1Jerusalén pueblota mandac Davidpac churi huillacca:
2«Tucui imapish yangallami.
Ima cashpapish tucuimi yangallata» nirca.
3Inti achicyachicuc cai pachapi
causaccunaca mana samarishpa,
imatapish sinchita trabajashpaca
¿ima allitatac japincuna?
4Huahua huahuacunaca huañunmi.
Shuctac huahua huahuacunaca huacharinmi.
Ashtahuanpish allpaca chashnallatacmi can.
5Intica llucshinmi, cutin tigranmi.
Pai maipi cashcaman cutinmi.
Chaimanta cutin llucshinmi.
6Huairaca ura ladoman pucushpami,
jahua ladoman muyun.
Cutinpish cutinpish,
chaillatatac muyushpami,
pai maipi cashcallamantac tigran.
7Tucui yacucunami mama cuchaman rin.
Ashtahuanpish mama cuchaca mana jundanchu.
Chai yacucunaca llucshimushcallatatac
cutishpami chaillamanta cutin callpan.
8Ima ruhuaipish shaicuchinmi.
Tucui chaicunamantaca
pipish mana allita huillanchu.
Ñahuica ricunata,
Ringrica uyanata mana shaicunchu.
9Ñaupaman imami tiyarca,
chaillatacmi quipamanpish tiyanga.
Ñaupaman ima ruhuarishcaca,
chaillatacmi quipamanpish ruhuaringa.
Cai pachapica ima mushucca mana tiyanchu.
10Imapish: «Riqui, caica mushucmi»
ninaca mana tiyanchu.
Tucui imapish ñucanchic manarac
tiyacpimi, utcaman ña tiyashca.
11Ñaupaman ima tiyashcataca
cungarishcami can.
Quipaman ima tiyacpipish,
cungarishcami canga.
Quipaman ima tiyacpipish
cungaringacunami.
Huillacpac yuyaicunamanta12Ñucaca huillacmi cani. Jerusalén pueblopimi Israel llactata mandarcani.
13Ñucaca cai pachapi imata ruhuashcata allita entendingapacca tucui yuyaihuan callarishpami ricurcani. Dios cai pachapi causaccunaman cushca ruhuanacunaca yallita sinchimi.
14Cai pachapi causaccuna imata ruhuashcataca tucuimi ricurcani. Riqui chaicunaca yangallami. Chaicunaca huairata caticuc shinallami.
15Huishtuyashcataca mana derechai pudipacmi.
Imapish illashcataca
mana pactachi pudipacchu.
16Chaimantami ñuca shungupica: «Jerusalenpi ñaupa causac tucui mandaccunata yalli yachac, shinallatac tucuipac jatunyachishcami cani. Ñucaca achcata yachac alli yuyaiyucmi cani» nircani.
17Tucui shunguhuanmi allita yachanatapish, allita entendinatapish, yuyai illac canatapish, imapish yangata ruhuac canatapish utca yachacurcani. Tucui chai yachashcacunaca, yuyaita yanga shaicuc shinalla cashcatami ricurcani.
18Chaica,
yallita yachac cacpica,
uma nanaimi shamun.
Maijanpish ashtahuan yachacushpaca,
llaquitami mirachin.
Who We AreWhat We EelieveWhat We Do
2025 by iamachristian.org,Inc All rights reserved.
