MARCOS 14 - Biblia Quichua Cañar 2010

Jesusta huañuchingapac yuyarinacushcamanta(Mt 26.1-5; Lc 22.1-2; Jn 11.45-53)

1Levadura illac tandata micuna, Pascua punzhapac ishcai punzha siricpimi, curacunata mandac curacunapish, mandashcacunata yachachiccunapish Jesusta ima shina pacalla japishpa huañuchinata yuyaricurca.

2Chashna yuyaricushpapish, maijanca: «Cai fiesta punzhapica mana imata ruhuanachu canchic. Gentecuna jatarishpa, ñucanchictarac llaquichingami» nirca.

Jesuspac umapi mishquilla ashnacucta churashcamanta(Mt 26.6-13; Jn 12.1-8)

3Jesusca Betania pueblopi lepra ungüihuan nishca Simonpac huasipi micushpa tiyacucpimi, shuc huarmica achca valic nardo mishquilla ashnacucta, alabastro rumi botellapi apashpa shamurca. Chai botella pascashpami, mishquilla ashnacuctaca Jesuspac umapi churarca.

4Chaimantami maijanca shungupi piñarishpa:

—¿Ima nishpatac chai mishquilla ashnacuctaca yanga tallinyari?

5Chaitaca quimsa patsac yalli denario cullquipi catushpa, huacchacunaman cushpachari, alli canman carca— nishpami, huarmitaca rimaricurca.

6Chaimantami Jesusca:

—¿Ima nishpatac cai huarmitaca llaquichicunguichic? Saquichic, paica ñucamanca allitami ruhuashca.

7Huacchacunaca punzhantami cancunahuan canga. Paicunaman allita ruhuasha nishpaca ruhuanguichicllami, ashtahuanpish ñucaca cancunahuanca mana causacushallachu.

8Cai huarmica pai ruhuai pudishcatami ruhuashca. Ñuca cuerpo sumacta enterrashca cachunmi, utca ruhuashca.

9Tucui cai pachapi maipipish alli huillaita huillacushpaca, cai huarmi ruhuashcatapish huillangami. Chashnami paita yuyaringa. Chaica chashnatacmi canga— nirca.

Jesusta Judas Iscariote japichisha nishcamanta(Mt 26.14-16; Lc 22.3-6)

10Chunga ishcai yachacuccunapuramanta Judas Iscariotemi Jesusta japichingapac curacunata mandac curacunahuan parlangapac rirca.

11Paicuna chaita uyashpaca, cushicushpami cullquita cushun nircacuna. Chaimanta pachami, Judasca Jesusta ima shina japichinata munacurca.

Pascua micuimanta(Mt 26.17-29; Lc 22.7-23; Jn 13.21-30; 1 Cor 11.23-26)

12Levadura illac tandata micuna fiesta callari punzhaca, Pascuata yuyarishpa, pactalla ovejata huañuchina punzhami carca. Chai punzhami yachacuccunaca Jesustaca:

—Pascua micuita micungapacca, ¿maipitac allichigrichun ningui?— nirca.

13Chashna nicpimi, paipac ishcai yachacuccunata cachashpaca:

—Jerusalén puebloman richic. Chaipica, yacu puñu aparishca shuc runahuanmi tupanguichic. Paita catishpa richic.

14Chai runa mai huasiman yaicucpica, chai huasiyuc runataca: “Yachachicca: ‘¿Maijan ucupitac ñuca yachacuccunahuan Pascua micuita micusha?’ ninmi” ninguichic.

15Chashna nicpica, paica, allichishca shuc jatun ucutami altopi ricuchinga. Chaipi ñucanchic micungapac allichinguichic— nirca.

16Yachacuccuna rishpa, puebloman chayashpaca, Jesús nishca shinallatacmi tarirca. Chai huasipimi, Pascua micuita allichirca.

17Tutayacuctami Jesusca paipac chunga ishcai yachacuccunahuan chai huasiman chayarca.

18Jesús mizapi tiyarishpa micucushpaca:

—Cancunapuramanta ñucahuan micucucmi, ñucata huañuchiccunaman japichinga. Chaica chashnatacmi canga— nirca.

19Chashna nicpimi, yachacuccuna yallita llaquirishpa, caishuc chaishuc Jesusta tapushpaca:

—¿Ñucachu cani?— nircacuna.

20Chashna tapucpimi Jesusca:

—Chunga ishcaipuramanta ñucahuan cai platopi tandata jucuchishpa micucucmi, ñucataca japichinga.

21Runa Tucungapac shamushca ñucataca, Dios quillcachishcapi nishca shinallatacmi huañuchinga. Shina cacpipish, ñucata japichic runaca, ¡aij, imachari tucunga! Chai runaca mana huacharishca cashpachari, alli canman carca— nirca.

22Yachacuccuna micucucpi, Jesús tandata japishpa, Diosta pagui nishpa, chaupishpa, paicunaman cushpaca:

—Japichic, caica ñuca aichami— nirca.

23Vino vasota japishpa, Diosta pagui nishpa cucpica, tucuimi chai vasomanta ubiarca.

24Chai quipaca Jesusca:

—Caica, Dios-huan mushuc ari ninacuita ruhuashca ñuca yahuarmi. Caimi achcacunata quishpichingapac jichana yahuar.

25Dios mandacucpi mushuc vinota ubiangacaman, cai uvas vinotaca cutinca manatac ubiashachu. Chaica chashnatacmi canga— nirca.

Pedro neganamanta Jesús huillashcamanta(Mt 26.30-35; Lc 22.31-34; Jn 13.36-38)

26Himnota cantashca quipami, paicunaca Olivos urcuman rirca.

27Chaipimi Jesusca yachacuccunataca:

—Cunan tutallatacmi cancunaca ñucata saquishpa, caita chaita ringuichic. Chaica, Dios quillcachishcapica: “Michicta huañuchishami. Ovejacunaca caita chaitami shic-huaringa” ninmi.

28Shina cacpipish, ñuca causarishpaca, cancunapac ñaupatami Galilea llactaman risha— nirca.

29Chaimantami Pedroca Jesustaca:

—Caishuccuna canta saquishpa ricpipish, ñucaca manatac saquishachu— nirca.

30Shina nicpimi Jesusca:

—Cunan tutallatacmi gallo manarac ishcai cutin cantacpi, ñucataca quimsa cutin negangui. Chaica chashnatacmi canga— nirca.

31Chashna nicpipish Pedroca:

—Canhuan pacta huañuna cacpipish, manatac negashachu— nirca.

Caishuc yachacuccunapish chashnallatacmi nirca.

Getsemaní huertapi Jesús Diosta mañashcamanta(Mt 26.36-46; Lc 22.39-46)

32Getsemaní huertamanmi, Jesusca paipac yachacuccunahuan rirca. Chaiman chayashpaca:

—Ñuca Diosta mañangacaman, cancunaca caillapi tiyacuichic— nishpami,

33Pedrota, Jacobota, Juanta pushashpa rirca. Shina rishpami, Jesusca shungupi yallita llaquiri callarirca.

34Chaimantami:

—Ñuca shungupica huañuna nanaihuan shinami, yallita llaquiricuni. Cancunaca ama sueñushpa, caillapi chaparacunguichic— nirca.

35Jesús ashata ñaupaman rishpa, pambacaman cumurishpa, Diosta mañashpaca: «Cai llaquita ñuca mana apaipac cacpica, cunan anchuchi.

36Ñuca Taitalla, canca imatapish ruhuai pudicmi cangui. Cai jayac ubiana shina llaquita ñucamanta anchuchi. Shina cacpipish, ama ñuca munashcata ruhuaichu, ashtahuanpish can munashcata ruhuai» nirca.

37Jesús mañashpa cutimushpaca, paicuna sueñucucpimi tuparirca. Chaimantami Pedrotaca:

—Simón, ¿sueñucunguillachu? ¿Manachu shuc horasllatapish riccharishca cai pudircangui?

38Mana pandachishca cangapacca, Diosta mañashpa chaparacuichic. Cancunapac yuyaica sinchimi, ashtahuanpish cancunapac cuerpomi shaicushca— nirca.

39Jesusca cutin rishpaca, puntaman mañashca shinallatacmi mañarca.

40Cutimushpaca, paipac yachacuccunataca cutin sueñucucpimi tuparirca. Paicunaca yalli sueñuihuan cashpami, ñahuitapish mana pascai pudirca. Chaimantami imata mana nirca.

41Jesús quimsa cutin cutimushpaca, paicunataca:

—¿Cancunaca samarishpa sueñucunguichicllachu? Ña jatarichic, Runa Tucungapac shamushca ñucataca, juchayuc runacunapac maquipi churana horasca pactamushcami.

42¡Jatarishpa jacuchic! Ñucata japichicca ñami chayamucun— nirca.

Jesusta japishcamanta(Mt 26.47-56; Lc 22.47-53; Jn 18.2-11)

43Jesús chashna nicucpiracmi, chunga ishcai yachacuccunapuramanta Judasca tauca runacunahuan shamurca. Chai runacunaca Israel curacunata mandac curacunapish, mandashcacunata yachachiccunapish, pushac yuyaccunapish cachacpimi, espadacunahuan, caspicunahuan shamurca.

44Jesusta japichicca: «Maijantami ñuca muchani chaimi. Paita japishpa, mana cacharishpa apanguichic» nishcami carca.

45Judas Jesuspacman cuchuyashpaca:

—¡Yachachic!— nishpami mucharca.

46Chashna muchacpimi, Jesusta japircacuna.

47Ashtahuanpish chaipi caccunapuramanta shucca espadata llucchishpami, curacunata jatun mandac curapac servictaca huactashpa, ringrita pitirca.

48Jesusca paita japingapac shamuccunataca:

—¿Shuhuacta shinachu ñucataca espadacunahuan, caspicunahuan japingapac shamunguichic?

49Punzhantami cancunahuan Diosta mañana huasipica yachachicurcani. Chaipica mana japircanguichicchu. Ashtahuanpish Dios quillcachishcapi nishca pactachunmi, cashna japingapac shamushcanguichic— nirca.

50Chaipimi yachacuccunaca Jesusllata saquishpa, tucui miticushpa rircacuna.

Shuc moso miticushpa callpashcamanta

51Shuc mosomi pañohuan pillurishca Jesusta caticurca. Paitapish japircami.

52Chashna japicpica, pillurishca pañota chaipi shitashpami, lluchulla atishpa callparca.

Mandaccunapuralla tandanacushcapacman Jesusta apashcamanta(Mt 26.57-68; Lc 22.54-55; Jn 18.12-14,19-24)

53Jesustaca curacunata jatun mandac curapacmanmi aparcacuna. Chaipimi curacunata mandac curacunapish, pushac yuyaccunapish, mandashcacunata yachachiccunapish tandanacushca tiyacurca.

54Pedroca carutami catishpa, curacunata jatun mandac curapac huasi pungu pambacaman rirca. Chaipimi Diosta mañana huasita cuidaccunahuan ninapi mashashpa tiyacurca.

55Curacunata mandac curacunapish, tandanacushca mandaccunapish Jesusta huañuchingapacmi, llullashpa huillaccunata cayachirca. Chashna cayachishpapish ima mana allita ruhuashcataca mana tarircachu.

56Achca runacunami Jesusta llaquichingaraicu llullashpa huillarca. Shina huillashpapish shucca shuclata, shucca shuclatami huillarca.

57Maijancunaca jatarishpa, Jesusta llaquichishpa llullashpaca:

58—Ñucanchicca: “Runacuna ruhuashca, cai Diosta mañana huasitaca urmachishpa, quimsa punzhapica mana runacuna ruhuashca shucta huasitami shayachisha” nictami uyarcanchic— nirca.

59Chashna llullashpapish, mana shuclayallata nircacunachu.

60Chaimantami curacunata jatun mandac cura tucuipac chaupipi jatarishpa, Jesusta tapushpaca:

—Cai tucuita nicucpipish, ¿manachu imata ningui?— nirca.

61Jesusca imata mana nishpa upallami carca. Chaimanta curacunata mandac curaca Jesustaca:

—¿Canca alli nina Diospac Churi Cristochu cangui?— nishpa, cutin tapurca.

62Chashna tapucpimi Jesusca:

—Ari, ñucami cani. Runa Tucungapac shamushca ñucataca, poderyuc Diospac alli maquiman tiyacuctapish, puyupi jahua pachamanta shamucuctapishmi ricunguichic— nirca.

63Shina nicpica, curacunata mandac curaca piñarishpa, paipac churanata lliquishpaca:

—¿Imapactac shuctac huillaccunata mashcashun?

64Chashna nishpaca Diostami piñachicushca. Chaitaca cancunallatacmi uyashcanguichic. Cunanca, ¿imatatac ninguichic?— nishpa tapurca.

Shina tapucpica, tucuimi juchanchishpa, “¡huañunami can!” nircacuna.

65Chaimantami maijanca Jesusta tucai callarirca. Cutin maijanca ñahuita pañohuan huatashpa, huactashpaca: «¡Maijantac huactanchic, huillai!» nircami.

Diosta mañana huasita cuidaccunapish Jesusta ñahuipi huactarcami.

Pedro Jesusta negashcamanta(Mt 26.69-75; Lc 22.56-62; Jn 18.15-18,25-29)

66Pedroca pungu pambapi tiyacucpimi, curacunata jatun mandac curata servic huarmi shamurca.

67Pedro ninapi mashashpa tiyacucta chai huarmi alli ricushpaca:

—Canpish Nazaret pueblomanta Jesus-huan puricmi cangui— nirca.

68Shina nicpimi Pedroca:

—Paitaca mana ricsinichu. Imatatacpishchari nicungui, mana yachanichu— nirca.

Chashna nishpa, canzha pambaman llucshicpica, ñapish galloca cantarcallami.

69Chai servic huarmi cutin Pedrota ricushpaca:

—Cai runaca paicunapurami— nishpami, shuccunaman huillarca.

70Shina nicpipish, Pedro cutinmi negarca.

Chai quipallami, chaipi caccunaca cutin Pedrotaca:

—Canca Galilea llactallamantami cangui. Chaimanta canpish chaipurallatami cangui, rimaipipish ricsinallami— nirca.

71Paicuna chashna nicpimi Pedroca:

—¡Diospac shutipimi nini, pimantatacpishchari rimacunguichic, chai runataca manatac ricsinichu!— nirca.

72Pai chashna nicucpica, cutinllatacmi galloca cantarca. Chai horasmi Pedroca Jesús puntaman: “Manarac gallo ishcai cutin cantacpimi, quimsa cutin negangui” nishcataca yuyarirca. Chaita yuyarishpami huacarca.