EZEQUIEL 8 - Biblia Quichua Cañar 2010

Jerusalenpi millaita ruhuashcata ricuchishcamanta

1Sucta huata, sucta quilla, pichca punzhapimi ñucaca huasipi tiyacurcani. Judá llactamanta pushac yuyaccunapish ñuca ñaupapimi tiyacurca. Chaipi tiyacucpimi, Mandac Diosca cungailla rimarca.

2Chaimantaca shuc runa shinatami ricurcani. Chaica cinturamanta uraimanca nina shinami carca. Cutin cinturamanta jahuamanca jagan nicuc bronce shinami carca.

3Chai runaca maquita chutashpami, ñuca uma accha jahuapi churarca. Chaipimi Diospac Espirituca muscuipi shina, cai pachamanta jahuaman alzashpa, ñucataca Jerusalenman aparca. Chashna pushashpaca, jahua ladoman cac ucu yaicunallapimi shayachirca. Chaipimi Mandac Dios mana ricunayachishca ruhuashcalla dios tiyacushca carca.

4Chaipica pugru pambapi ñuca muscuipi shina ricushca shinallatacmi israelcunapac Diospac sumaimana achic nicucca ricurirca.

5Chaimantami ñucataca: «Huañunalla runa, jahua ladota ricui» nirca. Shina nicpimi, jahua ladota ricurcani. Chaipica altarman yaicuna pungu cuchullapimi Mandac Dios mana ricunayachishca ruhuashcalla diosmi tiyacushca carca.

6Chai quipami ñucataca: «Huañunalla runa, ñucapaclla huasimanta ñucata anchuchingapacmi, israelcunaca yalli millaita ruhuacun. Chaitaca, ¿manachu ricungui? Cai ricushcamanta ashtahuan yalli millaita ruhuashcacunatami ricungui» nirca.

7Chaimantaca canzha pambaman yaicunamanmi pusharca. Chaipica pirca quingraipimi shuc jutcuta ricurcani.

8Chaipimi ñucataca: «Huañunalla runa, chai pircata ashtahuan allai» nirca. Shina nicpi, ñuca pircata jutcucucpimi, ñapish shuc pungu tucurca.

9Chai quipaca: «Chaiman yaicushpa, chaipi caccuna yalli millaita ruhuacucta ricui» nirca.

10Chaiman yaicushpaca, pirca quingrai muyundipi pambata llucashpa puric animalcunatapish, mapa animalcunatapish, israelcunapac dioscunatapish dibujashca tiyacuctami ricurcani.

11Chaicunapac ñaupapica israelcunapuramanta canchis chunga pushac yuyaccunami carca. Chai pushac yuyaccunapac chaupipica Safanpac churi Jazaniasmi shayacurca. Tucui paicunami quiquin maquipi inciensota rupachinata charicurca. Shinallatac incienso cushnica puyu shinami jahuata ricurca.

12Chaipimi ñucataca: «Huañunalla runa, ¿israelcunata pushac yuyaccuna tuta imata ruhuacucta ricunguichu? Tucui paicunami huasi ucupi imamanpish riccha dioscunata pintashca. Paicunaca: “Mandac Diosca ñucanchicmanta anchurishcami, mana ricucunchu” nincunami» nirca.

13Chai quipaca: «Cai ricushcamanta ashtahuan yalli millaita ruhuashcacunatami ricungui» nirca.

14Chai quipaca Mandac Diospac huasiman yaicuna jahua lado pungumanmi pusharca. Chaipica huarmicuna Tamuz diosmanta huacacuctami ricurcani.

15Chaipimi ñucataca: «Huañunalla runa, ¿manachu caitaca ricungui? Cai ricushcamanta ashtahuan yalli millaita ruhuashcacunatami ricungui» nirca.

16Chaimantaca Mandac Diospac huasi ucu canzha pambamanmi pusharca. Chaipica Mandac Diospac huasiman yaicuna punguhuan altarhuan tupanacuipi ishcai chunga pichca runacunatami ricurcani. Paicunaca Mandac Diospac huasita huashaman churashpa, inti llucshic ladota ricushpami cumurishpa, intita alli nicurca.

17Chaimantami ñucataca: «Huañunalla runa, ¿manachu caitaca ricungui? ¿Judá llactapi causaccuna yalli millaita ruhuashcaca ashallachu? Paicunaca millaita ruhuashpami, cai llactapi yalli piñanacuita churashpa, ñucataca ashtahuan piñachin. Paicunapac singapipish ramacunatami churarin.

18Ñucaca yallita piñarishpami, paicunataca llaquichisha. Manatac perdonashachu, manatac llaquishachu. Ñucata caparishpa mañacucpipish manatac uyashachu» nirca.