JEREMÍAS 39 - Biblia Quichua Cañar 2010

Jerusalenpi causaccunata mishashcamanta(2 R 24.20—25.21; 2 Cr 36.17-21; Jer 52.3-30)

1Judá llactata jatun mandac Sedequías iscun huata, chunga quillata mandacucpimi, Babilonia llactata jatun mandac Nabucodonosorca paipac soldadocunahuan Jerusalenta muyunacurca.

2Jatun mandac Sedequías chunga shuc huata, chuscu quilla, iscun punzhata mandacucpimi, Jerusalén muyundi jatun pircata tigrachishpa,

3Babilonia llactata jatun mandac churashca mandaccunaca Jerusalenman yaicurca. Chashna yaicushpami, chaupi pungu ladocunapi carpacunata shayachishpa tiyarirca. Chai mandaccunaca: Nergal-sarezer, Samgar-nebo, Rabsaris nishca Sarsequim, Rabmag nishca Nergal-sarezer, shinallatac Babilonia llactata jatun mandac churashca tucui mandaccunami carca.

4Chaita ricushpami, Judá llactata jatun mandac Sedequiaspish, paipac soldadocunapish llactamanta tuta miticushpa rirca. Jatun mandacpac huerta chaupita rishpami, ishcai jatun pirca chaupipi tiyac punguta llucshirca. Chaita llucshishpaca Arabá jatun pambamanmi rirca.

5Shina ricpipish, caldeo soldadocuna cati rishpami, Sedequiastaca Jericó pambapi japirca. Chaipi japishpaca Hamat llactapi tiyac Ribla llactamanmi Babilonia llactata jatun mandac Nabucodonosorpacman aparca. Chaipimi paita llaquichichun churarca.

6Babilonia llactata jatun mandacca Sedequiaspac churicunataca paipac ñaupallapitacmi huañuchirca. Judá llactata mandaccunatapishmi Babilonia llactata jatun mandacca huañuchichirca.

7Jatun mandac Sedequiastaca ñahuicunata llucchishpami, Babilonia llactaman apangapac bronce cadenahuan huatarca.

8Caldeo soldadocunaca mandana huasitapish, Jerusalén huasicunatapish rupachircami. Muyundi jatun pircacunatapish urmachircami.

9Soldadocunata mandac Nabuzaradanca Jerusalenpi saquirishcacunatapish, paicuna parte tucushca runacunatapish Babilonia llactamanmi aparca.

10Shina apashpapish soldadocunata mandac Nabuzaradanca imata mana charic huacchacunataca Judá llactallapitacmi saquirca. Paicunamanca allpacunata, uvas chagracunatami curca.

Nabucodonosor Jeremiasta cacharishcamanta

11Jeremiasta cuidachun nishpami Nabucodonosorca soldadocunata mandac Nabuzaradantaca:

12«Jeremiasta allita cuidangui. Paitaca ama llaquichinguichu. Pai imata mañashcata ruhuangui» nishca carca.

13Chaimantami soldadocunata mandac Nabuzaradanca Rabsaris nishca Nabuzabán mandac-huan, Rabmag nishca Nergal-sarezer mandac-huan, Babilonia llactata jatun mandac churashca tucui mandaccunahuan yuyashpa,

14cárcel pungumanta Jeremiasta llucchichun cacharca. Chaimanta llucchishpaca, Ahicampac churi, Safanpac nieto Gedaliasmanmi huasipi pushashpa causachun curca. Shinami Jeremiasca Judá llacta gentecunapac chaupipi causacurca.

Ebedmelec ima tucunata huillashcamanta

15Cárcel pungupi prezu tiyacucpi, Mandac Diosca Jeremiastaca:

16«Ebedmelecpacman rishpa, israelcunapac tucuita Mandac Diosca: “Ñuca rimashcata pactachishpami, cai llactapi causaccunaman allita ruhuanapac randica llaquichigrini. Chai llaqui punzhacunataca quiquin ñahuihuantacmi ricugringui.

17Shina cacpipish, chai llaqui punzhacunapica ñucami canta quishpichisha. Can manchana runacunapac maquipica mana yaicunguichu.

18Cantaca mana espadahuan huañuchingachu. Ashtahuanpish ñucallatacmi cantaca paicunamanta quichuc shina quishpichisha. Ñucata yuyashpa causacushcamantami cantaca quishpichisha. Chaitaca Mandac Dios ñucami nini” ninmi ningui» nirca.