MARCOS 4 - Biblia Quichua Cañar 2010

Jesús tarpuc runamanta chimbapurashpa parlashcamanta(Mt 13.1-9; Lc 8.4-8)

1 Cutinllatacmi Jesusca cucha patapi yachachi callarirca. Chaimanmi achca gentecuna tandanacurca. Chaimantami Jesusca yacupi cac canoapi yaicushpa tiyarirca. Gentecunaca yacu patapimi carca.

2Chaipimi chimbapurashca parlocunahuan achcata yachachirca. Pai yachachishpaca:

3“¡Caita uyaichic! Shuc tarpuc runami tarpungapac llucshirca.

4Pai tapucucpica, maijan muyuca ñanpimi urmarca. Chai muyutaca zhutacuna shamushpami mururca.

5Maijan muyuca rumi allpapimi urmarca. Chai muyuca jahualla allpa cacpimi, utca huiñarca.

6Chai yuraca mana ucuman sapiyuc cashpami, inti llucshishpa rupachicpica chaquircalla.

7Maijan muyuca casha chaupipimi urmarca. Casha huiñashpa aguachicpica, mana pucurcachu.

8Maijan muyuca alli allpapi urmashpami alli huiñashpa, shucmanta quimsa chungata, maijanca sucta chungata, maijanca patsac granota pucurca” nirca.

9Shinallatac Jesusca:

—Ringrita chariccunaca, alli uyaichic— nirca.

Imapac chimbapurashca parlohuan parlashcamanta(Mt 13.10-17; Lc 8.9-10)

10Jesús pailla saquiricpimi, paipac chunga ishcai yachacuccunapuramanta maijan chuchullapi tiyacuccunaca:

—Chimbapurashca parloca, ¿imatatac nisha nin?— nishpa tapurca.

11Chaimantami Jesusca:

—Diosca pai mandacucmantaca cancunamanca pacashcatami yachachishca. Ashtahuanpish caishuc gentecunamanca chimbapurashca parlocunallahuanmi yachachini.

12Paicuna ricushpapish, ama ricuchun, uyashpapish ama entendichunmi, chashnaca yachachicuni. Shinallatac Diosman ama cuti richun, paicunapac juchacunata ama perdonachunmi, chashna nini— nirca.

Jesús tarpuc runamanta parlashcata entendichishcamanta(Mt 13.18-23; Lc 8.11-15)

13Chaimantami Jesusca:

—Cai chimbapurashca parlocunahuan parlashcataca, mana entendishpaca, ¿ima shinatac shuctac parlocunata yachachicpica, entendinguichicyari?

14Tarpuc runa shinaca, alli huillaita huillacmi.

15Ñanpi urmashca muyu shinaca, alli huillaita uyaccunami. Shina uyacpipish, Satanás shamushpami shungumanta anchuchircalla.

16Rumi allpapi urmashca muyu shinaca, alli huillaimanta huillashcata cushilla chasquiccunami.

17Shina cashpapish, mana sapiyuc shina cashcamantami, llaquicuna japicpi, mana cashpaca alli huillaita crishcamanta gentecuna piñacpica, crinata saquincunalla.

18Casha chaupipi urmashca muyu shinaca, alli huillaimanta huillashcata alli uyaccunami.

19Chashna uyashpapish, cai causaipaclla munaihuan, charicyana munaihuan, charishpapish ashtahuan charina munaihuanmi pandarincuna. Chai munaicunami alli huillaita uyashcataca aguachic shina cungachin. Chaimantami grano mana pucuc shina ricurincuna.

20Alli allpapi tarpushca muyu shinaca, alli huillaita shungupi chasquiccunami. Chaimantami shuc muyumanta quimsa chungata, maijancunaca sucta chungata, maijancunaca patsac granota pucuc shina tucuncuna— nirca.

Ima pacalla ruhuashcapish ricurina cashcamanta(Lc 8.16-18)

21Jesús ashtahuan parlashpaca:

—Luzta japichishpaca, ¿pitac cajón ucupi, mana cashpaca cama ucupi churangayari? Ashtahuanpish pata jahuapi achicyachichun churan.

22Chaica, ima pacashcapish mana pacalla saquiringachu, tucuimi ricuringa. Mana yachashcapish tucuimi yacharinga.

23Ringrita chariccunaca, alli uyaichic— nirca.

24Shinallatac Jesusca:

—Caita uyashpa, allita entendichic. Shuccunaman ima shinami cunguichic, chashnallatacmi cancunamanpish Diosca cunga. Cancuna uyaccunamancarin ashtahuanmi cunga.

25Maijanpish chariccunamanca ashtahuanmi cunga, ashtahuanpish mana chariccunamantaca, ashalla charishcatapish quichungami— nirca.

Huiñacuc muyuhuan chimbapurashcamanta

26Chashnallatac Jesusca:

—Dios mandacucca, shuc runa allpapi muyuta tarpuc shinami.

27Chai runaca tutaca sueñunmi, punzhaca jatarinmi. Tarpushca muyuca pai mana yachacpimi, huiñashpa catin.

28Allpaca, paillami granota ricuchin. Chaica, puntaca pangacunarac ricurin. Quipaca espiga ricurin, cutin espigapica grano ricurin.

29Ña pucushpa, cosechana punzha chayamucpica, hoces-huanmi pitingapac rin— nirca.

Mostaza muyuhuan chimbapurashcamanta(Mt 13.31-32; Lc 13.18-19)

30Cutinllatac Jesusca:

—Dios mandacuctaca, ¿ima shina cashcatatac nisha? ¿Ima parlohuantac chimbapurasha?

31Dios mandacucca, tarpushca mostaza muyuta shinami. Chai muyuca tucui muyucunamanta ashtahuan ñutumi,

32ashtahuanpish ña tarpushca huiñashpaca, tucui huertapi tiyac yuracunamanta yallimi tucun. Chai ramacunapimi volac animalcuna shamushpa, llandurincuna— nirca.

Jesús yuyaita japina parlocunallahuan parlashcamanta(Mt 13.34-35)

33Jesusca chimbapurashca parlocunahuanmi quishpirinamanta yachachirca. Chashna yachachicushpaca, gentecuna entendinallatami parlacurca.

34Paicunamanca chimbapurashca parlocunallahuanmi imatapish yachachirca. Paipac yachacuccunallahuan cashpaca, ima nisha nishcatapish tucuimi entendichirca.

Jesús huairata parachishcamanta(Mt 8.23-27; Lc 8.22-25)

35Chai punzha, ña tutayacucpimi Jesuaca:

—Cai cucha yacuta pasashun— nirca.

36Gentecunata cachashca quipami Jesusta canoapi tiyachishpa pusharca. Maijancunaca shuctac canoapimi Jesusta catishpa rirca.

37Chashna ricucpimi, huaira sinchita jatarishpa, yacuta caiman chaiman cuyuchi callarirca. Chaimantami canoapi yacu jundai callarirca.

38Jesusca canoa huasha ladopimi saunarishpa sueñucurca. Chaimantami paipac yachacuccunaca:

—Yachachic, ¡ñucanchicca ñami ucuyagrinchicca! ¿Manachu llaquingui?— nishpa ricchachirca.

39Jesús jatarishpa, huairatapish cuchatapish rimashpaca:

—¡Casilla cai!— nishpami, nircami.

Shina nicpimi, huairapish, cuchapish casilla tucurca.

40Jesusca, paipac yachacuccunataca:

—¿Ima nishpatac yalli mancharinguichic? ¿Manaracchu ñucataca alli cringuichic?— nirca.

41Shina nicpimi, mancharishpa, paicunapura parlanacushpaca:

—¿Pitac caica? Paitaca huairapish, yacupish cazunmi— ninacurca.