JOSUÉ 22 - Biblia Quichua Cañar 2010

Rubenpac, Gadpac, Manasespac chaupi aillucunapaicunapac carpacunaman cutishcamanta

1Chai quipaca Josueca Rubenpac, Gadpac aillucuna, shinallatac Manasespac chaupi aillutaca:

2«Cancunaca Mandac Diosta servic Moisés mandashcatapish, shinallatac tucui ñuca mandashpa rimashcatapish tucuitami pactachishcanguichic.

3Cancunapac huauquicunataca unai huatacunatami mana saquishpa cunancaman caipi canguichic. Ashtahuanpish cancunata Mandac Dios mandashcatami pactachishcanguichic.

4Cancunata Mandac Diosca pai nishca shinami, cancunapac huauquicunamanca cushi causaita cushca. Cunanca Jordán yacu chimba ladopi Mandac Diosta servic Moisés cancunaman cushca llactaman, cancunapac carpacunaman cutichiclla.

5Cancunaca Mandac Diosta servic Moisés mandashcata yuyarashpa pactachinguichic. Moisés mandashpaca: “Cancunata Mandac Diosta cuyanguichic, Dios munashca shina causashpa, paillatac catiranguichic. Shinallatac tucui shunguhuan, tucui almahuan servishpa causanguichic” nishcami» nirca.

6Chai quipaca Josué paicunata bendiciashpa cayacaman nicpica, paicuna causana carpa huasicunaman cutircacunallami.

7Moisesca Manasespac chaupi aillumanca Basán llactapimi allpata cushca carca. Cutin caishuc chaupi aillumanca Josuemi Jordán yacumanta inti tigrana ladoman paicunapac huauquicunapac chaupipi allpata curca. Paicunatapish bendiciashpami Josueca carpa huasicunaman cacharca.

8Chashna cachacushpaca:

—Cancunaca cancunapac carpa huasicunaman, achca charishcacunahuan, achca animalcunahuan, curihuan, cullquihuan, broncehuan, achca churanahuan cutichiclla. Cancunata piñaccunamanta quichushcacunataca cancunapac huauquicunahuan chaupinacunguichic— nirca.

9Shinami Rubenpac, Gadpac aillucunapish, Manasespac chaupi aillupish Canaán llactapi cac Silo pueblopi israelcunamanta caruyashpa, paicunapac Galaad llactaman cutimurca. Chai llactataca Mandac Dios Moisesta mandashca shinami, paicuna causachun curca.

Jordán yacu ladopi altarta ruhuashcamanta

10Rubenpac, Gadpac aillucunapish, Manasespac chaupi aillupish, Canaán llacta Jordán yacu lindero ladoman chayashpaca, chai Jordán yacu ladopimi shuc jatun altarta ruhuarca.

11Chaitami israelcunaca: “Rubenpac, Gadpac aillucunapish, Manasespac chaupi aillupish Canaán llacta chimba lado Jordán yacu lado israelcunapac ladopimi shuc altarta ruhuashca” nicta uyarca.

12Chaimantami israelcunaca paicunahuan macanacungapac huichai ringapac Silo pueblopi tandanacurca.

13Israelcunaca Eleazar curapac churi Fineestami Galaad llactapi causac Rubenpac, Gadpac shinallatac Manasespac chaupi aillupacman cacharca.

14Finees-huanca Israel aillucunapac taitacunapac familiacunata mandac chunga runacunatami cacharca. Paicunaca huaranga huaranga israelcunapac taitacunapac huasi ucupuramanta mandaccunami carca.

15Paicunami Rubenpac, Gadpac aillucunapacman shinallatac Manasespac chaupi aillupacman, Galaad llactaman chayashpaca:

16—Mandac Diospac tucui tandanacushca israelcunami: “¿Ima nishpatac yachashca jahua israelcunapac Diosta piñachishpa mana cazucunguichic? Cunanca, ¿ima nishpatac Mandac Diosta catinata saquishpa, paita mana cazushpa, shuc altarta ruhuarcanguichic?

17¿Peor shuti diosta mañashpa mana allita ruhuashcaca cancunamanca ashallachu? Chai mana allita ruhuashcamantaca cancunamantami mapayashca canchic. Chaimantami Mandac Diospac tandanacushca israelcunaca yallita llaquita aparcanchic.

18Mandac Diosta catinataca ¿ima nishpatac saquinguichic? Cunan paita piñachishpa, llaquichicpica, caya punzhami mandac Diosca tucui tandanacushca israelcunahuanmi piñaringa.

19Cancuna, causacuc llacta mapayacpica, Mandac Diospac allpaman shamuichic. Caipica Dios-huan tupana huasipish tiyanmi. Caiman shamushpa, ñucanchic-huan causaichic, allpata japinguichicllami. Ashtahuanpish ñucanchicta Mandac Diospac altar tiyashca jahua, shuctac altarta ruhuashpa, Mandac Diostapish piñachishpa ama ñucanchictapish llaquichichicchu.

20¿Zerapac churi Acán Diospac chicanyachishcata japicpi, Mandac Dios tandanacushca israelcunahuan piñarishcaca manachu ñucanchicta llaquichirca? Chai runaca pai mana allita ruhuashcamantaca mana paillachu huañurca” nichunmi cachan— nirca.

21Shina nicpimi Rubenpac, Gadpac aillucunapish, Manasespac chaupi aillupish huaranga huaranga israelcunata mandaccunataca:

22—Mandac Diosca dioscunapac Diosmi. Ñucanchic chai altarta imapac ruhuashcataca paimi yachan. Ñucanchicca mana paita catinata saquishcamanta, mana paita mana cazushcamantachu cai jatun altarta ruhuashcanchic. Chaica caicunatami israelcunamanca huillanchic. Mana chashna cacpica, ama ñucanchicta quishpichinguichicchu.

23Ñucanchicca Mandac Diosmanta mana caruyashcanchicchu. Cai altartaca mana Diosman animalta cushpa tucui rupachingapacchu, mana ofrendata cungapacchu, mana Dios-huan alli tucungapac cungapacchu ruhuashcanchic. Chaicunata ruhuangapac chai altarta ruhuashca cacpica, ñucanchicta Mandac Dios llaquichichun.

24Ashtahuanpish caitaca quipa punzhacuna cancunapac churicuna ñucanchic churicunata: “Israelcunata Dios-huanca ima ricunata mana charinguichicchu.

25Rubenpac, Gadpac churicunalla, ñucanchic-huan cancunahuan linderoca Jordán yacutami Mandac Diosca churashca. Chaimanta Mandac Diosmantaca ima japinata mana charinguichicchu ningami” yuyashpami, cai altartaca ruhuashcanchic. Chashna cancunapac churicuna nishpaca, ñucanchic churicunata Mandac Diosta mañashpa causanatami cungachinga— nirca.

26Chaimantami ñucanchicca: “Cunanca shuc altarta ruhuashunchic. Chai altarca mana Diosman cushpa tucui rupachingapacchu, shinallatac mana animalta cungapacchu,

27ashtahuanpish ñucanchicpish, Mandac Diospac ñaupapi servic cashcata, animalta cushpa tucui rupachic cashcata, ofrendata cuc cashcata, Dios-huan alli tucungapac ofrendata cuc cashcata ñucanchicpac, cancunapac quipa huiñai churicunaman shuc ricuchina cachunmi ruhuanchic. Shina ruhuacpimi, quipa punzhacunaca cancunapac churicunaca ñucanchic churicunataca: ‘Cancunaca Mandac Diosmantaca ima japinatapish mana charinguichicchu’ nishpaca mana rimanga” nircanchic.

28Ñucanchicca: “Ñucanchicta cashpa, mana cashpaca ñucanchic churicunata cashpa shamui punzhacunapi chashna cacpica: ‘Riquichic, ñucanchic taitacunaca Mandac Diospac altarta shinallatacmi ruhuashca. Cai altarca mana Diosman animalta cushpa tucui rupachingapacchu, mana animalta cungapacchu, ashtahuanpish ñucanchicpish, cancuna shinallatac cashcata ricuchingapacmi cai altarta ruhuarcanchic’ nirca.

29Mana Mandac Diosta piñachingapacchu, mana Mandac Diosta catinata saquingapacchu, cai altartaca ruhuashcanchic. Caitaca mana Diosman animalta cushpa tucui rupachingapacchu, mana grano ofrendata cungapacchu, Dios-huan alli tucungapac mana cungapacchu ruhuashcanchic. Caica mana Dios-huan tupana huasi ñaupapi tiyac cancunata Mandac Diospac altar tiyashca jahua ruhuashcachu” nirca.

30Rubenpac, Gadpac aillucuna, Manasespac chaupi aillu nishcata Fineespish, tandanacushca israelcunata mandaccunapish, huaranga huaranga israelcunata mandaccunapish allimi nirca.

31Chaimantami Eleazar curapac churi Fineesca Rubenpac, Gadpac aillucunata Manasespac chaupi aillutaca:

—Cunanmi Mandac Dios ñucanchic-huan cashcataca yachani. Cancunaca Mandac Diosta piñachishpa, paimanta mana caruyashcanguichicchu. Cunanca, israelcunaca mana Mandac Dios llaquichishcachu canchic— nirca.

32Eleazar curapac churi Fineespish caishuc mandaccunapish, Rubenpac, Gadpac aillucunapac Galaad llactamanta anchurishpa israelcunapac Canaán llactaman cutimurca. Paicunami imata parlashcata israelcunaman huillarca.

33Paicuna huillashcata, israelcuna uyashpaca allimi nishpa Diosta allimari cangui nircacuna. Chai punzhamanta pachami Rubenpac, Gadpac aillucuna causacuc llactaman huichai rinataca mana parlanacurca.

34Rubenpac, Gadpac churicunaca cai altartaca: «Caimi ñucanchicpurapica Mandac Dios cashcata ricuchicca» nishpami Ed nishpa shutichirca.