1Mandac Dioslla,
ñucataca canmi ricurcangui.
Canmi ricsircangui.
2Ñuca tiyarinatapish,
ñuca jatarinatapish canmi ricsingui.
Carumantami ñuca imata
yuyacushcatapish yachangui.
3Ñuca maipi puricucpipish,
sueñucucpipish tucuitami yachangui.
Ñuca causaitapish tucuitami ricsingui.
4Mandac Dioslla, canca ñuca imata
rimangapac manarac
shimita cuyuchicpimi, tucuita yachangui.
5Huashatapish, ñaupatapish muyunguimi.
Maquitapish ñuca jahuapimi churangui.
6Cambac yachaica sumaimanami.
Canca jatun yachacmi cangui.
Cambac yachaitaca mana entendinichu.
7¿Cambac Espiritumantaca
maimantac caruyashayari?
¿Cambac ñaupamantaca
maipitac miticugrishayari?
8Jahua pachaman huichai ricpipish
chaipimi cangui.
Seolman urai ricpipish chaipimi cangui.
9Tutamanta alascunahuan rishpa,
mama cucha tucuripi causagricpipish,
10cambac maquihuanmi pushangui.
Cambac alli lado maquihuanmi charirangui.
11Ñuca: «Amsa tutapish pacangami,
ñuca muyundipi tiyac
achicpish purayangami»
nishpa yuyacucpipish,
12cambac ñahuimantaca
amsa tutapish mana purayachingachu.
Tutaca achic punzha shinami.
Canmanca amsapish, achicpish
chashnallatacmi can.
13Canmi ñuca tucui cuerpotaca
ruhuarcangui.
Ñuca mamapac huicsapi cacpica
canmi huiñachircangui.
14Can chashna sumaimanata
ruhuashcamantaca pagui ninimi.
Can ruhuashcacunaca sumaimanami.
Chaitaca ñuca almapish
allitami yachan.
15Ñuca pacalla huiñacushpapish,
cambac ñaupapica,
mana pacallachu carcani.
Allpa ucupi shina huiñacushpapish,
mana pacalla cai pudircanichu.
16Muyu shina ñuca huiñai callaricucpimi
canca ña ricurcangui.
Tucui chaicunatami cambac libropi
ña quillcarcangui.
Ñuca causai punzhacuna manarac tiyacpimi
ña yupashca carcani.
17¡Dioslla, cambac jatun
yuyaica sumaimanami!
¡Tucui chai yuyaicunaca
maita mana entendipacmi!
18Chaicunata yupai callaricpica,
tiyutapish yalli achcami ricuringa.
Riccharishpapish canllahuantacmi cani.
19¡Sumac Dioslla, canta mana manchac
runataca huañuchiyari!
¡Chai huañuchic gentecunataca
ñucamanta anchuchiyari!
20Paicunaca cantaca camincunami.
Canta piñaccunaca
cambac shutitaca yangami rimancuna.
21Mandac Dioslla,
¿manachu canta piñaccunataca piñana cani?
¿Manachu canta mana ricunayachic
gentecunataca mana ricunayachina cani?
22Ñucaca paicunataca
tucui shunguhuanmi piñani.
Ñuca yuyaipica paicunaca
ñucata piñaccunami can.
23Mandac Dioslla, ñucatapish,
ñuca shungutapish tucuita ricuiyari.
Ñuca yuyaicuna ima shina cashcata
callarishpa ricuiyari.
24Ñucaca millaita ruhuarcanichari,
chaitaca ricuiyari.
Chaicunata ricushpa huiñaita
causangapac rina ñanta pushaiyari.
Who We AreWhat We EelieveWhat We Do
2025 by iamachristian.org,Inc All rights reserved.
