DANIEL 2 - Biblia Quichua Cañar 2010

Nabucodonosor muscushcamanta

1Jatun mandac Nabucodonosor ishcai huatata mandacushpami muscushpa shungupi llaquilla tucushpa mana sueñui pudirca.

2Chaimantami jatun mandacca chai muscushcata tapungapac yachaccunata, lucerota ricushpa yachacuccunata, brujocunata, caldeocunata cayachun cacharca. Chashna cayacpimi, jatun mandacpac ñaupaman shamurca.

3Jatun mandacca paicunataca:

—Muscushpami, chai muscui imata nicushcata mana entendishpa, shungupi llaquilla cani— nirca.

4Shina nicpimi, paicuna arameo rimaipi rimashpaca:

—¡Jatun mandaclla huiñaita causangui! Canta serviccunaman can muscushcata huillailla, ñucanchicca imata nisha nicushcata huillashunllami— nirca.

5Shina nicpimi, jatun mandacca paicunataca:

—Ñucaca cungarishcanimi. Imata muscushcatapish, chai muscui imata nisha nicushcata mana huillashpaca ñutuchishcami canguichic. Cancunapac huasicunapish tucuchishcami canga.

6Ashtahuanpish imata muscushcata, chai muscui imata nisha nishcata huillashpaca, alli japinatami japinguichic. Alli nishcami canguichic. Chaimanta imata muscushcata, chai muscui imata nisha nicushcata huillaichic— nirca.

7Shina nicpimi, paicuna cutinllatac rimashpaca:

—Jatun mandaclla, canta servic ñucanchicman can muscushcata huillailla, ñucanchicca chai muscui imata nisha nicushcata huillashunllami— nirca.

8Shina nicpimi, jatun mandacca:

—Cancunaca ñuca muscushcata cungarishcata yachashpami, imatapish nic tucushpa unaiyacunguichic. Chaitami ricuni.

9Ñuca muscushcata cancuna mana huillashpaca huañuitami shuyacunguichic. Cancunaca ñuca imata ruhuagricushcata saquichunmi ñucaman llullashpa huillangapac yuyarinacushcanguichic. Chai muscushca imata nisha nicushcata huillai pudic cashcata ñuca ricungapac, chai muscushca imata nisha nicushcatarac huillaichic— nirca.

10Shina nicpimi, paicunaca jatun mandacpac ñaupapi rimashpaca:

—Pi jatun mandacpish, pi sinchi jatun mandacpish can tapushca shina, yachaccunaman, lucerota ricushpa yachacuccunaman, caldeocunaman mana tapushcachu.

11Shinallatac can jatun mandac tapushcaca sinchimi. Pipish canman huillacca mana tiyanchu. Caitaca dioscunallami huillai pudin, paicunaca mana runacunahuan causanchu— nirca.

12Shina nicpimi, jatun mandacca yallita piñarishpa, Babiloniapi causac tucui yachaccunata huañuchichun cacharca.

13Yachaccuna huañuchichunmi shuc mandashcata quillcarca. Shinallatac Danieltapish, paihuan caccunatapish huañuchingapac mashcarcami.

Mandac Dios jatun mandac muscushcataDanielman huillashcamanta

14Jatun mandacta cuidaccunata mandac Arioc Babiloniapi causac yachaccunata huañuchingapac llucshicpimi, Danielca yallita yuyarishpa, mandac Arioc-huan parlangapac rirca.

15Chashna rishpa, jatun mandacta cuidaccunata mandac Arioctaca:

—¿Imamantatac jatun mandacca yallita llaquichichun mandashpa quillcarcayari?— nirca.

Shina huillacpimi, Ariocca imamanta mandashpa quillcashcata Danielman huillarca.

16Shina huillacpimi, Danielca jatun mandacpacman rishpa, pai muscushcata huillangapac asha punzhacunata shuyachun mañarca.

17Chai quipaca Danielca huasiman rishpami, paihuan cac Ananiasman, Misaelman, Azariasman huillarca

18Shinallatac Danieltapish, paihuan caccunatapish Babiloniapi causac yachaccunata shina huañuchinatami mancharca. Chaimantami jahua pacha Dios llaquishpa ayudachun mañai ningapac rirca.

19Chashna huillacpimi, pi mana huillai pudishcata Danielman tuta muscuipi shina ricuchirca. Chaimantami Danielca jahua pacha Diosta alli nishpaca:

20«¡Huiñaimanta huiñaicaman

Diospac shutica alli nishca cachun!

21Canmi huatacunatapish,

punzhacunatapish shuctaclayata

ruhuangui.

Canmi jatun mandaccunatapish

churangui, shinallatac

llucchingui.

Alli yachaccunamanca

alli yachaita,

yuyaisapacunamanca

alli yuyaitami cungui.

22Canmi maita mana

yachaipaccunatapish

yachachingui.

Canmi yalli purapi caccunatapish

achicyachingui.

Canmi luz cangui.

23Ñucanchic taitacunapac Dioslla,

cantami alli nini.

Canmi alli yachaita cushpa

sinchiyachishcangui.

Cunanmi ñucanchic mañashcata

uyashpa, jatun mandac tapushcata

ñucanchicman ricuchingui» nirca.

24Chai quipami, Danielca jatun mandac Babiloniapi causac yachaccunata huañuchichun cachashca Ariocpacman rishpaca:

—Babiloniapi causac yachaccunata ama huañuchichu. Jatun mandacpac ñaupaman ñucata pushai, pai muscushcata paiman huillashallami— nirca.

25Shina nicpimi, Ariocca Danielta utca jatun mandacpacman pusharca. Chaiman pushashpaca:

—Judá llactamanta prezu apamushcapurapimi jatun mandac muscushcata huillac shuc runata tarimuni— nirca.

26Shina nicpimi, jatun mandacca Beltesasar nishca Danieltaca:

—¿Canca ñuca muscushcatapish, chai muscushca imata nisha nicushcatapish huillai pudinguichu?— nirca.

27Shina nicpimi, Danielca jatun mandactaca:

—Pipish mana yachashcata can tapushcataca yachaccunapish, lucerota ricushpa yachacuccunapish, adivinocunapish mana huillai pudinchu.

28Shina cacpipish, jahua pachapimi, pipish mana yachashcata huillac Dios tiyan. Paimi jatun mandac Nabucodonosorman shamuc punzhacunapi ima tucunata ricuchishca. Can muscushca, can sueñushpa ricushcaca,

29jatun mandac canca, cambac camapi sueñucushpami, shamuc punzhacunapi ima tucunata yachanata munarcangui. Pi mana yachashcata huillacmi shamuc punzhacuna ima tucunata canman ricuchishca.

30Chai mana yachashcataca ñucamanmi ricuchirca. Chaica, mana ñuca tucui gentecunata atishpa yachashcamantachu ñucaman ricuchirca. Ashtahuanpish can muscushca imata nisha nicushcata, cambac shungu imata yuyacushcata huillachunllami ñucaman ricuchirca.

31Jatun mandaclla, jatun runaman ricchata cambac ñaupapi shayacuctami ricurcangui. Chaica yalli jatun, yallita achic nicuc, ñahuica manchaipacmi carca.

32Umaca curimi carca. Pechopish, rigrapish cullquimi carca. Cutin huicsamanta uraimanca broncemi carca.

33Cutin changacunaca fierromi carca. Chaquica chaupica fierro, chaupica allpamanta ruhuashcami carca.

34Chaita ricucucpimi, manapish pi cacharicpi, shuc rumi shamushpaca, chai runaman ricchapac fierro chaquita, allpamanta ruhuashca chaquita huactashpa polvorca.

35Chashna polvocpimi, fierropish, allpamanta ruhuashcapish, broncepish, curipish, cullquipish usyai punzhacunapi trillana erapi tiyac tamo shina tucurca. Chaita huaira apacpimi, chai shayacushca pushtupica jaicapi mana ricurirca. Cutin chai runaman ricchata huactac rumica jatun urcu tucushpami, tucui cai pachata taparca.

36Chaitami muscurcangui. Chai muscushca imata nisha nicushcatapish jatun mandacpac ñaupapimi huillagrini.

37Jatun mandaclla, canca jatun mandaccunatapish mandacmi cangui. Chaica, jahua pacha Diosmi, llactata mandanatapish, fuerzatapish, mandangapac yuyaitapish canman curca.

38Cambac maquipimi cai pachapi causac runacunatapish, sacha animalcunatapish, jahuata volashpa ric animalcunatapish mandachun churarca. Canmi chai curi umaca cangui.

39Cambac quipaca shuc yangalla jatun mandacmi mandai callaringa. Chai quipaca bronce shina, jatun mandacmi mandai callaringa. Paimi tucui cai pachata mandanga.

40Chuscuniqui mandacca fierro shina sinchi mandacmi canga. Fierro ima shinami polvoshpa ñutuchic shinami, tucuita polvoshpa ñutuchic shina mandanga.

41Shinallatac can ricushca chaupica allpamanta ruhuashca, chaupica fierromanta ruhuashca chaquica, chaupirishca mandana nisha ninmi. Can ricushca chaupica fierro, chaupica allpamanta ruhuashca cashca shinallatacmi chai llactaca fierro shina sinchi mandac canga.

42Chai chaqui dedocunaca maijanca fierromanta, maijanca allpamantami ruhuashca. Chashnallatacmi ishcaipi chicanyarishca llactaca chaupica sinchi, chaupica urmanalla canga.

43Can ricushca fierromanta, allpamanta ruhuashca chaquica runacunapura tandanacungapac ari nishca nisha ninmi. Shina tandanacushpapish allpahuan, fierrohuan mana tandaric shinami caishuc, chaishuc mana tandaringa.

44Chai jatun mandaccuna mandacui punzhacunami jahua pacha Diosca jaicapi mana tucuchipac llactata mandachun churanga. Chai llactata mandactaca mana shuctac runacunaman cungachu. Chai jatun mandacmi shuctac jatun mandaccunata ñutuchishpa tucuchinga. Shinami paica huiñaita mandacungalla.

45Canca manapish pi cacharicpi, urcumanta rumi shamushpa, fierrota, bronceta, allpata, curita, cullquita ñutuchictami ricurcangui. Chaica, Diosmi shamuc punzha ima tucunata ricuchishca. Chai muscushcaca chashnatacmi tucunga. Chai muscushca imata nisha nicushcapish mana llullachu— nirca.

46Shina huillacpimi, jatun mandac Nabucodonosorca Danielpac ñaupapi pambacaman cumurishpa alli nirca. Chaimantami ofrendata paiman cuchun, inciensota rupachichun mandarca.

47Shinallatac jatun mandacca Danieltaca:

—Cancunapac Diosca, dioscunapac Diosmi, jatun mandaccunapac Jatun Mandacmi. Pipish mana yachashcata ricuchinmi. Chaimantami pipish mana yachashcata canca huillangui— nirca.

48Chaimantami jatun mandacca Danielta alli nishpa, sumaccunata curca. Shinallatac Babilonia llactata mandac cachun, chai llactapi causac yachaccunatapish mandac cachunmi churarca.

49Danielca jatun mandacmanca Sadracta, Misacta, Abed-negota, Babilonia llactata mandacta ayudachun churachunmi mañarca. Cutin Danielca jatun mandac tiyanapimi saquirirca.