1Ñuca alli nina Dioslla,
ama upalla saquirichu.
2Canta mana ricunayachic runapish,
umac runapish
ñucata piñashpa rimarcami.
Ñucata llaquichingaraicumi
llullarca.
3Ñucata mana ricunayachishpami
ñuca muyundipi shayarishpa rimarca.
Shinallatac manapish,
paita imata ruhuacpimi
ñucahuan macanacurca.
4Paicunata ñuca cuyacpipish
ñucataca piñarcacunami.
Ashtahuanpish cantami mañarcani.
5Paicunaman allita ruhuacpipish,
ñucamanpish mana allitami ruhuarca.
Paicunata cuyacpica,
yallitami ñucataca
mana ricunayachirca.
6Paicunata llaquichichunca
canta mana manchac runata churaiyari.
Paipac alli ladopica
Satanás shayacuchun.
7Juezpac ñaupapi taripashpaca,
paita llaquichishca cachun.
Pai mañashcallatac
paita juchanchichun.
8Pai causana huatacunapish
ashalla cachun.
Pai ruhuanataca shuccuna japichun.
9Paipac huahua huahuacunapish
taita mama illac saquirichun.
Paipac huarmipish viuda saquirichun.
10Paipac huahua huahuacunapish
yanga purishpa mañashpalla micuchun.
Paicunapac huasimanta
caruman llucshishpa
llaquinayaita micunata mashcachun.
11Paicuna tucui charishcataca
cullquita mañachic tucui japichun.
Paicuna trabajashpa
imata charishcataca
shuctac llactamanta
shamuccuna japichun.
12Pipish paita ama llaquichun.
Taita mama illac paipac
huahua huahuacunatapish
pi ama llaquichun.
13Paipac huahua huahuacunapish
tucui tucuchishca cachun.
14Quipa tiyashca
huahua huahuacunapish
tucui tucuchishca cachun.
Paipac taitacuna yallita
mana allita ruhuashcataca
Mandac Dios yuyaricuchunlla.
Paipac mamapac juchatapish
ama anchuchishca cachun.
15Chai juchacunaca tucui causaipi
Mandac Diospac ñaupapi ricurichun.
Cai pachapi ama ashtahuan
yuyarichunca Diosllatac tucuchichun.
16Paica jaicapi llaquinata
mana yuyarircachu.
Ashtahuanpish huaccha runacunata,
imatapish mana chariccunata
shungupi llaquilla causaccunata
huañuchingapacmi catirca.
17Pitapish llaqui
tucuchunllamimunarca.
Chai llaquica paillatatacmi
llaquichirca.
Mana bendiciachun munarcachu.
Chaimantami chai bendicionca
paimanta anchurirca.
18Churanata churarishca shina
maldicionca cachun.
Paipac huicsamanca yacu shina,
tullumanca aceite shina yaicuchun.
19Shinallatac churanahuan
pillurishca shina, chumbihuan
chumbillishca shina cachun.
20Ñucata yanga rimaccunataca
Mandac Dios llaquichichun.
Ñucata mana alli nishpa
rimaccunataca chashnallatac
llaquichichun.
21Ñucata Mandac Dioslla,
cambac shutita cuyashcamanta
ñucata quishpichiyari.
Canca allimi llaquingui.
Chaimanta ñucata llaquiyari.
22Ñucaca imatapish mana charic
huacchami cani.
Ñuca shungupish chugririshcami.
23Llandu chingaricuc shinami
ñucaca tucuricuni.
Langosta curu shinami
caiman chaiman shitashca cani.
24Mana micushcamantami
ñuca mucupish chucchucun.
Ñuca cuerpopish huira illacpimi
tucui chaquicun.
25Ñucaca paicunapac
mana ricunayachishca
rimashcallami carcani.
Ñucata ricushpaca
umata cuyuchishpami
ricuc carcacuna.
26Ñucata Mandac Dioslla ayudaiyari.
Can llaquic shinallatac
quishpichiyari.
27Chashna ayudacpimi,
cambac maquihuan ruhuashcata
yachangacuna.
Can Mandac Diosllatac
chashna ruhuashcatami yachangacuna.
28Paicuna maldiciacpipish,
canca bendiciaiyari.
Paicuna ñucata llaquichingapac
jataricpipish pingaichishca cachun.
Shina cacpipish,
canta servicca cushilla cachun.
29Ñucata yanga juchanchiccunaca
churanata churaric shina
pingaihuan cachun.
Shinallatac jahuallata
churarishca shina
pandarishca cachun.
30Ñuca rimashcahuanmi
Mandac Diostaca pagui nisha.
Tauca gentecunapac chaupipimi
canta alabasha.
31Diosca almata juchanchiccunamanta
quishpichingapacmi,
imatapish mana charic runapac
alli ladopi shayaringa.
Who We AreWhat We EelieveWhat We Do
2025 by iamachristian.org,Inc All rights reserved.
