1Mandac Diospac ñaupapi israelcunata bendiciashcaca allimi nishpami Balaamca, mana utcapi shina, brujocunapac catishpa, ashtahuanpish shitashca pambata tigrarishpa ricurca.
2Balaam huichailla ricushpaca, israelcuna cada aillu chican chican tiyacuctami ricurca. Chaipimi Diospac Espíritu paipacman shamurca.
3Chashna shamucpimi, Balaamca yuyarina rimaicunahuan huillashpaca:
«Beorpac churi Balaammi rimacun.
Allita ricuc runami rimacun.
4Dios rimashcata uyac,
Imatapish ruhuac Dios
muscuipi ricuchishcata ricucuc,
urmashpapish mana urmac runami:
5¡Jacobopac churicunapac
sumac carpa huasicunalla!
¡Israelcunapac causana
sumac pushtulla!
6Jatun yacu tendirishpa
ricuc shina, yacu lado huerta
shinami ricurin.
Mandac Dios tarpushca
áloes yura shina, yacu lado cedro
yura shinami cangui.
7Jicharicuc yacu shinami cangui.
Paicunapac miraicunapish
achca yacutami charinga.
Paicunapac mandacca
Agagtapish yallimi canga.
Paicuna mandana llactapish
jatunyachishcami canga.
8Egiptomanta llucchimuc Diosca
huagra shina fuerzasapami.
Paita piñaccunataca
huashicuc shinami tucui tucuchinga.
Tullucunacamanmi tucui tucuchinga.
Flechacunahuanmi huañuchinga.
9León samarishpa siricuc shinami.
Mama león sueñushpa siricucpica,
¿pitac ricchachingayari?
¡Paicunata bendiciaccunaca
bendiciashca cachun!
¡Cutin paicunata maldiciaccunaca
maldiciashca cachun!» nirca.
Ima tucunata Balaam huillashcamanta10Chashna nicta uyashpa, Balac piñarishpa maquita huactarishpa Balaamtaca:
—¡Cantaca, ñucata piñaccunata maldiciachunmi cayachun cacharcani! ¡Ashtahuanpish canca quimsa cutinmi paicunataca bendiciashcangui!
11¡Cunanca cambac llactaman cutilla! Cantaca: “Allimi cangui” nigricurcanimi. Shina nigricucpipish Diosmi jarcachishca— nirca.
12Shina nicpimi Balaamca:
—¿Ñucaca manachu can cachashca mandaccunataca:
13“Balac paipac jatun huasi junda curita, cullquita cucpipish, Mandac Dios ama ruhuachun nishcataca mana ruhuashachu. Allitapish, mana allitapish, imatapish ñuca munaimantaca mana ruhuashachu, ashtahuanpish Mandac Dios nishcallatami ruhuasha” nircani?
14Riqui, cunanca ñuca llactaman rigrinillami. Shina cacpipish, tucuri punzhacunapi israelcuna cambac llactacunapi causaccunata imata ruhuagricushcata huillangapac shamui— nirca.
15Shina cayashpami, Balaamca yuyarina rimaicunahuan huillashpaca:
«Beorpac churi Balaammi rimacun.
Allita ricuc runami rimacun.
16Dios ima nishcatapish huillac,
jatun Dios imata yuyacushcatapish
yachac, imatapish ruhuac
Dios muscuipi shina, ricuchishcata
ricuc runami rimacun.
Urmashca cashpapish ñahui pascashca
urmac runami rimacun.
17Ñucaca paita cunan
mana ricushpapish,
quipaman ricushami.
Ricushpapish mana
cuchumanta ricushachu.
Jacobopac churicunamantaca shuc
luceromi llucshinga.
Paicunamantaca jatun mandac
varayucmi llucshinga.
Paimi Moabpi causaccunata
ringripi huactashpa,
cutin Setpac churicunataca
umapi llapishpa tucuchinga.
18Edom llactatapish quichungami.
Seir llactataca paicunata
piñaccunami quichunga.
Shina cacpipish, israelcunaca
yalli sinchimi canga.
19Jacobopac churicunamantaca
shuc mandacmi llactacunapi puchushca
gentecunataca tucuchinga» nirca.
20Balaam amalecitacunata ricushpa, yuyarina rimaicunahuan huillashpa:
«Amalecitacunapac llactaca
tucuita yallimi.
Shina cashpapish tucuchishpa
chingachishcami canga» nirca.
21Balaam ricushpa, yuyarina rimaicunahuan huillashpaca:
«Cancunapac huasica
sinchi huasicunami.
Rumi quingraipi cuzha shinami
canguichic.
22Shina cashpapish
tucuchishcami canga.
Asiriapi causaccuna shamushpami,
paicunataca tucui prezu
apanga» nirca.
23Balaam cutinllatac yuyurina shimicunata huillashpaca:
«¡Aij! Dios caicunata ruhuacpica,
¿pitac causac saquiringayari?
24Chipre llactamanta barcocuna
shamushpami, Asiriapi causaccunata
llaquichinga.
Heberpi causaccunatapish
chashnallatacmi llaquichinga» nirca.
25Chaimanta Balaam jatarishpaca, paipac llactamanmi cutirca. Shinallatac Balacpish paipac ñanta japishpa rircallami.
Who We AreWhat We EelieveWhat We Do
2025 by iamachristian.org,Inc All rights reserved.
