yuyaricucpica, sueñuimi shamun. Shinallatac yallita rimarishpaca, mana entendic runa shinami riman.

4Diosca yuyai illac runahuanca mana cushicunchu. Chaimanta paiman imata ruhuasha nishcataca ama unaiyashpa utca pactachingui. Imata ruhuasha nishcataca pactachinami cangui.

5Imatapish ruhuashami nishca jahua mana pactachinapac randica, upalla canami ashtahuan alli.

6Cambac shimillatac juchata ruhuachichunca ama saquinguichu. Diosmanta huillacpac ñaupapipish mana yachaimantami chashna ruhuashcani ama ninguichu. ¿Cambac rimashcahuan Diosta piñachicpi, pai piñarishpa can ruhuashcata tucui tucuchichunchu munangui?

7Chaica,

muscuc shina imatapish yuyacucpica,

yanga yuyaicunapish,

yanga rimaicunapish llucshinmi.

Ashtahuanpish canca Diosta manchai.

Allita ruhuashpa causanata paquishcamanta

8Maijan llactapi huacchacunata llaquichicucta, paicunaman cuna cashcata mana cushpa, mana allita ruhuacucta ricushpaca, ama mancharinguichu. Shuc mandactaca paita yalli mandacmi ricucun. Shinallatac chai mandacta ashtahuan yalli jatun mandacpish tiyanmi.

9Ashtahuanpish allpapi pucushcaca tucuipac allipacllatami. Jatun mandacpish chagracunapimi yuyaita churashpa causan.

10Cullquita munac runaca

mashnata charishpapish mana cushicunchu.

Ima charishcacunata munacca,

chai charishcamanta ima allita mana japinchu.

Chaipish yangallami.

11Ima allicuna achcayacpica,

chaita tucuchiccunapish achcayanmi.

Chaicunaca chayuc runamanca

¿ima allipactac canga?

Ñahui ricushcallahuanmi saquiringa.

12Trabajac runaca ashallata micushpapish, achcata micushpapish allimi sueñun. Ashtahuanpish chayuc runataca chai charishcacunami mana sueñucta saquin.

13Inti achicyachicuc cai pachapica yalli llaquitami ricurcani. Runa huacaichishca charishcacunaca, paipac llaquipacllatacmi.

14Chai charishcacunataca yangalla tucuchishpami, paicunapac huahuacunamanca imata mana cushpa, chushac maquillata saquincuna.

15Ima shinami mamapac huicsamanta lluchulla huacharin, chashnallatacmi tigran. Cai pachaman ima shina shamushca shinallatacmi cutin. Pai trabajashpa imata charishcamantaca imata mana apanchu.

16Caipish jatun mana allimi. Chaica cai pachaman ima shina shamushca shinallatac tigran. ¿Chashna yanga huaira aparichun trabajanaca imapactac alli?

17Chaipac jahuapish paipac tucui causai punzhacunapimi llaquihuan, nanaihuan yallita imatapish ruhuashpa, pura tutapi shina micun.

18Inti achicyachicuc cai pachapi llaquita trabajashcamantaca micushpa, ubiashpa, cushicushpa causana alli cactami ricurcani. Dios cushca tucui causai punzhacunapica chashna causana alli cactami ricurcani. Chaimi runa japinaca can.

19Shinallatac Dios runaman ima charinacunata, ima allicunata cushpaca, chaillamantatac micushpa causachun, paipac cashcata japishpa cushicuchunmi munan. Trabajashcamanta Dios cushcaca chaimi can.

20Diosllatac paipac shungupi yallita cushichicpimi, paipac causai punzhacunataca mana yuyarin.