1Jatun mandac Ezequías chunga chuscu huatata mandacucpimi, Asiria llactata jatun mandac Senaqueribca Judá llactapi tiyac muyundita jarcashca llactacunapi causaccunahuan macanacungapac huichai rirca. Chashna rishpami, chai llactacunataca japirca.
2Asiria llactata jatun mandacmi Laquis llactamanta paipac quipa mandacta achca soldadocunahuan Jerusalenta jatun mandac Ezequias-huan macanacuchun cacharca. Chashna cachacpimi, jahua ladoman tiyac tanqueman shamuc yacu ladopi carpacunata shayachishpa tiyarirca. Chaica tacshaccunapac allpaman rina ñanpimi carca.
3Chaipi cacpimi, jatun mandacpac mayordomo Eliaquimca quillcac Sebnahuan, jatun mandacpac huillac Joahuan tupangapac llucshirca. Eliaquimca Hilquiaspac churimi carca. Joaca Asafpac churimi carca.
4Chai quipa mandacca paicunataca:
—Cunanca, Asiria llactata jatun mandacca Ezequiastaca: “¿Imapitac shunguta churashpa cushilla cangui?
5Canca: ‘Jatun macanacuita ruhuangapacca yalli sinchi, alli yuyaiyucmi cani’ nicunguimi. Can chashna yuyashcaca yangallami. ¿Canca imapi shunguta churashpatac ñucata mana manchashpa cariyangui?
6Canca carrizo caspita taunac shinami, Egiptopi causaccunapi shunguta churangui. Maijanpish chaipi shunguta churashpa, taunarictaca astilla maquipi yaicushpa chugrichic shinami, Egipto llactata jatun mandac Faraonca ruhuanga” nirca.
7Cancunaca: ‘Ñucanchic Mandac Diospimi shunguta churanchic’ ninguichicchari. ¿Manachu cai lomacunapi tiyac huasicunata, altarcunataca Ezequías anchuchirca? Chaicunata anchuchishpaca, ¿manachu Judá llactapi, Jerusalenpi causaccunataca: “Cai altar ñaupapimi Mandac Diostaca alli nina canguichic” nishpa mandarca?— nirca.
8Cunanca, Asiria llactata jatun mandacman soldadocunata mañai. Can caballocunapi ric soldadocunata cucpica, ishcai huaranga caballocunatami cusha.
9Egiptomanta carretacunapi, caballopi ric soldadocunapi shunguta churashpaca ñuca amopac soldadocunapuramanta yangalla soldadocunahuanpish, ¿ima shinatac sinchiyashpa macanacui pudinguiyari?
10Mandac Dios manapish mandacpimi, cai llactata tucuchingapac shamushcani. Mandac Diosllatacmi ñucataca: “Chai llactaman huichai rishpa, tucuchigri” ninmi nigrichic— nirca.
11Shina nicpimi, Eliaquim, Sebna, Joa runacunaca chai quipa mandactaca:
—Ñucanchicca arameo rimaitaca entendinchicmi. Chaimanta canta servic ñucanchic-huanca chai rimaipi rimaiyari. Ashtahuanpish ama pirca huashapi shayacuc Judá llactapi causaccunapac rimaipi rimaichu— nirca.
12Shina nicpimi, chai quipa mandacca:
—¿Ñuca amoca cai shimicunataca canllaman, cambac amollamanchu huillachun cacharca? ¿Manachu cai pirca jahuapi cac gentecunamanpish huillachun cacharca? ¿Manachu paicunapish cancuna shinallatac quiquin mapayachishcallatatac micunga, ubianga?— nirca.
13Shina nicpimi, chai quipa mandacca shayarishpa Judá rimaipi sinchita caparishpaca:
—¡Asiria llactata jatun mandac rimashcata alli uyaichic!
14Paica: “Ezequiasca cancunataca mana quishpichi pudingachu. Chaimanta ama pai pandachichun saquichicchu.
15Shinallatac Ezequías: ‘Mandac Diosca ñucanchicta quishpichingatacmi. Cai llactataca Asiria llactata jatun mandacpac maquipica mana churangachu’ nishpa, Mandac Diospi shunguta churachunpish ama saquinguichicchu” nirca.
16¡Ama Ezequías nishcata uyanguichicchu! Asiria llactata jatun mandacca: “Alli tucungapac ñucapacman shamuichic. Shina ruhuashpaca, tucui cancunami cancunapac uvas chagramanta, olivos chagramanta micunguichic. Yacutapish tucui cancunami quiquin junducunamanta ubianguichic.
17Cancunapac llacta shinallatac alli granopish, vinopish, tandapish, uvas chagrapish tiyac llactaman ñuca pushac shamungacaman chashna causaichic.
18Ezequías: ‘Mandac Diosca quishpichingallami’ nishpa, pandachichun ama saquichicchu. ¿Shuctac llactapac maijan dioscunaca Asiria llactata jatun mandacpac maquimanta quishpichi pudircachu?
19¿Maipitac Hamat, Arfad, Sefarvaim llactacunapi causaccunapac dioscunaca? ¿Chai dioscunaca Samaria llactataca ñuca maquimanta cacharichi pudircachu?
20Cai llactacunapi tiyac dioscunapuramanta, ¿maijan Diostac paipac llactata ñuca maquimanta quishpichirca? ¿Mandac Dioschu Jerusalentaca ñuca maquimanta quishpichinga?” ninmi ningui— nirca.
21Chashna nicucpipish, imata mana nishpa, upalla uyarcacunallami. Chaica, jatun mandac Ezequiasmi paicunataca: “Imatapish ama rimanguichicchu” nishca carca.
22Chai quipami mayordomo Eliaquimpish, quillcac Sebnapish, jatun mandac huillac Joapish paicunapac churanata lliquishpa, Ezequiaspacman shamurca. Shina shamushpami, Rabsaces ima nishcata huillarca. Eliaquimca Hilquiaspac churimi carca. Joaca Asafpac churimi carca.
Who We AreWhat We EelieveWhat We Do
2025 by iamachristian.org,Inc All rights reserved.
