1Joseca Manasespac taitami carca. Manasesca Maquirpac taitami carca. Maquirca Galaadpac taitami carca. Chai Galaadpac huahua huahuapuramanta cac ailluta pushaccunami Moisespacman, israelcunata pushaccunapacman rishpaca:
2—Mandac Diosca ñucanchic mandac Moisestami ñucanchic israelcunaman suerteta ruhuashpa, allpata chaupichun mandarca. Ñucanchic aillupuramanta Zelofehadpac allpata paipac ushicunaman cuchun mandarca.
3Shina cacpipish, chai huarmicuna caishuc aillupuramanta israelcunahuan cazaracpica, chai allpaca maijanhuan cazarashca cashca aillupacmi tucunga. Shina ruhuashpaca, ñucanchic taitamanta japishca allpatami quichunga.
4Israelcunapac allpata cutichina huata chayamucpica, chai huarmicuna japishca allpaca maijan ailluhuan chai huarmi cazarashca cacpipish, chai aillupacmi tucunga. Chashna cacpica, ñucanchic allpaca ashallayangami— nirca.
5Paicuna shina nicpimi, Moisesca Mandac Dios mandashca shinallatac israelcunataca:
—Josepac aillucunaca cashcatatacmi nincuna.
6Mandac Diosca Zelofehadpac ushicunataca: “Paicunapac taitamanta aillupurahuanca paicuna munashcahuan cazarachunlla.
7Israelcunaca, paicunapac allpataca quiquin aillupurapi charichunlla. Caishuc aillupac allpataca caishuc aillucunamanca ama cuchun. Chashna ruhuacpimi, chai allpaca mana maqui maqui pasanga.
8Israel aillumanta maijan huarmipish allpata japishpaca, paipac taitapac aillupuramanta carihuan cazarachun. Chashnami israelcunaca paicunapac taitamanta allpata japinga.
9Shina ruhuashpami israelcunaca paicuna japishca allpataca shuc ailluman, chaishuc ailluman maqui maqui mana pasachinga. Tucui israelcunami paicuna japishca allpataca cuidashpa charinga” nishpami mandarca— nirca.
10Shina nicpimi, Zelofehadpac ushicunaca Mandac Dios Moisesta mandashca shinallatac ruhuarca.
11Chashnami Maala, Tirsa, Hogla, Milca, Noa huarmicunaca paicunapac taitapac huauquicunapac churicunahuan cazararca.
12Zelofehadpac ushicunaca paicunapac taitapac aillupuramanta runahuan cazaracpimi, paicuna japishca allpaca Manasespac aillupurapi saquirirca. Manasesca Josepac churimi carca. Zelofehadpish Manasespac huahua huahuami carca.
13Tucui cai mandashcacunataca Mandac Diosmi israelcuna Jordán yacu patapi, Jericó chimbapurapi tiyac Moab pambacunapi cacpi, Moisesman huillachirca.
Who We AreWhat We EelieveWhat We Do
2025 by iamachristian.org,Inc All rights reserved.
