1Saulpac huasi ucupurahuan, Davidpac huasi ucupurahuan macanacuica unaitami catirca. Shina cacpipish Davidpac huasimi ashtahuan sinchiyashpa caticurca. Cutin Saulpac huasica fuerza illacmi saquiricurca.
Hebrón pueblopi huacharishca Davidpac churicunamanta(1 Cr 3.1-4)2David Hebrón pueblopi charishca churicunaca, punta churica Jezreel pueblomanta Ahinoam huarmipi charishca Amnonmi carca.
3Ishcainiqui churica Carmel pueblomanta huañuc Nabalpac huarmi Abigailpi charishca Quileabmi carca. Quimsaniqui churica Gesur pueblota mandac Talmaipac ushi Maaca huarmipi charishca Absalonmi carca.
4Chuscuniqui churica Haguit huarmipi charishca Adoniasmi carca. Pichcaniqui churica Abital huarmipi charishca Sefatiasmi carca.
5Suctaniqui churica paipac quiquin huarmi Eglapi charishca Itreammi carca. Caicunami Hebrón pueblopi causacushpa charishca churicunaca.
Jatun mandac Abner Davidhuan Hebronpiari nishcamanta6Saulpac huasi ucupurahuan, Davidpac huasi ucupurahuan macanacushpa caticucpica, Saulpac churi Abnermi ashtahuan sinchi tucushpa atirca.
7Saulca Ajapac ushi Rizpa shuti caishuc huarmitami charirca. Chaimantami Saulpac churi Is-bosetca Abnertaca:
—¿Ima nishpatac ñuca taitapac caishuc huarmihuan chayarinacungui?— nishpa tapurca.
8Chashna tapucpimi Abnerca yallita piñarishpaca:
—¿Ñucaca Judá llactapi causaccunapac allcu uma shinachu cani? Ñucaca cambac taita Saulpac huasi ucupuratapish, paipac ricsishcacunatapish, huauquicunatapish llaquishpami cantaca Davidpac maquipi mana churarcani. ¿Chashna canman allita ruhuashca jahuachu ñucataca cai huarmipac juchamanta juchanchingui?
9Mandac Dios Davidman cushami nishca pactachun Davidta mana ayudacpica, ñucata ashtahuan llaquichichun.
10Israel llactatapish, Judá llactatapish mandanata Saulpac huasi ucupuramanta quichushpa, Dan llactamanta callarishpa Beerseba llactacaman David mandachun— nirca.
11Shina nicpimi, Is-bosetca Abnerta manchashcamanta imata mana nishpa upalla saquirirca.
12Chaimantami Abnerca huillaccunata Davidpacman cachashpaca: «¿Cai llacta mana cambac cashpaca pipactac? Ñuca maquihuan tucui israelcunata cambacman cutichimungapac ñucahuan alli tucushpa ari ni» nichunmi cacharca.
13Shina nicpimi Davidca:
—Ari, allimi. Shina cacpipish ñucata ricungapac shamushpaca, Saulpac ushi Micaltaracmi apamuna canguichic. Chashna apamucpica, canhuan ari nishallami— nirca.
14Chai quipami Davidca Is-bosetpacman huillaccunata cachashpaca: «Ñuca huarmi Micalta cutichi. Ñucaca patsac filisteocunata huañuchishpa circuncisionta ruhuashpa, Saulman cushpami Micalhuanca cazararcani» nichun cacharca.
15Shina nicpimi, Is-bosetca Micalta Laispac churi Paltielmanta quichuchun cacharca.
16Shina quichumucpimi, paipac cusaca Bahurim pueblocaman huarmimanta huacashpa catirca. Shina caticpimi, Abnerca Paltielta tigrarishpaca:
—¡Cutishpa ri!— nirca.
Shina nicpica, paica cutishpa rircami.
17Chai quipami Abnerca israelcunata pushac yuyaccunahuan parlashpaca:
—Cancuna Davidta jatun mandac cachun churasha nicushcaca ñami unai tucun.
18Cunanca, mandac cachun churailla. Chaica Mandac Diosllatacmi Davidtaca: “Ñucata servic Davidpac maquihuanmi ñuca acllashca israelcunataca filisteocunapac maquimanta, shuctac piñaccunapac maquimantapish quishpichisha” nircami— nirca.
19Abnerca Benjaminpac ailluhuanpish, parlangapac rircami. Chai quipaca Abnerca pai quiquinllatacmi israelcunapish, Benjamín aillucunapish allimi nishcata Hebrón pueblopi Davidman huillangapac rirca.
20Shinami Abnerca ishcai chunga runacunahuan Davidman huillangapac Hebrón puebloman rirca. Shina chayacpimi, Davidca Abnermanpish, paihuan cac runacunamanpish carangapac jatun micuita ruhuarca.
21Chaipimi Abnerca Davidtaca:
—Cunan caimanta rishpaca, can ñucata mandac-huan israelcuna ari nichunmi tandachigrini. Chashna ruhuacpimi, cambac shungu munashca shina tucui israelcunata mandangui— nirca.
David caya minchacaman nicpimi, Abnerca pipish imata mana nishca cushilla rirca.
Joab Abnerta huañuchishcamanta22Chai quipami Davidta serviccunaca Joabhuan paicunata piñaccunahuan macanacushpa, imallata quichushcahuan Davidpacman chayamurca. Abnerca ña mana Hebrón pueblopichu Davidhuan carca. Ashtahuanpish David caya minchacaman nicpimi, cushilla rishca carca.
23Joabpish, paipac soldadocunapish chayacpimi Joabtaca:
—Nerpac churi Abnerca jatun mandac Davidpacman shamurcami. Shina shamushpami, jatun mandac David caya minchacaman nicpi, Abnerca cushilla rirca— nishpa parlarca.
24Chashna huillacpimi, Joabca jatun mandac Davidpacman rishpaca:
—¿Imatatac ruhuarcangui? Abnerca canta ricuc shamurcami, ¿ima nishpatac richun saquircangui?
25Nerpac churi Abnertaca canllatac ricsinguimi. Paica canta umangapac, can maiman rictapish, maimanta shamuctapish, tucui can imata ruhuac cashcata yachangapacmi shamushca canga— nirca.
26Joab Davidpacmanta llucshishpaca huillaccunatami Abnerta mashcashpa cutichimuchun cacharca. Paicuna rishpaca, yacuta llucchina jatun jundu Siramantami David mana yachacpi, Abnertaca cutichimurca.
27Abner Hebrón puebloman cuticpimi, Joabca paillahuan parlasha nic shinalla chai pueblo yaicuna punguman caruyachishpa pusharca. Chaipimi paipac huauqui Asaelta huañuchishcamanta yallita piñarishpa huicsapi chugrishpa huañuchirca.
28Chaita yachac chayashpami Davidca:
—¡Nerpac churi Abnerta huañuchishca yahuarmantaca ñucapish, ñuca mandanapish huiñaitami Mandac Diospac ñaupapi mana juchayuc canchic!
29¡Ashtahuanpish chai yahuarmantaca Joabpac, paipac huasi ucupuracunapac jahuapi llaqui urmachun! Joabpac huasi ucupurapica yahuar llucshic ungüipish, lepra ungüipish, suchucunapish, espadahuan huañuchishcacunapish, yarcaipish, jaicapi ama illachun— nirca.
30Joab, paipac huauqui Abisaimi Gabaón macanacuipi paicunapac huauqui Asaeltaca huañuchishcamanta Abnertaca huañuchirca.
31Chaimantami Davidca Joabtapish, tucui paihuan caccunatapish mandashpaca:
—¡Churanacunata lliquirishpa, sharpa churanacunata churarishpa Abner huañuchishcamanta llaquirichic!— nirca.
Jatun mandac Davidca huañushcata huandushpa ricuccunapac huashallatami rirca.
32Abnerpac cuerpotaca Hebrón pueblopimi enterrarca. Chaipimi jatun mandac Davidca enterrana jutcu ladopi munai huacarca. Shinallatac tucui gentecunapish huacarcacunami.
33Jatun mandacca Abnermanta huacashpami cai cantota allichirca:
«¿Abnerca upa runacuna
shinachu huañuna carca?
34Canca maquipish mana
huatashcachu carcangui.
Chaquicunapish mana
cadenahuan huatashcachu carcangui.
Canca millai runacuna shinami
huañushcangui» nishpami huacarca.
Tucui gentecunami paimantaca cutinllatac huacarca.
35Chashna huacacucpimi manarac chishiyacpi, tucui gentecuna jatun mandacpacman chayarishpaca ashallatapish micuiyari nirca. Shina nicpipish mandac Davidca: «¡Manarac inti yaicucpi, tandata mana cashpaca imallatapish ñuca micucpica, Dios ashtahuan ñucata llaquichichun!» nishpa ari nirca.
36Jatun mandac chashna nicta uyashpaca, tucui gentecunami allimi nircacuna. Chaica jatun mandac tucui ruhuashcacunatami tucui gentecuna alli nic carca.
37Chai punzhami tucui gentecuna jatun mandac Davidca Nerpac churi Abnerta huañuchichun mana mandashcata yachac chayarcacuna.
38Jatun mandac paita serviccunata cayashpaca:
—Cunan punzha Israel llactapi tucuipac ricsishca mai alli shuc runa huañushcataca ¿Manachu yachanguichic?
39Cunanca, jatun mandac cachun aceitehuan cahuishca cashpapish irquiyashcami cani. Sarviapac huahuacunami ñucata atishpa ashtahuan sinchicuna. Paicuna mana allita ruhuashcamantaca Mandac Diosllatac mana allita ruhuashca shinallatac llaquichichun— nirca.
Who We AreWhat We EelieveWhat We Do
2025 by iamachristian.org,Inc All rights reserved.
