1 CORINTIOS 7 - Biblia Quichua Cañar 2010

Cazarashcacuna ima shina causanamanta

1Cunanca cancuna quillcashpa, tapushcatami huillagrini. Mana cazarashpa causanaca allimi canman.

2Shina cacpipish, huainayana yalli tiyashcamantaca, caripish quiquin huarmita, huarmipish quiquin cusata charinami can.

3Cusapish quiquin huarmipi chayarinami can, huarmipish quiquin cusa chayarichun saquinami can.

4Huarmipac cuerpoca cusapacmi. Cusapac cuerpoca huarmipacmi.

5Chaimanta caishucpish, chaishucpish ama misarinacuichicchu. Shina cashpapish Diosta tucui shunguhuan mañangapacca, ishcaindita yuyarinacushpami, asha punzhacunacaman chayarinataca saquina canguichic. Chai quipaca Satanás huainayana yuyaita ama cuchun tandaringuichiclla.

6Caita nishpaca yuyaita cunillami, ashtahuanpish mana mandanichu.

7Ñucaca tucui caricuna ñuca shina causachunmi munani. Shina cacpipish, Diosca mana tucuimanchu chai poderta cushca, ashtahuanpish shucmanca shuctaclaya, caishucmanca shuctaclaya yuyaitami cushca.

8Mosocunapish, viudacunapish ñuca shina mana cazarashpa causanaca allimi canman ninimi.

9Shina cacpipish, mana jarcari pudishpaca cazarachunlla. Chai munailla purinapac randica, cazaranami ashtahuan alli.

10Ña cazarashca huarmica cusata ama shitachun nishpami mandani. Caitaca mana ñucachu nini, ashtahuanpish Apunchic Jesusmi mandan.

11Cusata shitashpapish, ama shuc-huan cazarachun, mana cashpaca cusallahuantac alli tucuchun, cusapish huarmitaca ama shitachun ninimi.

12Caishuccunamanta nishpaca, mana Apunchic Jesuschu nin, ashtahuanpish ñucami nini: Maijan huauquipac huarmi mana cric cashpapish, paihuan alli cacpica ama shitachun.

13Shinallatac maijan panipac cusa mana cric cashpapish, paihuan alli cacpica, ama shitachun.

14Cusaca huarmi cric cashcamantami Diospaclla tucunga. Mana cric huarmipish, cusa cric cashcamantami Diospaclla tucunga. Mana shina cacpica, paicunapac huahuacunaca mana cricpac huahuacuna shinami canman. Paicunaca Diospaclla causaccunapurami tucushcacuna.

15Ashtahuanpish cari cashpa, huarmi cashpa, mana cric cashcamanta shitasha nishpaca, shitachunlla. Chaica, cric huauquipish, cric panipish mana llaquilla causanachu can. Diosca ñucanchictaca cushilla causachunmi cayarca.

16Can huarmi, ¿cambac cusata ima shina quishpichinata yachanguichu? ¿Can cusapish cambac huarmita ima shina quishpichinata yachanguichu?

17Ashtahuanpish Apunchic Jesucristo cancunaman imata ruhuachun yuyaita cushca shina, Dios cancunata acllai punzha ima shinami carcanguichic, chai shinallatac causanguichic. Tandanacushca criccunataca maipipish chai shinallatacmi mandani.

18Maijanpish Dios cayacpica, circuncisionta ruhuashca cashpapish, circuncisionta ama pacachun. Cutin mana circuncisionta ruhuashca cashpapish, Dios cayacpica, ama circuncisionta ruhuachun.

19Diosmanca circuncisionta ruhuashcapish, mana ruhuashcapish mana ima canchu, ashtahuanpish pai mandashcacunata cazuchunmi munan.

20Dios cayacpi ima shinami carcanguichic, chai shinallatac caichiclla.

21Can servic cashpapish, canta Dios acllacpica, ama llaquiringuichu. Ima punzha servinata saquinalla cacpica saquinguillami.

22Maijan servic cashpapish, Apunchic Jesusta crishpaca, ña mana servicchu can, ashtahuanpish cunanca Apunchic Jesusta servicmi. Maijan mana servic cashpapish, cunanca Apunchic Jesusta servicmi.

23Diosca tucuimanta yalli valic-huanmi, cancunataca paita servichun randirca. Chaimanta runacunallata servishpa ama huatashca shina causaichicchu.

24Cuyashca criccuna, Dios cancunata acllacpi, ima shinami carcanguichic, chai shinallatac paipac ñaupapica paita caticunguichiclla.

25Carihuan manarac chayarishca solteracunata yachachingapacca, Apunchic Jesús mandashcataca mana charinichu. Shina cashpapish Apunchic Jesús cuyashcamantami, ñuca yuyaimanta caitaca chashna nini. Chaitaca tucui shunguhuan uyaichicyari:

26Llaqui punzhacunapi causacushcamantaca manarac cazarashcacunaca chashnallatac catichun.

27Cazarashca cashpaca, ama huarmita shitaichu. Mana cazarashca cashpaca ama cazarachun.

28Cazaranapish mana juchachu. Shinallatac soltera cazarashpapish mana juchallinchu. Shina cacpipish, cazaraccunaca llaquitami cai pachapi apancuna. Chai llaquicunata charichunca, ñucaca mana munanichu.

29Cuyashca criccuna, ñucaca caitami nisha nini: Cai pachapica mana unai huatacunatachu causashun. Chaimanta huarmiyuc caricunaca, mana huarmiyuc cashca shina causachun.

30Huacaccunaca, mana llaquilla cashca shina cachun. Cushilla caccuna, mana cushilla shina cachun. Ima randishpapish mana randishca shina cachun.

31Cai pachapi ima tiyashcahuan cushicuccunaca ama cushicuchun. Cai pachapi ima tiyashcacunaca chingaringallami.

32Cancuna llaquilla causachunca mana munanichu. Mosoca Apunchic Jesusta servishpa, paillata cushichinatami munan.

33Ashtahuanpish cazarashca runaca huarmita cushichingapacmi, cai pachapi ima tiyashcallata yuyashpa causan.

34Chashnami paicunaca ishcailayata yuyan. Solteraca Apunchic Jesusta servingapacmi cuerpopipish, espiritupipish Diospaclla canata munan. Ashtahuanpish cazarashca huarmica cusata cushichingapacmi, cai pachapi ima tiyashcallata yuyashpa causan.

35Caicunata mana cancunata jarcangapac, ashtahuanpish cancunapac allipacmi nini. Tucui shunguhuan Apunchic Jesusta servishpa, ima shina causana cashca shina causachun chashnaca nini.

36Maijanpish paipac ushi cazarana tiyashca jahua, unai huatacunata mana cazarashpa causana mana alli cacpica, cazarachichunlla. Cazaranaca mana juchachu.

37Shina cashpapish maijan soltera paipac shungupi munashca shina, mana cazaranaca allimi nishpa yuyashpaca allitami ruhuan.

38Shinashpaca maijanpish paipac ushita cazarachishpaca, allitami ruhuan. Mana cazarachishpapish, ashtahuanmi allita ruhuan.

39Cusayuc huarmica cusa causacucpica, mandashcapi nishca shinaca maita mana chicanyaipacmi, ashtahuanpish cusa huañucpica, Apunchic Jesusta cric-huanca pihuanpish cazaranallami.

40Chashna cacpipish ñuca yuyaipica mana cutin cazarashpami, ashtahuan cushi causanman yuyanimi. Caitaca Diospac Espíritu ñucamanpish yuyaita cushcamantami nicuni.