1Amasiasca ishcai chunga pichca huatata charishpami mandai callarirca. Paica ishcai chunga iscun huatatami Jerusalenpi mandarca. Paipac mamaca Jerusalenmanta Joadanmi carca.
2Amasiasca mana tucui shunguhuan ruhuacushpapish Mandac Diospac ñaupapica allitami causarca.
3Amasías ña mandai callarishpaca, paipac taita jatun mandacta huañuchic serviccunataca huañuchircami.
4Ashtahuanpish Moisés mandashpa quillcashca shinallatacmi paicunapac churicunataca mana huañuchirca. Chaipica, Mandac Dios Moisesta rimashpaca: «Taitacunaca mana churicunapac juchamanta huañungachu. Shinallatac churicunaca mana taitacunapac juchamanta huañungachu. Ashtahuanpish maijan cashpapish paipac quiquin juchamantami huañunga» nishcami carca.
5Amasiasca Judá aillucunata tandachishpami Judapac, Benjaminpac familiacunata mandachun, huaranga soldadocunata mandaccunata, patsac soldadocunata mandaccunata churarca. Chai quipaca, ishcai chunga huatayucmanta huichaiman mashnalla caricuna tiyashcata yachangapac, shuticunata japishpami macanacuiman ripacllacunata acllashpa, quimsa patsac runacunata tarirca. Paicunaca lanzacunahuan escudocunahuanmi carca.
6Shinallatac patsac talento cullquita cushpami, Israel llactamanta patsac huaranga sinchi soldadocunata apamurca.
7Ashtahuanpish Diospaclla cac shuc runa paipacman shamushpaca:
—Mandac Diosca israelcunamantapish, Efraín aillucunamantapish anchurishcami. Shina cashcamanta jatun mandaclla, Israel soldadocunahuanca ama richu.
8Ashtahuanpish can mana uyashpa, chai soldadocunahuan sinchi tucushpa macanacungapac ricpica, Mandac Diosllatacmi canta piñaccunapac maquipi churanga. Mandac Diosllami mishachingapacpish, mana mishachingapacpish poderta charin— nirca.
9Shina nicpi, Amasiasca Mandac Diospac runataca:
—Patsac talento cullquita Israel soldadocunaman cushcataca, ¿imatatac ruhuasha?— nirca.
Shina nicpimi, Mandac Diospac runaca:
—Mandac Diosca chaitapish yallitami cunata pudin— nirca.
10Shina nicpimi, Amasiasca Efraín aillumanta shamushca soldadocunata paicunapac huasicunaman cuti richun chicanyachirca. Chaimantami paicunaca Judá llactapi causaccunahuan yallita piñarishpa, paicunapac huasicunamanpish piña piña cutircacuna.
11Amasiasca ashtahuanpish sinchi tucushpami, Cachi pambaman paipac soldadocunahuan rishpa, Seir llactapi causaccunataca chunga huaranga soldadocunata huañuchirca.
12Judá llacta soldadocunaca Seir llactamanta caishuc chunga huaranga soldadocunata causacta japishpami, rumi quingrai jahua pataman apashpa, singuchirca. Shina singuchicpica, tucuimi ñuturirca.
13Paicuna chashna ruhuacpica, Amasías macanacuiman mana aparishca cutichishpa cachashca soldadocunaca Judá llacta pueblocunaman yaicushpami, Samaria pueblomanta Bet-horón pueblocaman yallita llaquichishpa, quimsa huaranga runacunata huañuchishpa, achca charishcacunatapish quichushpa aparca.
14Amasías chai edomitacunata huañuchishpa cutimushpaca, Seir llactapi causaccunapac dioscunata apamushpami paipac dioscuna cachun, paipac ñaupapi churashpa alli nishpa inciensota rupachirca.
15Chaimantami Mandac Diosca Amasias-huan piñarishpa, pai ima nishcata huillac shuc runata cacharca. Chai huillacca:
—¿Ima nishpatac canca chai llactapi causaccunapac dioscunata mashcangui? Chai dioscunaca paicunataca cambac maquimantaca mana quishpichi pudircachu— nirca.
16Dios ima nishcata huillac shina nicpica, jatun mandacca:
—Jatun mandacman alli yuyaita cuchunca, ¿pitac cantaca churarcayari? Canta ama huañuchichunca upalla cai— nirca.
Shina nicpimi, cutinllatac Dios ima nishcata huillac runaca:
—Alli yuyaita ñuca cushcata mana uyashpa mana allita ruhuashcamantami, Mandac Diosca canta tucuchinata yuyarirca— nirca.
17Ashtahuanpish Judá llactata jatun mandac Amasiasca shuccuna yuyaita cushcata uyashpami, Israel llactata jatun mandac Joaspacman cutishpaca: «Shamui, ñahui ñahui ricunacushun» nichunmi cacharca. Joasca Joacazpac churimi carca. Joacazca Jehupac churimi carca.
18Chaimantami Israel llactata jatun mandac Joasca Judá llactata jatun mandac Amasiasmanca: «Líbano urcupi tiyac uchilla sacha yurami, Líbano urcullapitac tiyac cedro yurataca: “Cambac ushitaca ñuca churihuan cazarachingapac cui” nichun cacharca. Riqui, Líbano urcumanta millai animalcuna shamushpami, chai yurataca sarunacurca.
19Canca: “Riqui, Edom llactapi causaccunataca misharcanimi” nishpami, cambac shungupi jatun tucushpa cushicurcangui. Cunanca, cambac huasipi cailla. ¿Ima nishpatac cambacpish, Judá llactapi causaccunapacpish llaquita mashcanguiyari?» nichun cacharca.
20Ashtahuanpish Amasiasca mana uyasha nircachu. Mandac Diosca paicunata piñaccunapac maquipi churana cashcamantami chashna mana uyasha nirca. Paicunataca Edom llactapi causaccunapac dioscunata mañashcamantami chashnaca ruhuarca.
21Israel llactata jatun mandac Joasca huichai rishpami Judá llacta Bet-semes pueblopi macanacungapac shamushpa, paipish, Judá llactata jatun mandac Amasiaspish ñahui ñahui ricunacurca.
22Ashtahuanpish Judá llactamanta soldadocunaca Israel soldadocuna mishacpimi, paicunapac huasicunaman miticushpa callparcacuna.
23Israel llactata jatun mandac Joasca Judá llactata jatun mandac Amasiastaca Bet-semes pueblopi japishpami Jerusalenman apamurca. Amasiasca Joaspac churimi carca. Joasca Joacazpac churimi carca. Jerusalén pircataca Efraín pungumantaca esquinapi cac pungucamanmi patsac pusac chunga metrota tuñirca.
24Chai quipaca Mandac Diospac huasipi huacaichishca curitapish, cullquitapish, imalla charishcatapish quichurcami. Chaicunataca Obed-edommi cuidac carca. Mandana huasipi huacaichishca imalla valishcacunatapish apashpami, mandaccunapac churicunatapish apashpa Samaria puebloman rirca.
Amasiaspac tucuri huatacunamanta25Judá llactata jatun mandac Joaspac churi Amasiasca Israel llactata jatun mandac Joacazpac churi Joás huañushca quipaca, chunga pichca huatacamanmi causarca.
26Punta punzhacuna, quipa punzhacuna Amasías ashtahuanpish imata ruhuashcacunaca Judá llactata, Israel llactata jatun mandaccuna imata ruhuashcacunata quillcashcapimi tiyacun.
27Mandac Diosmanta Amasías anchurishca punzhamanta pachami paita piñashpa, huañuchingapac Jerusalenpi pacalla parlanacurca. Chaimantami Amasías Laquis pueblopi miticungapac ricpipish, catishpa rishpa huañuchirca.
28Paita huañuchishpaca caballocunapi Jerusalenman apamushpami, Davidpac pueblopi paipac ñaupa taitacunapac ladopi enterrarca.
Who We AreWhat We EelieveWhat We Do
2025 by iamachristian.org,Inc All rights reserved.
