JOSUÉ 3 - Biblia Quichua Cañar 2010

Israelcuna Jordányacuta pasashcamanta

1Josueca cayandi tutamantami Sitim pambamanta tucui israelcunahuan, Jordán yacu ladoman chayarca. Chaipimi yacuta manarac pasashpa samarircacuna.

2Ña quimsa punzha quipami israelcunata quipa mandaccunaca carpacuna chaupiman rishpa,

3israelcunataca: «Mandac Dios ari nishca quillcata huacaichina Arcata levita curacuna huandushpa ricpica, cancuna tiyacushcamanta catishpa ringuichic.

4Shina catishpami, maita rinata yachanguichic. Cancunaca cai ñantaca mana rishcanguichicchu. Arcataca shuc kilómetro caruta catinguichic. Chaimanca ama cuchuyanguichicchu» nirca.

5Josué israelcunata rimashpaca: «Chuyayashpa, Diospaclla tucuichic. Mandac Diosca cayami cancunaman sumaimanacunata ruhuagrin» nirca.

6Quipata curacunata Josué rimashpaca: «Dios ari nishca quillcata huacaichina Arcata huandushpa, israelcunapac ñaupata richic» nirca.

Shina nicpimi, Arcata huandushpa, israelcunapac ñaupata rircacuna.

7Chashna nishca quipami Mandac Diosca Josuetaca: «Cunan punzhamanta pachami cantaca israelcunapac ñaupapi jatunyachigrini. Chashna ruhuacpimi, Moises-huan ima shinami carcani, chashnallatac canhuanpish, cashcata yachangacuna.

8Ñuca ari nishca quillcata huacaichina Arcata huandushpa ric curacunataca: “Jordán yacu pataman chayashpa, chaipi shuyanguichic” ningui» nirca.

9Josueca israelcunataca: «Cancunata Mandac Dios rimashcata uyangapac caiman cuchuyaichic.

10Cancunaca caita ricushpami, causac Dios cancunapac chaupipi cashcataca yachanguichic. Paimi cunanca cananeocunatapish, heteocunatapish, heveocunatapish, ferezeocunatapish, gergeseocunatapish, amorreocunatapish, jebuseocunatapish cancunapac ñaupamanta llucchishpa cachanga.

11Tucui cai pachata Mandac Dios ari nishca quillcata huacaichina Arcaca cancunapac ñaupatami Jordán yacuta pasanga.

12Cunanca chunga ishcai Israel aillucunamanta chunga ishcai runacunata acllaichic. Cada aillumanta shucta acllaichic.

13Tucui cai pachata Mandac Diospac Arcata huandushpa ric curacuna chaquita Jordán yacupi churacpica, chai yacuca chaupiringami. Jahuamanta shamuc yacuca pirca tucushpami saquiringa» nirca.

14Israelcunaca Jordán yacuta pasangapac paicunapac carpa huasicunamanta llucshicpica, Dios ari nishca quillcata huacaichina Arcata huanduc curacunaca israelcunapac ñaupatami rirca.

15(Chai yacuca cosecha punzhacunapica, patacamanmi jundac carca). Ashtahuanpish Diospac Arcata huanduccuna Jordán yacu pataman chayashpami, chai huandushpa ric curacuna chaquicunata apyacpica,

16jahuamanta shamuc yacuca Saretán pueblo ladopi tiyac Adam pueblomanta ashtahuan carupimi tandarishpa saquirirca. Shinami Arabá cuchaman, Cachi Cuchaman ric yacuca chaupirishpa chaquirirca. Shina tucucpica, israelcunaca Jericó puebloman pasarcacunallami.

17Ashtahuanpish Mandac Dios ari nishca quillcata huacaichina Arcata huandushpa ric curacunaca Jordán yacu chaupipimi chaquishca allpapi tucui gentecuna pasangacaman shayacurcacuna. Chashnami Jordán yacuca tucui israelcuna pasangacaman chaquishca carca.