NEHEMÍAS 13 - Biblia Quichua Cañar 2010

Shuctac llactamanta shamushpa Israelpi causaccunatachicanyachishcamanta

1Chai punzhapica Moisés quillcashcatami tucui gentecunapac ñaupapi rezarca. Chai quillcapica moabitacunapish, amonitacunapish Dios acllashcacunahuanca mana tandanacungachu nishpa quillcashcami taririrca.

2Paicunaca israelcunataca mana tandahuan, yacuhuan tupangapac shamurcacunachu, ashtahuanpish israelcunata maldiciachunmi Balaamman cullquita curcacuna. Shina ruhuacpipish, ñucanchic Diosca chai maldiciashcataca bendiciontami ruhuarca.

3Chai mandashcata uyashpami, shuc llactamanta shamushpa Israelpi causaccunataca chicanyachirca.

4Manarac chashna ruhuacpica, Diospac huasita cuidac Eliasib curaca Tobiaspac familiami tucushca carca.

5Shina cashpami, shuc jatun ucuta ruhuashpa paiman cushca carca. Chai ucupimi ofrendacunata, inciensota, imalla charinacunata, trigota, vinota, aceiteta, chungamanta shucta cushcacunataca huacaichic carca. Chai huacaichishcacunatami levitacunaman, cantaccunaman, pungupi cuidaccunaman, curacunaman cuchun mandashca carca.

6Eliasib cura chashna ruhuacpica, ñucaca mana Jerusalenpichu carcani. Ashtahuanpish jatun mandac Artajerjes quimsa chunga ishcai huatata Babilonia llactata mandacui punzhacunapica jatun mandacta ricungapacmi rircani.

7Ña Jerusalenman cutimushpami, Eliasibca Tobiasta cazushpa, Diospac huasi pungupi shuc ucuta ruhuashpa, mana allita ruhuashcata ricurcani.

8Chaita ricushpami, yallita piñarishpa chai ucumanta Tobías tucui charishcacunata canzhaman llucchishpa shitarcani.

9Chai quipami chai ucuta chuyanllata ruhuashpa, Diospac huasipi ima charishcacunata, ofrendacunata, inciensota chaipi cutin churachun mandarcani.

10Shinallatac levitacunaman micunata mana cucpi, levitacuna, Diospac huasipi servishpa cantaccuna, paicunapac allpacunaman rishcata yachac chayarcani.

11Chaita yachashpami mandaccunataca: «¿Ima nishpatac Diospac huasica shitashca saquirirca?» nishpa sinchita rimarcani. Chai quipami curacunatapish, levitacunatapish tandachishpa, paicuna utcapi imata ruhuacushcallapitac churarcani.

12Chai quipami Judá llactapi causaccunaca trigota, vinota, aceiteta, chungamanta shucta huacaichina ucuman apamurcacuna.

13Chai quipami Selemías curata, quillcac Sadocta levitapuramantaca Pedaiasta imalla tiyashcacunata cuidachun churarcani. Paicunata ayudachunca Zacurpac churi Hanantami churarcani. Zacurca Mataniaspac churimi carca. Paicunami Diosta cazuc imatapish cashcata ruhuaccuna carca. Paicunami caishuc huauquicunaman chaupishpa cungapac cai ruhuanata japircacuna.

14Ñuca mañashpaca: «¡Ñuca Dioslla, chashna allicunata ruhuashcamantaca ñucata yuyaringuiyari! ¡Diospac huasipi cuyaihuan imata ruhuashcatapish, canta servishcatapish ama cungaringuichu!» nircani.

15Chai punzhacunallatacmi Judá llactapica samana punzhapi uvasta cutacucta, gavillata ashtacucta, shinallatac vinota, uvasta, higota, ima cargacunatapish burropi cargashpa Jerusalenman apacucta maijancunataca ricurcani. Chashna samana punzhapi catucushcamantami sinchita rimarcani.

16Shinallatac Tiro pueblomanta shamushpa Jerusalenpi causaccunami samana punzhapi challuacunata, ima catunacunata Jerusalenman apamushpa, Judá runacunaman caturcacuna.

17Chaita ricushpami, Judá llacta mandaccunataca: «¿Ima nishpatac samana punzhata yangata ruhuashpa, millaita ruhuacunguichic?

18¿Manachu cancunapac ñaupa taitacuna chashna millaita ruhuacpi Diosca sinchita llaquichirca? ¡Cunancarin chashna samana punzhata yangapi churashpaca, israelcunata llaquichichunmi Diosta ashtahuan piñachicunguichic!» nircani.

19Samana punzha manarac callari chishimanta, samana punzha tucuringacamanmi Jerusalén pungucunataca huichcachun mandarcani. Shinallatac samana punzhacunapi pipish ama aparishca yaicuchunmi ñucapac maijan cuidaccunata churarcani.

20Chashna ruhuacpimi, catuccunapish, randiccunapish, shuc, mana cashpaca ishcai cutin Jerusalenmanta canzhapi pacarircacuna.

21Chaimantami paicunataca: «¿Ima nishpatac cai pirca huashapi pacaricunguichic? ¡Cutin caillapitac shayacucta ricushpaca prezushami!» nircani. Chaimanta pachami samana punzhapica mana ricurircacuna.

22Chai quipami samana punzhaca Diospaclla chicanyachishca punzha cachun levitacunataca Diospaclla tucushpa, pungucunapi cuidac shamuchun mandarcani.

Ñuca: «¡Dioslla, ñuca chashna ruhuashcacunataca yuyaringuiyari! ¡Canca llaquicmi cangui! ¡Chaimanta ñuca mana allita ruhuashcacunataca cungaringuiyari!» nircani.

23Shinallatac chai punzhacunapica Judá llactapi causaccuna Asdod, Amón, Moab pueblomanta, huarmicunahuan cazarashcatami ricurcani.

24Paicunapac huahuacunamanta chaupica Asdod rimaita, mana cashpaca shuctac rimaitami rimac carca. Judá rimaitaca mana yacharcachu.

25Chaimantami paicunata sinchita rimashpa, paicunata maldiciarcani. Maijancunataca huactarcani, acchatapish pitircani. Chai quipami paicunataca: «¡Cancunapac ushicunataca paicunapac churicunahuanca ama cazarachinguichicchu! ¡Cancunapac churicunapac huarmi cachunpish paicunapac ushicunataca ama apamunguichicchu!

26Israel llactata jatun mandac Salomonca ¿Manachu chaillamantatac juchallirca? Paica shuctac llacta jatun mandaccunata atishpa ashtahuan alli mandacmi carca. Diosca cuyashpami, tucui israelcunata mandac cachun churarca. Chashna cacpipish, shuctac llacta huarmicunami paitaca juchata ruhuachirca.

27¿Shuc llactamanta huarmicunahuan cazarashpa, jatun millaita ruhuashpachu mana cazushpa, Diosta piñachina canchic?» nircani.

28Joiadapac churicunamanta shuc churimi horonitapuramanta Sanbalatpac ushihuan cazarashca carca. Joiadaca curacunata mandac Eliasibpac churimi carca. Shina cazarashcamantami Sanbalatpac yernotaca ñuca ñaupamanta llucchishpa cacharcani.

29Ñucaca: «¡Ñuca Dioslla, curacunapish, levitacunapish ari nishcata yangata ruhuashpa, mapayashcamantaca yuyaringuiyari!» nircani.

30Shuc llactamanta shamushcacunata llucchishpa cachashpami curacunatapish, levitacunatapish paicunata tandachishpa, paicuna imata ruhuacushcallapitac churarcani.

31Ima horas Diosman cuna yantata, punta pucushca granota cunatapish allichircanimi.

«¡Ñuca Dioslla, ñuca chashna ruhuashcamantaca ñucamanpish allita ruhuanata yuyaringuiyari!»