1 CRÓNICAS 23 - Biblia Quichua Cañar 2010

Levitacunata Diospac huasita ruhuanapi churashcamanta

1Davidca achca huatayuc ña yuyac cashpami, paipac churi Salomonta israelcunata mandac cachun churarca.

2Shinallatac israelcunata mandaccunatapish, curacunatapish, levitacunatapish tucuitami tandachirca.

3Levitacunataca quimsa chunga huatamanta huichaimanmi yuparca. Tucui yupacpica, quimsa chunga pusac huarangami carca.

4Caicunamantaca, Ishcai chunga chuscu huaranga runacunaca Mandac Diospac huasi ruhuanata pushaccunami carca. Sucta huaranga runacunaca mandaccuna, shinallatac juezcunami carca.

5Chuscu huaranga runacunaca Diospac huasi punguta cuidaccunami carca. Cutin chuscu huaranga runacunaca Mandac Diosta alli ningapac ruhuachishca tocanacunapi tocaccunami carca.

6Davidca Levipac aillupuramanta Gersonpac, Cohatpac, Meraripac huahua huahuacunataca paicunapurallatacmi chicanyachirca.

7Gersonpac churicunaca: Ladán, shinallatac Simeimi carca.

8Ladanpac quimsa churicunaca: Puntaca Jehiel, chai quipaca Zetam, shinallatac Joelmi carca.

9Simeipac quimsa churicunaca: Selomit, Haziel, shinallatac Haranmi carca. Paicunami Laadanpac huasi ucupuracunata mandaccuna carca.

10Simeipac chuscu churicunaca: Jahat, Zina, Jeús, shinallatac Beriami carca.

11Puntaca Jahatmi carca. Quipaca Zinami carca. Ashtahuanpish Jeús, shinallatac Beriaca mana achca huahuacunatachu charirca. Chaimantami paicunataca shuc familiallata ruhuashpa shuc ruhuanallapi churarca.

12Cohatpac chuscu churicunaca: Amram, Izhar, Hebrón, shinallatac Uzielmi carca.

13Amrampac churicunaca: Aarón, shinallatac Moisesmi carca. Aarontapish, paipac huahua huahuacunatapish paipac ñaupapi huiñaita servishpa inciensota rupachichun, shinallatac paipac shutipi israelcunata huiñaita bendiciachunmi Mandac Diosca chicanyachirca.

14Diosta servic Moisespac huahua huahuacunataca Levipac aillucunahuan tandachishpami yuparca.

15Moisespac churicunaca: Gersón, shinallatac Eliezermi carca.

16Gersonpac churi Sebuelca mandacmi carca.

17Eliezerpac churi Rehabiaspish mandacmi carca. Eliezerca mana ashtahuan shuctac churicunata charircachu. Shina cashpapish Rehabiasca achca huahuacunatami charirca.

18Izharpac churi Selomitpish mandacmi carca.

19Hebronpac churicunaca: Puntaca Jerías, quipaca Amarías, quimsaniquica Jahazael, chuscuniquica Jecamanmi carca.

20Uzielpac churicunaca: Puntaca Micaía, quipaca Isiasmi carca.

21Meraripac churicunaca: Mahli, shinallatac Musimi carca. Mahlipac churicunaca: Eleazar, shinallatac Cismi carca.

22Eleazarca churicunata mana charishpami huañurca. Shina cashpapish ushicunataca charircami. Chai ushicunatami paicunapac taitapac huauqui Cispac churicunaca paicunapac huarmi cachun japircacuna.

23Musipac quimsa churicunaca: Mahli, Edar, shinallatac Jeremotmi carca.

24Paicunami, paicunapac ñaupa taita Levipac huahua huahuacunaca carca. Paicunaca ñaupa taitacunapac familiacunata pushaccunami carca. Paicuna mashna cashcata yachangapac shuticunata quillcashpa, shucllancaman yupashcami carca. Paicunataca ishcai chunga huatayucmanta huichaimanmi Diospac huasipi imata ruhuachun aparca.

25Davidca: «Israelcunata Mandac Diosmi pai acllashca israelcunamanca sumac causaita cushpa samachishca. Paica huiñaitami cai Jerusalenpi causanga.

26Levitacunaca Dios-huan tupana huasitapish, Diospacta ruhuangapac ima charinacunatapish mana ashtahuan maimanpish apangacunachu» nirca.

27David ña tucurina rimaicunata rimashca shinallatacmi Levipac huahua huahuacunataca ishcai chunga huatayucmanta huichaiman yupachun mandarca.

28Paicunaca Aaronpac huahua huahuacunata Mandac Diosta servinata ayudangapacmi carca. Paicunaca Diospac huasipi paipaclla chicanyachishcacunapi, ima mapa ama tuparichun cuidaccuna, ima ashtahuan shuc ruhuanacunatapish ruhuaccunami carca.

29Shinallatac Diosman chicanyachishca tandatapish, ashtahuan alli harinatapish, levadura illac galletatapish, sartenpi cusashpa Diosman cunatapish, medinacunatapish, pezanacunatapish cuidacmi carca.

30Chishipish, tutamantapish, Mandac Diosta pagui nishpa, alli ningapacmi ric carcacuna.

31Samana punzhacunapi, llullu quilla punzhacunapi, jatun fiesta punzhacunapi Mandac Diosman cushca tucui animalcunata rupachingapacmi ric carca. Chai punzhacunapi mashna animalcunata cuchun mandashca shinallatacmi Mandac Diospac ñaupapi curcacuna.

32Dios-huan tupana huasitapish, Diospaclla chicanyachishca ucutapish paicunami cuidacurca. Chashnami paicunaca Mandac Diostaca Aaronpac huahua huahuacunata Mandac Diospacta servinata ayudaccuna carca.