1Chaquishca pambaca cushicungami.
Yuracunapish cushicushpami,
sumac rosas sisa shina sisanga.
2Chashna sisashpami
cushicushpa cantanga.
Líbano urcuta shina,
Carmelo urcuta shina,
Sarón pambata shinami
Mandac Diosca sumacta ruhuanga.
Paicunaca Mandac Dios
sumaimana cashcatapish,
paipac achic nicuctami ricunga.
3Irquiyashca maquicunatapish,
mucucunatapish sinchiyachichic.
4Manchaihuan causaccunataca:
«¡Sinchiyaichic,
ama manchaichicchu!
Mandac Diosmi cancunata
piñaccunata llaquichingapac
shamunga.
Paillatacmi quishpichingapac
shamunga» ninguichic.
5Pai shamucpica,
mana ricuccunapac ñahuipish,
mana uyaccunapac ringripish
pascaringami.
6Suchupish taruga shinami saltanga.
Mana rimai pudicpish
sumactami cantanga.
Shitashca pambapi allacpipish
yacuca llucchingami.
Chaquishca pambacunatami
yacuca callpacunga.
7Chaquishca rupacuc tiyupish
yacu cuchami tucunga.
Chaquishca allpacunataca
yacumi callpacunga.
Chacal animalcuna causanapica
carrizocuna, totoracunami
huiñanga.
8Chaipica chaqui ñanmi tiyanga.
Chai ñantaca jucha illac
ñan ningacunami.
Chai ñantaca juchayuc runapish,
yuyai illacpish mana puringachu.
Chai ñantaca Mandac Dios
munashca shina
causaccunallami puringa.
9Chaipica leoncunapish
mana tiyangachu.
Chaitaca shuctac millai
animalcunapish,
mana huichai shamungachu.
Chaipica ima animalcunapish
mana tupangachu.
Chaitaca quishpirishcacunallami
puringa.
10Mandac Dios quishpichishcacunaca
cushicushpami, Sión llactaman
cantashpa yaicunga.
Paicunaca huiñai huiñaitami
cushicunga.
Paicuna yallita cushicuihuan
cacpica, ima llaquipish
mana japingachu.
Who We AreWhat We EelieveWhat We Do
2025 by iamachristian.org,Inc All rights reserved.
