1Huañunalla runa, shuc adobeta japishpa, cambac ñaupapi churashpa, chaipi Jerusalenta dibujai.
2Quipaca Jerusalenta piñaccuna muyundi shayacucta, macanacuna torrecunata, baluartecunata ruhuai. Chai ñaupapica soldadocunapac carpa huasicunatapish, caspicunahuan ruhuashpa, ariete nishcacunatapish muyundita ruhuai.
3Shinallatac shuc fierro planchata japishpa, pirca shinata chai Jerusalenhuan, canhuan chicanyachic jatun pirca shinata ruhuai. Chai quipaca, chai pueblota can llaquichingapac chimbapurashpa chapacuc shinata ruhuangui. Chai fierroca can ama ricuchun jarcac shinami canga. Chaimi israelcunamanca señal canga.
4Canca lluqui ladoman siririshpa, israelcunapac juchacunata cambac jahuapi shina churangui. Mashna cutin lluqui ladoman sueñushpaca, paicunapac juchacunatami apangui.
5Israelcunaca quimsa patsac iscun chunga huatatami juchallirca. Cada huatamantami shuc punzhata canca llaquita apana cangui.
6Ña chai punzhacunata pactachishca quipaca, alli ladoman siriringui. Shina siririshpaca, Judá llactapi causaccunapac juchacunata apangapacmi chuscu chunga punzhacunata siriringui. Israelcuna juchallishca cada huatamantami shuc punzhata llaquita apana cangui.
7Chai quipaca Jerusalenta muyundita shayacucta ricushpaca, rigrata alzashpa, Jerusalenpi causaccuna llaqui tucunata ñuca shutipi sinchita huillangui.
8Chai llaqui punzhacuna pactangacamanmi maimanpish ama tigrarichun cantaca huascahuan alli huatagrini.
9Canca trigotapish, cebadatapish, habastapish, lentejatapish, mijo nishcatapish, avenatapish shuc puñupi tandashpa churangui. Chaicunataca can lluqui ladoman siricushca quimsa patsac iscun chunga punzhacamanmi tandata ruhuashpa micungui.
10Chaitaca punzhanta chaupi librata micuna horaspi micungui.
11Shinallatac yacutapish, ubiana horaspi chaupi litrota ubiangui.
12Chai cebada tandataca tucuipac ricuipi mapata rupachishpa, cusashpa micungui» nirca.
13Cutinllatac Mandac Dios rimashpaca: «Chashnami israelcunaca mai llactaman ñuca llucchishpa cachacpica, mapa micunata micunga» nirca.
14Shina nicpimi ñucaca: «¡Mandac Dioslla! Ñucaca huahuamanta pacha cunancaman jaicapi mana mapayashcanichu. Huañushca aichatapish, sacha animal huañuchishca aichatapish, ima shuctac mapa aichatapish mana micushcanichu. Mana shimipi churashcanillapishchu» nircani.
15Shina nicpimi paica: «Tandata gentecunapac mapahuan cusanapac randica, huagra huanuhuanmi cusachun saquini» nirca.
16Shinallatac cutin rimashpaca: «Huañunalla runa, Jerusalenpica micuna illangami, pezashcallatami llaquilla micunga. Yacutapish medishpallami manchaihuan ubianga.
17Micunapish, yacupish tucuricpica, mancharishpami caishuc chaishuc ñahuipura ricunacunga. Paicunallatac juchata ruhuashcamantami ismushpa tucuringa.
Who We AreWhat We EelieveWhat We Do
2025 by iamachristian.org,Inc All rights reserved.
