PROVERBIOS 3 - Biblia Quichua Cañar 2010

Cazuchun rimashcamanta

1Ñuca huahualla,

ñuca yachachishcacunata

amatac cungaringuichu.

Ñuca mandashcacunataca

cambac shungupi huacaichingui.

2Shina ruhuashpami unai punzhacunata,

unai huatacunata cushilla causangui.

3Cashcata nina,

shinallatac llaquic canaca,

jaicapi ama anchurichun.

Cungapi churarishca shina,

shungupi quillcashca shina,

chai yuyailla puringui.

4Chashna cashpami, Diospac ñaupapipish,

runacunapac ñaupapipish

alli nishca cangui.

5Mandac Diostaca tucui

shunguhuan cringui.

Cambac yachaipica

ama shunguta churanguichu.

6Imata ruhuashpapish

Diosta yuyaringui.

Paimi cantaca alli ñanta pushanga.

7Ama canllatac yachaisapa cashcata

yuyanguichu.

Ashtahuanpish Mandac Diosta manchashpa,

mana allimanta anchuringui.

8Shina ruhuacpica,

cambac cuerpopacca jambic,

cutin tullucunapacca sinchiyachicmi canga.

9Mandac Diostaca cambac charishcacunahuan,

punta pucushca granocunahuan alli ningui.

10Shina ruhuacpimi, granota huacaichina

ucupipish yallita jundanga.

Llullu vinopish yalli yalli tiyanga.

11Ñuca huahualla,

Mandac Dios llaquichicpica,

ama yangalla cashcata yuyanguichu.

Alli tucuchun llaquichicpipish,

ama piñaringuichu.

12Mandac Diosca cuyashpami,

shuc taita paipac churita cuyashpa

llaquichic shina llaquichin.

13Cai alli yachaita tarishpa,

allita entendicca cushicunmi.

14Cai alli yachaica

cullquitapish yalli valicmi.

Cai alli yachaimanta japinaca

valishca curitapish yallimi.

15Valishca perlastapish yalli valicmi.

Cai yachaihuanca

ima sumaccunahuanpish

maita mana chimbapuraipacchu.

16Alli maquipica

unai huata causanatami charicun.

Cutin lluqui maquipica

charic tucunata,

alli nishca canatami charicun.

17Paipac ñancunaca sumac

cushilla purina ñancunami.

18Paita ucllarishpa causaccunamanca

causaita cuc yura shinami can.

Cai alli yachaita chariccunaca

yallitami cushicun.

19Mandac Diosca cai alli yachaihuanmi

cai allpataca ruhuarca.

Alli yuyaihuanmi jahua pachataca

maita mana cuyuchipacta sinchita churarca.

20Tucuita yachac cashpami,

jatun mama cuchatapish raquirca.

Jahua pacha puyumantami tamyapish urman.

21Ñuca huahualla,

caicunataca yuyarangui.

Mandashcatapish,

cunashcacunatapish ama cungaringuichu.

22Cambac almamanca causaita cunga.

Cungapi churashca huallca shinami

cushichinga.

23Shina cacpimi ñancunataca

mana manchashpa puringui.

Shinallatac cambac chaquipish

mana mitcaringachu.

24Camapi siririshpapish mana manchanguichu.

Ashtahuanpish siririshcahuanmi

sumacta sueñungui.

25Cungailla canta llaqui japinatapish,

shinallatac Diosta mana manchaccunata

llaqui japicpipish, canca mana manchanguichu.

26Mandac Diosmi canhuan canga.

Paimi cambac chaqui tucllapi

urmagricucpipish cuidanga.

27Maijanta ayudana cacpi,

ayudai pudishpaca ayudangui.

28Maijan imata mañacpi,

mañacushcata maquipi charicushpaca:

“Cutimugri, caya cushallami” ama ninguichu.

29Maijan canpi shunguta churashpa causacpica,

ama paita llaquichinguichu.

30Canta ima millaita manapish ruhuacpica,

ama paihuan piñanacunguichu.

31Yallita llaquichic runa ima shina

cacta ricushpa, ama canpish

chashnallatac casha ninguichu.

Pai imata ruhuashpa causacuctapish

ama catinguichu.

32Mandac Diosca millaita ruhuac

runataca millanayachinmi.

Ashtahuanpish cashcata ruhuac runahuanca

tandarishpami causan.

33Mandac Diosca paita mana manchacpac

huasitaca maldiciangami.

Ashtahuanpish cashcata ruhuacpac

huasitaca bendiciangami.

34Burlashpa asiccunataca

Mandac Diospish burlashpa asingami.

Ashtahuanpish yangallacunataca cuyangami.

35Yachaisapacunaca alli nishcami canga.

Ashtahuanpish mana entendiccunaca

pingaichishcami canga.